އަޒާން، ޕީއެންސީގެ ޕީޖީ ވަޓްސްއެޕް ގްރޫޕުން ބޭރުކޮށްފި

Read Time:4 Minute, 39 Second

(ފޮޓޯ ކްރެޑިޓްސް: ރައްޔިތުންގެ މަޖިލިސް)

ސުޕްރީމް ކޯޓުގެ ފަނޑިޔާރުންގެ އަދަދު މަދުކުރަން ކޯޓުތަކާ ބެހޭ ގާނޫނަށް ހުށަހެޅި އިސްލާހު ބަލައިގަތުމަށް ރައްޔިތުންގެ މަޖިލީހުގައި އިއްޔެ ވޯޓު ނެގި ވަގުތު މަޖިލީހަށް ވަޑައިނުގަތް މައްސަލައިގައި ހިތަދޫ މެދު ދާއިރާގެ މެމްބަރު އަހުމަދު އަޒާން މަރްޒޫގު ޕީއެންސީ ޕީޖީގެ ވަޓްސްއެޕް ގްރޫޕުން ބޭރުކޮށްފިއެވެ. ސުޕްރީމް ކޯޓުގެ ފަނޑިޔާރުންގެ ބެންޗްގެ އަދަދު ހަތަކުން ފަހަކަށް މަދުކުރަން ގާނޫނަށް އިސްލާހު ގެނައުމުގެ ބިލް ބަލައިގަތުމަށް ވޯޓު ދިނުމަށް ޕީއެންސީގެ ޕީޖީ ގްރޫޕުން އޮތީ ތްރީ ލައިން ވިޕެއް ނެރެފައެވެ. އެއީ ޕީއެންސީގެ ލީޑަޝިޕުން އެ ބިލް ފާސްކުރަން ނިންމާފައި އޮތުމުންނެވެ.

މަޖިލިހުގެ މެޖޯރިޓީ ލީޑަރު އަދި އިނގުރައިދޫ ދާއިރާގެ މެމްބަރު ފަލާހް ވިދާޅުވީ ދެ މެމްބަރުން ވޯޓުގައި ބައިވެރިނުވި ސަބަބު ޕީޖީގެ ލީޑަޝިޕުން ބަލަމުންދާ ކަމަށް އޭނާ ވިދާޅުވިއެވެ. ފަލާހްގެ ޓުވީޓުގައި އެއީ ކޮން ދެ މެމްބަރުންނެއް ކަމެއް ވިދާޅެއް ނުވެއެވެ. އެކަމަކު “ވަގުތަށް” އެނގިފައިވާ ގޮތުގައި އެ މެމްބަރުންނަކީ ހިތަދޫ މެދު ދާއިރާގެ މެމްބަރު އަހުމަދު އަޒާން މަރްޒޫގާއި އިހަވަންދޫ ދާއިރާގެ ޕީއެންސީގެ މެމްބަރު އަހްމަދު ނަސީރެވެ. އެ ދެ މެމްބަރުން މަޖިލިހަށް އިއްޔެ ހެނދުނު ވަޑައިގަތެވެ. އެކަމަކު، ވޯޓު ގަޑީގައި އެ ބޭފުޅުން މަޖިލިހުގެ ތަޅުމުގައި ނެތް މައްސަލަ ވަނީ ބޮޑުވެފައެވެ.

ސްޕްރީމް ކޯޓުގެ ފަނޑިޔާރުންގެ އަދަދު މަދު ކުރުމަށް ސަރުކާރުން ހުށަހެޅި ބިލް ޖުޑީޝަރީ ކޮމިޓީން އިއްޔެ ހަވީރު ވަނީ ފާސްކޮށްފައެވެ. ބިލުގައި ބަޔާންކޮށްފައިވާ ގޮތުން، ފަނޑިޔާރުން ވަކިކުރެވޭނީ ޖުޑީޝަލް ސަރވިސް ކޮމިޝަނުން ހުށަހަޅައި، މަޖިލީހުގެ 2/3 އަޣުލަބިއްޔަތުން ފާސްވުމުންނެވެ. އަދި ޖޭއެސްސީން ވަކިކުރާ ފަނޑިޔާރުންގެ ނަންތައް ބިލަށް ޢަމަލުކުރަން ފަށާތާ ފަސް ދުވަހުގެ ތެރޭގައި މަޖިލީހަށް ހުށަހަޅަންޖެހެއެވެ. މަޖިލީހުން ހަތް ދުވަހުގެ ތެރޭގައި މިކަމާމެދު ގޮތެއް ނިންމަންޖެހޭނެއެވެ.

ފެހި ގާނޫނުއަސާސީގެ ދަށުން އެކުލަވާލެވުނު އިންތިގާލީ ސުޕްރީމް ކޯޓުގައި ފަސް ފަނޑިޔާރުން ތިއްބެވިއެވެ. 2010 ގައި ހަތް ފަނޑިޔާރުންގެ މައްޗަށް ދާއިމީ ކޯޓެއް އުފެދުނެވެ. 2014 ގައި އަދަދު ފަހަކަށް މަދުކުރެވުނު ނަމަވެސް، 2019 ގައި އަނެއްކާވެސް ހަތަކަށް އިތުރުކުރެވުނެވެ. މިހާރު ސުޕްރީމް ކޯޓުގައި ތިއްބެވީ އުއްތަމަ ފަނޑިޔާރު އަހްމަދު މުއުތަސިމް އަދުނާންއާއި އިތުރު ހަ ފަނޑިޔާރުންނެވެ. މި ބިލު ފާސްވެއްޖެނަމަ، ސުޕްރީމް ކޯޓުގެ އޮނިގަނޑަށް ބޮޑު ބަދަލެއް އަންނާނެއެވެ.