ހިލޭ ހައްޖުގެ ފުރުސަތު ލިބޭނީ ފަގީރުންކަން ޔަޤީންކުރުމަށްފަހު، އޮޅުވާލައިފި ނަމަ ޖާގަ އަތުލާނެ: ޝަހީމް

Read Time:3 Minute, 50 Second

ސަރުކާރުގެ ޚަރަދުގައި ހައްޖަށް ދިއުމަށް ފަޤީރުންގެ ދަފްތަރުން ހޮވިފައިވާ ފަރާތްތަކުގެ ޙާލަތު އިތުރަށް ބަލާނެ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު މިއަދު ވިދާޅުވެއްޖެއެވެ. ޝަހީމް ކުރެއްވި ފޭސްބުކް ޕޯސްޓެއްގައި ވިދާޅުވި ގޮތުގައި މިއަހަރު ސަރުކާރުގެ ޚަރަދުގައި ހިލޭ ހައްޖަށް ފޮނުވުމަށް ހަމަޖެހިފައިވަނީ 50 މީހުންނެވެ. ރިޒާވްގެ ގޮތުގައި 10 މީހުން ހޮވުމަށް ގުރުއަތުލުން ބޭއްވުނު ކަމަށް އިސްލާމިކް މިނިސްޓްރީން ވަނީ ހާމަކޮށްފައެވެ. ނަމަވެސް، މި ލިސްޓުގައި ހިމެނޭ ބައެއް ފަރާތްތަކަކީ ފަޤީރުންގެ ގޮތުގައި ނުބެލެވޭނެ ފަރާތްތަކެއް ކަމަށް ބުނެ ބައެއް ފަރާތްތަކުން ކަންބޮޑުވުން ފާޅުކޮށްފައިވެއެވެ.

“މިގޮތުން އެއާ ޚިލާފަށް އޮޅުވާލައިގެން މައުލޫމާތު ދީގެން ދަފްތަރުގައި ޖެހިފައިވާ ކަން ސާބިތު ވެއްޖެނަމަ ހައްޖުގެ ފުރުސަތު ގެއްލޭނެ.” މިނިސްޓަރު ވިދާޅުވިއެވެ.

މި މައްސަލައާ ގުޅޭ ގޮތުން މިނިސްޓަރު ޝަހީމް ވިދާޅުވީ، އޮޅުވާލައިގެން މަޢުލޫމާތު ދީފައިވާކަން ސާބިތުވެއްޖެނަމަ، އެ ފަރާތްތަކުގެ ހައްޖުގެ ފުރުޞަތު ގެއްލޭނެ ކަމަށެވެ. އިސްލާމިކް މިނިސްޓްރީން ވިދާޅުވަ ގޮތުގައި، ހައްޖަށް ދާނެ ފަރާތްތައް ހޮވާފައިވަނީ ފަޤީރުންގެ ދަފްތަރުގައި ހިމެނޭ 302 މީހުންގެ ތެރެއިންނެވެ. މި ދަފްތަރަކީ 2023 ވަނަ އަހަރުގެ ޑިސެމްބަރު މަހު ޒަކާތު ހައުސްއިން ރިވިއުކޮށްފައިވާ ދަފްތަރެއް ކަމަށް ވެސް އެ މިނިސްޓްރީން ހާމަކޮށްފައިވެއެވެ. ނަމަވެސް، ޒަކާތު ފަންޑުން އެހީ ހޯދުމަށާއި ފަޤީރުންނަށް ލިބޭ ފުރުޞަތުތައް ހޯދުމަށް ބައެއް ފަރާތްތަކުން އޮޅުވާލައިގެން ފަޤީރުންގެ ދަފްތަރުގައި ޖެހޭކަން ފާހަގަކުރެވިފައިވެއެވެ. މިފަދަ މައްސަލަތަކެއް މިދިޔަ އަހަރު ވެސް ފާހަގަކުރެވިފައިވާކަން ފާހަގަކުރެވެއެވެ.

މި މައްސަލައާ ގުޅިގެން، ހައްޖަށް ދާ ފަރާތްތަކުގެ ޙާލަތު އިތުރަށް ބެލުމަށް އިސްލާމިކް މިނިސްޓްރީން ނިންމާފައިވާކަން ފާހަގަކުރެވެއެވެ. މިކަމުގެ މަޤްޞަދަކީ ހިލޭ ހައްޖުގެ ފުރުޞަތު ޙައްޤުވެރިންނަށް ލިބިދިނުން ކަމަށް މިނިސްޓްރީން ވިދާޅުވެފައިވެއެވެ.