ކުޑަރިކިލުގައި ކަކުލާ ހަމައަށް ފެންގަނޑު، 9 ގެއަކަށް ފެން ވަދެއްޖެ

Read Time:3 Minute, 38 Second

ރާއްޖޭގެ އެކި ސަރަހައްދުތަކަށް މިހާރު ކުރަމުންދާ ވިއްސާރައިގައި ބ.ކުޑަރިކިލަށް ވާރޭވެހި ބައެއް މަގުތަކާއި ގެތަކުގައި ކަކުލާ ހަމައަށް ފެންގަނޑު ބޮޑުވެއްޖެއެވެ. ކުޑަރިކިލު ކައުންސިލްގެ ރައީސް އަބްދުލްހަންނާން އައްބާސް “ވަގުތަށް” ވިދާޅުވީ އިއްޔެ ހަވީރުން ފެށިގެން ކުރި ވިއްސާރާގައި ގިނަ ގެތަކަކަށް ފެން ވަދެ ހިފައި ގެންގުޅޭ ހުރިހާ ސާމާނަކަށް ގެއްލުންވެފައިވާ ކަމަށެވެ. މިގޮތުން ރަށުގައި 9 ގެއަކަށް ފެންވަދެފައިވާއިރު، ރަށުގެ އަޑި ދިމާލުގައި ހުރި ގެތަކަށް ވަރަށް ބޮޑަށް ފެންގަނޑު ވަތް ކަމަށް އޭނާ ވިދާޅުވިއެވެ.

އަބްދުލްހަންނާން ވިދާޅުވި ގޮތުގައި ރަށުގެ ސްކޫލަށް ވެސް ވަނީ ފެން ވަދެފައެވެ. މިކަމުގެ ސަބަބުން ސުކޫލަށް ވަނީ ވަރަށް ބޮޑެތި ގެއްލުންވެފައިވާ ކަމަށް އޭނާ ވިދާޅުވިއެވެ. ސްކޫލަށް ލިބުނު އެއް ގެއްލުމުގެ ގޮތުގައި ފާހަގަ ކުރެވިފައި ވަނީ ސްކޫލްގެ އާ ކޮމްޕިއުޓަރު ސިސްޓަމްތަކަށްވީ ގެއްލުމެވެ. އަދި ގުރޭޑް 10 ކުލާސްރޫމުގައި ހުރި އާ ޕީސީއަށް ވެސް ވަނީ ގެއްލުން ލިބިފައެވެ.

” އެބައުޅޭ ގާތްގަނޑަކަށް 9 ގެ ފެން ވަދެ، ސުކޫލަށް ވަދެފަ ސުކޫލު އިމާރާތްތަކަށް ވަދެފަ. ދެން ސުކޫލަށް ވަރަށް ބޮޑެތި ގެއްލުންތައްވެފައި.” އަބްދުލްހަންނާން ވިދާޅުފައިވެއެވެ.

ރަށުގެ ފެން ހިއްކުމުގެ މަސައްކަތް ކުރަމުން އަންނަނީ ރަށު ކައުންސިލާއި ފެނަކަ ގުޅިގެންނެވެ. ފެން ހިއްކުމުގެ މަސައްކަތަށް ރަށުގެ އެންމެހާ ރަށްޔިތުން އެއްބާރުލުންދެއެވެ. އަދި މިހާރު ފެން ޕަންޕު ޖައްސައިގެން ވަރަށް ބޮޑު ބައި ހިންދާފައިވާ ކަމަށް އޭނާ ވިދާޅުވިއެވެ.

މީގެ އިތުރުން ހަންނާނު ވިދާޅުވިގޮތުގައި މިހާރު ކުރިން ފެން ވަދެފައިވާ ގެތަކުގައި އިތުރަށް ފެން ވަނަ ނުދިނުމަށްޓަކައި ވެލިގޯނި ޖަހާފައިވެއެވެ. އަދި މީގެ އިތުރުން އެހެން ގެތަކުގައި ވެސް ވެލިގޯނި ޖަހާފައިވެއެވެ. ރާއްޖެއަށް މިހާރު ކުރަމުން އަންނަ ވިއްސާރައިގައި މާލެ އާއި މާލެ ކައިރި ބައެއް ރަށްރަށުގައި ވެސް ވަނީ ފެން ބޮޑުވެފައެވެ.