Read Time:5 Minute, 22 Second
(ފޮޓޯ ކްރެޑިޓްސް: ވަގުތު)
ނ. ހޮޅުދޫގައި މިދިޔަ އަހަރު ސެޕްޓެމްބަރު މަހު ޒަހަމްތަކަކާއެކު ނިޔާވެފައި އޮއްވާ ފެނުނު ޒަކިއްޔާ މޫސާގެ ނިޔާވެފައި އޮތީ އާދައިގެ ގޮތަކަށް ނޫން ކަމަށާއި، މި މަރުގެ ތަހުގީގަށް ވަގުތު ނަގަނީ އެހެންވެގެން ކަމަށް ކޮމިޝަނާ އޮފް ޕޮލިސް އަލީ ޝުޖާއު އިއްޔެ ވިދާޅުވެއްޖެއެވެ. ޒަކިއްޔާގެ މަރުގެ މައްސަލައިގައި އެރަށު ރައްޔިތުންގެ ބޮޑެތި ކަންބޮޑުވުންތަކެއް އެބަހުއްޓެވެ. މިއާއެކު އެރަށުގައި މުޒާހަރާތަކެއްވެސް ދަނީ ކުރަމުންނެވެ.
މި މަރުގެ މައްސަލައާ ގުޅިގެން ދާހިލީ ސަލާމަތާއި ފަންނިޔަތާއި ބެހޭ ވަޒީރު އަލީ އިހުސާނާއި ޝުޖާއުވެސް މިހާރު އެރަށުގައި ހަރަކާތްތެރިވަމުންދާއިރު، ރޭގައި އެރަށު ރައްޔިތުންނާ ބައްދަލު ކުރައްވާ ޝުޖާއު ވިދާޅުވީ މި މައްސަލައަަށް ހަތް މަސް ވާން ކައިރިވެފައިވާއިރު މައްސަލައިގައި ނަފްސާނީ އިލްމުވެރިންނާއި، ތަޖުރިބާކާރުންނާއެކު މަސައްކަތްތަކެއް ކުރެވެމުންދާ ކަމަށެވެ.
“އަޅުގަނޑަށްވެސް އެނގޭ މި ތަހުގީގުގައި ހަތް މަސްވަނީމީ، އެނގިލައްވާނެ މި ތަހުގީގުގައި އަޅުގަނޑުމެން ވަކި ގޮތެއް ނިންމާ ވަކި ގޮތެއް ހަދާނަމަ، މިހާރު ދުވަހެއް މިއަކަށް ނަގާކަށް ނުޖެހޭނެ، އެހެން ނަމަވެސް މީގައި ދުވަސްވެސް މި ނަގަނީ މިކަމުގައި ހުރި ހައްްސާސްކަމާއި އަދި މި ދެންނެވި ގޮތަށް ހުދު އަޅުގަނޑުމެންނަށްވެސް މި މަރުވެފައި އޮތް ގޮތް އެއީ އާދައިގެ ގޮތަކަށް މަރުވެފައި އޮތް ކަމަށް ގަބޫލު ނުކުރެވޭތީވެ، އޭގެ ހަގީގަތް ހޯދުމަށްޓަކައި ކުރާ މަސައްކަތް، މި މަސައްކަތަށް ވަގުތު މި ނަގަނީ،”. ޝުޖާއު ވިދާޅުވިއެވެ.
އަދި މި ތަހުގީގު ނިންމާފައި ފެންނަ އެއްޗެއް ހާމަކުރައްވާނެ ކަަމަށްވެސް ޝުޖާއު ވިދާޅުވިއެވެ. އުމުރުން 50 އަހަރުގެ ޒަކިއްޔާގެ ބޮޑެތި ޒަހަމްތަކަކާއެކު ނިޔާވެފައި އޮއްވާ ފެނުނީ އޭނާ ދިރިއުޅުނު ގޭގެ ބަދިގެ ފަރާތުގައި ހުންނަ ގުދަނެއްގެ ކައިރިން ސެޕްޓެމްބަރު 10 ވަނަ ދުވަހުގެ ހެނދުނު 10:00 ހާއިރުއެވެ. އޭނާ އަކީ ޑިޕްރެޝަނަށް ފަރުވާ ހޯދާ މީހަކަށް ވާތީ އެންމެ ފުރަތަމަ އޭނާ މަރުވީ އަމިއްލައަށް ކަމަށް އަޑު ފެތުރުނު ނަމަވެސް، ފުލުހުން ޖިނާއީ ތަހުގީގެއް ކުރިއަށް ގެންދިޔައެެވެ.
އޭނާގެ ކަރުގައި ޒަޚަމްތަކެއް ހުރުމާއި، ކައިރީގައި ވަޅިއެއް އޮތުމުން މި މަރާމެދު ޝައްކުތަކެއް އުފެދުނެވެ. ރަށުގެ ގިނަ ބަޔަކު ޒަކިއްޔާ މަރާލީ ކަމަށް ތުހުމަތުކުރާއިރު، އެފަދަ ހެއްކެއް އަދި ނުލިބޭ ކަމަށް ފުލުހުން ވިދާޅުވެފައިވެއެވެ. ފުލުހުން ކުރިން ދީފައިވާ މައުލޫމާތުގައި، ޒަކިއްޔާގެ ހަށިގަނޑުން މީހަކު ދޭ ޒާތުގެ އަނިޔާއެއް ނުފެންނަ ކަމަށް ޕެތޮލޮޖިސްޓް ޑޮކްޓަރަކު ލަފާދީފައި ވެއެވެ. ނަމަވެސް ޒަކިއްޔާ މަރުވީ އަމިއްލައަށްކަން ނުވަތަ މީހަކު މަރާލީކަން ފުލުހުން އަދި މުޅީން ނުނިންމައެވެ.
މި މައްސަލައިގައި އެންމެ ފަހުން ފުލުހުން ހިއްސާ ކުރި މައުލޫމާތަށް ބަލާއިރު، މައްސަލަ ތަހުގީގުކުރުމަށް އެމެރިކާގެ ތަހުގީގީ އިދާރާ އެފްބީއައިގެ އެހީތެރިކަން ހޯދަން ވަނީ ފަށައިފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0