ފަނޑިޔާރުންގެ މައްސަލަ ބަލާ ކޮމެޓީއިން އުޝާމު ތަނާޒުލްވެއްޖެ

Read Time:3 Minute, 35 Second

(ފޮޓޯ ކްރެޑިޓްސް: ވަގުތު)

ޖުޑީޝަލް ސާރވިސް ކޮމިޝަން (ޖޭއެސްސީ) ގައި އޮންނަ ފަނޑިޔާރުންގެ މައްސަލަ ބަލާ ކޮމެޓީއިން އެޓާރނީ ޖެނެރަލް އަހްމަދު އުޝާމް ތަނާޒުލްވެވަޑައިގެންފިއެވެ. އޭނާގެ ބަދަލުގައި އެ ކޮމިޓީއަށް ސިވިލް ސަރވިސް ކޮމިޝަންގެ ރައީސް އަހްމަދު ނާސިހް ވަނީ ހަމަޖައްސާފައެވެ. އުޝާމް މިގޮތަށް ނިންމީ ސަސްޕެންޝަންގައި ހުންނެވި ފަނޑިޔާރު އަޒްމިރާލްދާ ޒާހިރު ޖޭއެސްސީއަށް ސިޓީއެއް ފޮނުއްވުމާ ގުޅިގެންނެވެ. އެ ސިޓީގައި އަޒްމިރާލްދާ ކަންބޮޑުވުން ފާޅުކުރައްވާފައިވަނީ އޭނާގެ މައްސަލަ ބަލާ ކޮމެޓީގައި އެޓާރނީ ޖެނެރަލް ހުންނަވާއިރު، އޭނާގެ މަސްލަހަތު އެ މައްސަލައިގައި ހިމެނޭ ކަމަށެވެ.

“ކޮމިޓީއިން އިސްތިއުފާ ދިނީކީ ނޫން، ފަނޑިޔާރަކު ހުށަހެޅި މައްސަލައެއްގައި އަޅުގަނޑުގެ (ބަންޑާރަނައިބުގެ) މަސްލަހަތު އޮތް ކަމެއް ކަމަށް ބަޔާންކޮށްފައި އޮތުމުން އެ މައްސަލަ ބަލާ ކޮމިޓީގައި އަޅުގަނޑު އިނުމަށް ތަނާޒުލްވާކަން ޖޭއެސްސީއަށް އަންގާފައި މިހާރު ވާނީ.” އުޝާމް ވިދާޅުވިއެވެ.

ޖޭއެސްސީން މިހާރު ބަލަމުންދަނީ ފަނޑިޔާރު އަޒްމިރާލްދާ ޒާހިރު އަދި ފަނޑިޔާރު މަހާޒް އަލީ ޒާހިރުގެ ސުލޫކީ މައްސަލަތަކެކެވެ. އަޒްމިރާލްދާއާ ގުޅޭ ގޮތުން ދެ މައްސަލައެއް ބަލަމުންދާއިރު، އޭގެ ތެރެއިން އެއް މައްސަލައަކީ މަސާޖު ޕާލާއަކުން ހައްޔަރުކުރި އަޒްމިރާލްދާގެ ފިރިމީހާ ޑރ. އިސްމާއިލް ލަތީފްގެ މައްސަލާގައި ފަނޑިޔާރުންތަކަކަށް ނުފޫޒު ފޯރުވި ކަމަށް ބެލެވޭ މައްސަލައެވެ. މީގެ އިތުރުން ހުސްނުއްސުޢޫދުގެ ސުލޫކީ މައްސަލައެއް ވެސް ބެސް ބަލަން ފަށާފައިވީ ނަމަވެސް، އޭނާ ވަނީ އިސްތިއުފާ ދެއްވާފައެވެ.

ފަނޑިޔާރު މަހާޒު އަދި ފަނޑިޔާރު އަޒްމިރާލްދާ އާދިއްތަ ދުވަހު ހެނދުނު 11:00 އަށް ޖޭއެސްސީއަށް ހާޒިރުކުރުމަށް ވަނީ ނިންމާފައެވެ. އަޒްމިރާލްދާގެ ވަކީލު އިބްރާހިމް ޝަމީލް ނެރުނު ނޫސްބަޔާނެއްގައި ވިދާޅުވެފައިވަނީ ސުލޫކީ މައްސަލައެއް ބަލަނީ ނެތް ހާލަތެއް އުފައްދައިގެން ކަމަށެވެ.