Read Time:5 Minute, 4 Second
ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން އދ.އަރިޔަދޫގައި ކާށި އާލާކުރާ މަރުކަޒު ޤާއިމްކުރުމަށް ކުރިއަށްގެންދާ މަޝްވަރާތަކަށް ޚިޔާލު ހޯދުމުގެ މަސައްކަތް ފަށައިފިއެވެ. ދިވެހިރާއްޖޭގައި ރުއް އާލާ ކުރުމަށް ހިންގާ ޤައުމީ ޕްރޮގްރާމުގެ ދަށުން އަރިޔަދޫގައި “ކޮކޮނަޓް ޑިވެލޮޕްމަންޓް ސެންޓަރ” އެއް ގާއިމުކޮށް އދ. އަރިޔަދޫ އަކީ ދަނޑުވެރި ކަމާއި ދިރޭތަކެއްޗާ ބެހޭ ވުޒާރާގެ ރަށެއްގެ ގޮތުގައި ކަނޑައެޅުއްވުމަށް ނިންމަވާފައިވަނީ ވަޒީރުންގެ މަޖިލީހުގެ ޖަލްސާއެއްގައެވެ.
އަރިޔަދޫ އަކީ ދަނޑުވެރި ކަމާއި ދިރޭތަކެއްޗާ ބެހޭ ވުޒާރާގެ ރަށެއްގެ ގޮތުގައި ކަނޑައެޅިގެން ދިއުމުން ދިވެހިރާއްޖޭގައި ރުއް އާލާ ކުރުމުގެ ޤައުމީ ޕްރޮގްރާމުގެ ދަށުން އެރަށުގައި ކޮކޮނަޓް ޑިވެލޮޕްމަންޓް ސެންޓަރެއް ގާއިމުކޮށް ދިވެހިރާއްޖޭގައި ހެދޭ، އަދި ހައްދަން ބޭނުންވާ މަތިވަރާއި، ފެންވަރު ރަނގަޅު ރުކުގެ ނާސަރީތަކެއް ގާއިމުކޮށް ރުކުގެ ސެޓިފައިޑް ތަފާތު މުޑުވައްތައް ދެމެހެއްޓެނިވި ގޮތެއްގައި ރަށްތަކަށް ފޯރު ކޮށްދިނުމުގެ މަސައްކަތް ކުރެވޭނެކަމަށް އެވުޒާއިން ވިދާޅުވެއެވެ. އަދި ހޭޅިފަށުގައި ހެދޭ ގަސްގަހާއިގެހި އާލާ ކުރުމަށާއި، ކާނާގެ ޔަގީންކަން ގާއިމުކުރުމަށްޓަކައި، ޕްރޮގްރާމްތައް ހިންގުމަށް ބޭނުންވާ ތަފާތު މުޑުވައްތައްވެސް އެރަށުގައި އުފެއްދުމަށް ވަނީ ނިންމަވާފައެވެ.
ރުއްތަކަށް ޖެހޭ ބަލިތައް ދެނެގަނެ މިކަމުގެ ހައްލު ހޯދުމުގެ މަސައްކަތަށް މަގުފަހިވާ އެޑެޕްޓިވް ރިސާރޗްވެސް އަރިއަދޫގައި ފަށާނެކަމަށް އެވުޒާރާއިން ވިދާޅުވިއެވެ. އަދި ރުކަށް ޖެހޭ ބަލިތައް ކޮންޓްރޯލް ކުރުމަށް ބޭނުންކުރާނެ ބައޮލޮޖިކަލް ކޮންޓްރޯލް (ފައިދާހުރި ދިރޭ ސޫފާސޫފި އަދި ފަނިފަކުސާ) އާލާކުރުމުގެ މަސައްކަތްތައްވެސް ކުރިޔަށް ގެންދިއުމަށްވަނީ ނިންމަވާފައެވެ.
މިމަސައްކަތްތައް ކުރިއަށްގެންދާނެ ގޮތަކާއި ގުޅޭގޮތުން މަޝްވަރާކުރުމަށް ޚިޔާލު ދޭން ބޭނުންވާ ފަރާތްތައް ނަން ނޯޓުކުރުމަށް ދަނޑުވެރިކަމާއި ބެހޭ ވުޒާރާއިން ވަނީ ހުޅުވާލާފައެވެ. އެގޮތުން އެފުރުސަތު އާއްމުންނަށާއި، ޖަމިއްޔާތަކުގެ އިތުރުން ކުންފުނިތަކަށްވެސް ވަނީ ހުޅުވާލާފައެވެ.
ދަނޑުވެރިކަމާ ބެހޭ ވުޒާރާއިން ވިދާޅުވީ މިސެންޓަރު ހެދުމަށް ބޭނުންވާ ފަންނީ އަދި މާލީ އެހީތެރިކަން ހޯދުމަށްޓަކައި ފޮރިން އިންވެސްޓްމަންޓަށް ހުޅުވާލާނެކަމަށެވެ. އަދި ރަށް މެނޭޖްކުރުމުގެ ޚަރަދުވެސް މީގެތެރެއިން ހޯދަން ހަމަޖެހިފައިވާކަމަށެވެ. ރާއްޖޭގަ މިވަގުތު ހުރި ރުއްތަކަކީ އުމުރުން ވަރަށް ދުވަސްވީ ރުއްތަކެކެވެ. މި މަޝްރޫޢުގެ ސަބަބުން ރުކުގެ ބާވަތްތައް ލިބުމުގައި ހުރި ދަތިތަކަށް ހައްލެއް ލިބި ކާނާގެ ޔަގީންކަން އިތުރުވެގެންދާނެކަމަށް ދަނޑުވެރި ކަމާއި ދިރޭތަކެއްޗާ ބެހޭ ވުޒާރާއިން ވިދާޅުވެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0