Read Time:4 Minute, 10 Second
ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރު އަދި ޑރ. އަޒްމިރަލްދާ ޒާހިރު އާދީއްތަ ދުވަހު ޖުޑީޝަލް ސަރވިސް ކޮމިޝަން (ޖޭއެސްސީ) އަށް ހާޒިރުވުމަށް އަންގައިފައެވެ. މައުލޫމާތު އެނގޭ މީހަކު ކިޔާދިން ގޮތުގައި އަޒްމިރަލްދާ ހާޒިރުވާން އަންގާފައިވަނީ ހެނދުނު 11:00 އަށް ކަމަށްވާއިރު، މަހާޒު ހާޒިރުވާން އަންގާފައިވަނީ މެންދުރުފަހު 13:00 އަށެވެ.
އަދި މި ދެ ފަނޑިޔާރުން ހާޒިރުކުރަނީ ފަނޑިޔާރަކަށް ބިރުދެއްކުމާއި ގުޅޭ ސުލޫކީ މައްސަލައަކާ ގުޅިގެންކަން އެނގިފައި ވެއެވެ. މި މައްސަލަ ޖޭއެސްސީން ވަނީ ބަލަމުންގެންދާ ކަމަށް ވިދާޅުވެފައެވެ. މި ނިންމުން ނިންމީ 2022 ވަނަ އަހަރުގެ އޮކްޓޯބަރު މަހު، ހައި ކޯޓުގެ ކުރީގެ އެސިސްޓެންޓް ރަޖިސްޓްރާ ހުސައިން މުހައްމަދު ހަނީފް ސުޕްރީމް ކޯޓަށް ހާޒިރުކޮށް، ސުޕްރީމް ކޯޓުގެ އޭރުގެ ފަނޑިޔާރު ހުސްނުއްސުއޫދު “ހުތުރު ބަހުން” ވާހަކަ ދެއްކެވި ކަމަށް ބުނާ މަޖިލީހުގައި މަހާޒު އާއި އަޒްމިރަލްދާ ތިއްބެވިކަމަށް ބެލެވޭތީއެވެ.
ސުއޫދުގެ މައްސަލަ ބެލުމަށް ކުރިން ނިންމާފައިވީ ނަމަވެސް، އޭނާ ފަނޑިޔާރުކަމުން އިސްތިއުފާ ދެއްވުމާ ގުޅިގެން އެ މައްސަލަ ކުރިއަށް ނުގެންދިއުމަށް ނިންމާފައިވެއެވެ. ހަނީފްއާ ހުތުރު ބަހުން ވާހަކަ ދެއްކެވި ކަމަށް ބުނާ މައްސަލަ ޖޭއެސްސީން ބަލަން ފެށީ 2022 ގައެވެ. ނަމަވެސް މި މައްސަލައިގައި ކޮމިޝަނުން މިހާތަނަށް ވަކި ގޮތެއް ނިންމާފައެއް ނުވެއެވެ. މައްސަލަ ބެލި ކޮމިޓީން ވަނީ މިއީ ޖޭއެސްސީން ވަކި ގޮތެއް ނިންމަންޖެހޭ މައްސަލައެއް ކަމަށް ހުށަހަޅާފައެވެ.
ޖޭއެސްސީގެ އަޣުލަބިއްޔަތުން ނިންމީ އަޒްމިރާލްދާ އާއި މަހާޒުގެ މައްސަލަ ބެލުމަށެވެ. މި ނިންމުމާ ދެކޮޅަށް ވޯޓު ދެއްވީ ހައި ކޯޓުގެ ފަނޑިޔާރު މުހައްމަދު ނިޔާޒާއި ދަށު ކޯޓުތަކުގެ ފަނޑިޔާރު ފަރުހާދު ރަޝީދެވެ. ހަނީފް ސުޕްރީމް ކޯޓަށް ހާޒިރު ކޮށްފައި ވަނީ ގާނޫނުގައި ބުނާ ހަތް ދުވަހުގެ ތެރޭގައި ނިންމަންޖެހޭ އިސްތިއުނާފްގެ މައްސަލައެއްގައި ބައެއް މަޢުލޫމާތު ހޯދުމަށް ހައި ކޯޓުގައި އެދުމުން އެކަން ނުކޮށް ލަސްވުމުގެ ސަބަބުން މުއްދަތުގެ ތެރޭގައި އިސްތިއުނާފް ނިންމަން ދަތިވި މައްސަލައަކާ ގުޅިގެންނެވެ.
މި ދެ ފަނޑިޔަރުންނާއި ގުޅޭގޮތުން ބަލަމުންދާ މައްސަލަތަކާއި ގުޅިގެން މިހާރުވެސް މި ދެ ފަނޑިޔާރުން ތިބީ ސަސްޕެންޑް ކޮށްފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0