އެމްޕީއެލްގެ އޯކްޝަން ޕޯޓަލްއިން، ހިތަދޫ ޕޯޓުގެ ނީލަންތަކުގައި ބައިވެރިވެވޭނެ ހިދުމަތް ތައާރަފްކޮށްފި!

Read Time:3 Minute, 54 Second

(ފޮޓޯ ކްރެޑިޓްސް: ވަގުތު)

މޯލްޑިވްސް ޕޯޓްސް ލިމިޓަޑް (އެމް.ޕީ.އެލް)ގެ އޯކްޝަން ޕޯޓަލްއިން، ހިތަދު ޕޯޓުގެ ނީލަންތަކުގައި ބައިވެރިވެވޭނެ ހިދުމަތް ތައާރަފްކޮށްފިއެވެ. އެމްޕީއެލްއިން ނެރުނު ނޫސްބަޔާނެއްގައި ވިދާޅުވެފައިވަނީ އޯކްޝަން ޕޯޓަލްއިން މިހާރު ހިތަދޫ ޕޯޓުން ހުޅުވާލާ ނީލަންތައް ފެންނާނެ ކަމަށާއި އަދި މިހާރު އޯކްޝަން ޕޯޓަލްގައި ރަޖިސްޓްރީކޮށްފައިވާ ފަރާތްތަކަށް، އިތުރު އެއްވެސް ފީއެއް އަދި ރަޖިސްޓްރޭޝަނަކާއި ނުލައި އެ ހިދުމަތް ލިބިގެންދާނެ ކަމަށެވެ. މީގެ އިތުރުން އެއް ވަގުތެއްގައި ތަފާތު ނީލަންތަކުގައި އެ ކަސްޓަމަރުންނަށް ބައިވެރިވެވޭނެ ކަމަށް ވެސް ވިދާޅުވެފައިވެއެވެ.

އެމްޕީއެލްގެ އޯކްޝަން ޕޯޓަލްއަކީ 2022 ވަނަ އަހަރު ތައާރަފްކުރި ހިދުމަތެކެވެ. މިއީ މާލޭ ވިޔަފާރި ބަނދަރަަަށް ގެނެސް، ގިން ދުވަސްވަންދެން ކްލިއަރނުކޮށް ހުންނަ މުދާ ވިއްކާލަން ބާއްވާ ނީލަންތަކުގައި ވީހާ ވެސް ގިނަ ބަޔަކަށް ލުއި ފަސޭހަގޮތަކަށް ބައިވެރިވުމުގެ ފުރުސަތު ފަހިކޮށްދިނުމުގެ ގޮތުން ތައާރްފްކުރި ހިދުމަތެކެވެ. އޯކްޝަން ޕޯޓަލްގައި މީގެ ކުރިން ބައިވެރިވެވެނީ މާލޭ ވިޔަފާރި ބަނދަރުގެ ނީލަންތަކުގައި އެކަންޏެވެ. އެކަމަކު ހިތަދޫ ޕޯޓްގެ ނީލަންތައް އޯކްޝަން ޕޯޓަލްއަށް އިތުރުކުރުމުން، ރާއްޖޭގެ ކޮންމެ ތަނެއްގައި ހުރެގެން ވެސް ހިތަދޫ ޕޯޓްގެ ނީލަންތަކުގައި ބައިވެރިވެވޭނެއެވެ.

ހިތަދޫ ޕޯޓުގައި ހުންނަ މުދާތައް ގަތުމަށް ނީލާމުގައި އޮންލައިންކޮށް ބައިވެރިވެ، ބިޑްކޮށް ފައިސާ އޮންލައިންކޮށް ދެއްކޭނެ އިންތިޒާމު ވަނީ ހަމަޖެހިފައިއެވެ. މީގެ އިތުރުން ނީލަމުގައި ބައިވެރިވާ ފަރާތެއް އެފަރާތުން ގަންނަން ބޭނުންވާ މުދަލުގެ ހުރިހާ މައުލޫމާތެއް ޕޯޓަލް މެދުވެރިކޮށް ލިބޭނެއެވެ. ހިތަދޫ ޕޯޓަށް ގެންނަ މުދަލުގެ ތެރެއިން އާންމުގޮތެއްގައި ކްލިއާނުކޮށް ގިނަ ދުވަސްވެގެން ނީލަމުގައި ވިއްކާލަނީ މޮޓޯ ވެހިކަލްތަކެވެ.

ކުރިއަށް އޮތް ތަނުގައި ކުޅުދުއްފުށީ ޕޯޓުގެ ނީލަމުގެ ހިދުމަތް ވެސް އޮކްޝަން ޕޯޓަލް މެދުވެރިކޮށް ބައިވެރިވެވޭ ހިދުމަތް ތައާރަފް ކުރުމަކީ އެމްޕީއެލްގެ ވިސްނުމެއް ކަމަށް ވަނީ ވިދާޅުވެފައެވެ.