ސައުތު އޭޝިއަން ގޭމްސް ޕާކިސްތާންގައި އޮންނާނީ އަންނަ ޖެނުއަރީ މަހު

Read Time:4 Minute, 24 Second

ޕާކިސްތާންގައި މިއަހަރު ބާއްވަން މަސައްކަތްކުރި ސައުތު އޭޝިއަން ގޭމްސް އަންނަ އަހަރުގެ ޖެނުއަރީ މަހު ބާއްވަން ނިންމައިފއެވެ. ސާދަ ވަނަ ސައުތު އޭޝިއަން ގޭމްސްގެ އާ ތާރީޚު ފައިނަލްކޮށްފައިމިވަނީ މިދިޔަ ހޯމަ ދުވަހު ޕާކިސްތާންގެ ލާހޯރުގައި ކުރިއަށްދިޔަ ދެކުނު އޭޝިއާގެ އޮލިމްޕިކް ކައުންސިލް ބައްދަލުވުމުގައެވެ. މި ބައްދަލުވުމުގައި ގޭމްސް ބާއްވާނެ އާ ތާރީޚު ކަނޑައެޅުމުގެ އިތުރުން ގޭމްސްގައި ކުރިއަށްދާނެ ކުޅިވަރުތައްވެސްވަނީ ފައިނަލްކޮށްފައެވެ. ކުރިން މިއަހަރުގެ ފެބްރުއަރީ މަހު ބާއްވަން ތާވަލްކުރި ގޭމްސް މިހާރު ބާއްވަން ނިންމާފައިވަނީ ޖެނުއަރީ 23 އިން 31އަށެވެ. ގޭމްސްގެ އިވެންޓުތައް ކުރިއަށްދާނީ ޕާކިސްތާންގެ އިސްލާމްއާބާދު، ފައިސަލްއާބާދު އަދި ލާހޯރުގައެވެ.

ދެކުނު އޭޝިއާގެ އޮލިމްޕިކް ކައުންސިލްގެ ބައްދަލުވުމުގައި ރާއްޖެއިން ބައިވެރިވެވަޑައިގެންނެވީ މޯލްޑިވްސް އޮލިމްޕިކް ކޮމިޓީގެ ނައިބު ރައީސް އަހުމަދު މުންތަގިމް އާއި ސެކެޓްރީ ޖެނެރަލް ތަމޫހު އަހުމަދު ސައީދުއެވެ. ސާދަ ވަނަ ސައުތު އޭޝިއަން ގޭމްސްގައި ޖުމްލަ 27 ކުޅިވަރެއްވަނީ ހިމަނާފައެވެ. އޭގެ ތެރޭގައި ދިވެހިރާއްޖެއިން ވާދަކުރާނެ ކުޅިވަރުތައް ފައިނަލް ކުރާނީ ކަމާ ގުޅުންހުރި އެސޯސިއޭޝަންތަކާ މަޝްވަރާކުރުމަށްފަހުގައެވެ. މިފަހަރު ހިމެނުނު ކުޅިވަރުތަކަށް ބަލާއިރު، މުޅިން އަލަށް ބިލިއާޑް އަދި ސްނޫކަރ ހިމަނާފައިވާއިރު، ބީޗް ހޭންޑްބޯޅަވެސް މިފަހަރު ވަނީ ހިމަނާފައެވެ. ގޭމްސްގައި ދެން ހިމަނަން ނިންމާފައިވާ ކުޅިވަރުތަކަކީ ފެތުން، އާޗަރީ، އެތުލެޓިކްސް، ބެޑްމިންޓަން، ބޮކްސިން، ފެންސިން، ގޮލްފް، ޖޫޑޯ، ކަރާޓޭ، ޝޫޓިން، ސްކްއޭޝް، ޓޭބަލް ޓެނިސް، ޓައެކްވެންޑޯ، ޓެނިސް، ޓްރައިތަލޯން، ވެއިޓް ލިފްޓިން، ރެސްލިން، ވޫޝޫ، ބާސްކެޓްބޯޅަ 3 އޮން ތްރީ އަދި ފައިވް އޮން ފައިވް، ކްރިކެޓް، ފުޓްބޯޅަ، ހޭންޑްބޯޅަ، ހޮކީ، ކަބައްޑީ، ރަގްބީ، ވޮލީބޯޅަ، ބީޗް ވޮލީބޯޅަ އަދި ރޯވިން އެވެ.

އެންމެ ފަހުން ސައުތު އޭޝިއަން ގޭމްސް އޮތީ 2019ގައެވެ. ނޭޕާލްގައި އޮތް ގޭމްސްއަކީ ރާއްޖެއަށް އެންމެ ގިނަ މެޑަލް ލިބުނު ސަރަހައްދީ ގޭމްސްއެވެ. މިގޮތުން ފަސް މެޑަލް ރާއްޖޭގެ ޓީމްތަކުން ހޯދިއެވެ. އެއީ ދުވުންތެރިޔާ ހަސަން ސާއިދު 100 މީޓަރު ދުވުމުން ހޯދި ރަން މެޑަލް އާއި 200 މީޓަރު ދުވުމުން ހޯދި ލޯ މެޑަލް، އަންހެން ޓޭބަލް ޓެނިސް ޓީމާއި އަންހެން ފުޓްބޯޅަ ޓީމުން އަދި އަންހެން ބާސްކެޓްބޯޅަ ޓީމުން ހޯދި ލޯ މެޑަލްއެވެ.