ސަސްޕެންޑް ކުރި 3 ފަނޑިޔާރުންގެ ހިޔާނާތުގެ ތަހުގީގެއް ފަށައިފި

Read Time:4 Minute, 35 Second

ޖުޑިޝަލް ސާވިސް ކޮމިޝަން (ޖޭއެސްސީ) އިން މިއަދު ސަސްޕެންޑު ކުރި ސުޕްރީމް ކޯޓުގެ ތިން ފަނޑިޔާރުންނާ ގުޅޭ ހިޔާނާތުގެ މައްސަލައެއް އެންޓި ކޮރަޕްޝަން ކޮމިޝަން (އޭސީސީ) އިން ތަހުގީގު ކުރަން ފަށައިފިއެވެ. ސަސްޕެންޑް ކުރި ތިން ފަނޑިޔާރުންނަކީ ޑރ. އަޒްމިރާލްދާ ޒާހިރު، މަހާޒު އަލީ ޒާހިރު އަދި ހުސްނުއްސުއޫދެވެ. ޖޭއެސްސީން ނެރުނު ބަޔާނެއްގައި ބުނެފައިވަނީ މި ފަނޑިޔާރުން ސަސްޕެންޑްކުރަން ނިންމީ އޭސީސީން މި ފަނޑިޔާރުންނާ ގުޅޭ ޖިނާއީ ތަހުގީގެއް ކުރަމުންދާކަން އަންގާފައިވާތީ ކަމަށެވެ.

ޖޭއެސްސީގެ ގާނޫނުގެ 25 ވަނަ މާއްދާގައިވާ ގޮތުން، ތަހުގީގީ އިދާރާއަކުން ފަނޑިޔާރެއްގެ މައްސަލަ ތަހުގީގު ކުރަން ފަށާތާ 48 ގަޑިއިރުގެ ތެރޭގައި އެ ފަނޑިޔާރަކު ސަސްޕެންޑްކުރުމާ މެދު ކޮމިޝަނުން ގޮތެއް ނިންމަންޖެހެއެވެ. ނަމަވެސް، އޭސީސީން ބަލަމުންދާ މައްސަލައިގެ ތަފްސީލެއް އަދި ހާމަކޮށްފައެއް ނުވެއެވެ. މިކަން ހިނގާފައިވަނީ ސުޕްރީމް ކޯޓުގައި މުހިންމު މައްސަލައެއްގެ އަޑުއެހުމެއް ތާވަލުކުރެވިފައިވަނިކޮށެވެ. އެއީ ޕާޓީން ވަކިކުރުމުން މަޖިލީހުގެ ގޮނޑި ގެއްލުވައިލެވޭ ގޮތަށް ގާނޫނުއަސާސީއަށް ގެނެވުނު ބަދަލު ބާތިލުކުރުމަށް އެދި ހުށަހެޅިފައިވާ މައްސަލައެކެވެ. މި މައްސަލައިގެ އަޑުއެހުން ތާވަލުކުރެވިފައިވަނީ މިއަދު ހެނދުނު 11:00 އަށެވެ. ނަމަވެސް، ފަނޑިޔާރުން ސަސްޕެންޑްކުރުމާ ގުޅިގެން މި މައްސަލަ ވަނީ ހުއްޓިފައެވެ.

ކޯޓުތަކުގެ ގާނޫނުގައި ބަޔާންކޮށްފައިވާ ގޮތުން، ސުޕްރީމް ކޯޓުގައި ދުސްތޫރީ މައްސަލައެއް ބެލޭނީ މަދުވެގެން ފަސް ފަނޑިޔާރުން ތިއްބަވާ ބެންޗަކުންނެވެ. މި މައްސަލަ ބަލަމުން ދިޔައީ ހަތް ފަނޑިޔާރުންގެ ފުލް ބެންޗަކުންނެވެ. މިހާރުގެ ހާލަތުގައި، މި ޝަރުތު ފުރިހަމަނުވާތީ، މައްސަލަ ކުރިއަށް ގެންދިއުމަށް މިވަނީ ހުރަސް އެޅިފައެވެ. ގާނޫނުއަސާސީއަށް ގެނެވުނު ބަދަލަށް އަމަލުކުރުން މަޑުޖައްސާލުމަށާއި ފަނޑިޔާރުން ވަކިކުރުން ހުއްޓުވުމަށް އެދި ވަގުތީ އަމުރަކަށް އެދުނީ ކެންދޫ ދާއިރާގެ ކުރީގެ މެމްބަރު އަލީ ހުސެއިނެވެ. ވަގުތީ އަމުރާ މެދު ގޮތެއް ނިންމަން މިއަދު އަޑުއެހުމެއް ތާވަލް ކުރިއިރު، އެ އަޑުއެހުން ފަށަން އޮތީ 11 ޖަހާއިރުއެވެ.

އެ އަޑުއެހުމަށް ވަކީލުން ސުޕްރީމް ކޯޓަށް ވަޑައިގަތެވެ. އެކަމަކު، ކޯޓުން ނިންމީ އަޑުއެހުން ކެންސަލް ކުރާށެވެ. މި ހަފްތާގެ ކުރީކޮޅު، ރައީސް މުޙައްމަދު މުޢިއްޒު ވަނީ ޖޭއެސްސީގެ މެންބަރުކަމުން މުހައްމަދު ސަމީރު ވަކިކުރައްވައި، އޭނާގެ ބަދަލުގައި ޔަޒްމީދު މުޙައްމަދު އައްޔަންކުރައްވާފައެވެ.