އަތޮޅުގެ ހުރިހާ ރަށެއްގައި އޭޓީއެމް ގާއިމުކުރި ފުރަތަމަ އަތޮޅަށް ދ. އަތޮޅު

Read Time:4 Minute, 1 Second

(ފޮޓޯ ކްރެޑިޓްސް: ވަގުތު)

ދ.އަތޮޅުގެ ހުރިހާ ރަށެއްގައި ސެލްފް ސާވިސް ބޭންކިން ޚިދުމަތް ގާއިމުކޮށް ރާއްޖޭގެ ތާރީޚުގައިވެސް ވަކިން އޮންނަ އަތޮޅުތަކުގެ ތެރެއިން އޭޓީއެމްގެ ޚިދުމަތް ލިބޭ ފުރަތަމަ އަތޮޅަކަށް ދ.އަތޮޅުވެފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.

ރައީސް މިހާރު ދ. އަތޮޅުގެ ރަށްތަކަަަށް ކުރައްވަމުންގެންދަވާ ދަތުރުފުޅުގެ ތެރެއިން އެ އަތޮޅު ހުޅުދެލީ ރައްޔިތުންނާއި ބައްދަލުކޮށް ރައީސް ވިދާޅުވީ އެމަނިކުފާނު ރިޔާސީ އިންތިހާބުގައި ރައްޔިތުންނަށް ވެވަޑައިގެންފައިވާ ވައުދުފުޅުތައް ފުއްދެވުމުގައި ކުރިޔަށް އޮތީ އަމަލީ މަސައްކަތުގެ މޫސުން ކަމަށެވެ.

“ރިޔާސީ އިންތިހާބުގައި ވީ ވައުދުތައް ފުއްދުމުގައި ދިމާވި ދަތިތަކުން އަރައިގަތުމަށްޓަކައި ވި ތައްޔާރީ ކަމުގައި ދެންނެވިދާނެ. މިހާރު މިއޮތީ އަމަލީ ގޮތުން ވައުދުތައް ފުއްދުމުގެ މޫސުން އައިސްފައި.” ރައީސް ވިދާޅުވިއެވެ.

އެގޮތުން ހުޅުދެލީ ރައްޔިތުންނަށްވި ވައުދުތައް ފުއްދުމުގެ ފެށުމަކީ މިއަދު ހުޅުވިގެންދިޔަ އޭޓީއެމް ކަމަށް ރައީސް ވިދާޅުވިއެވެ. ހުޅުދެލީގައި ސެލްފް ސާވިސް ބޭންކިން ޚިދުމަތް ފެށިގެން ދިޔުމާއެކު މި އަތޮޅު ތާރީހުގެ ތެރެޔަށް ވަދެގެން ދިޔަ ކަމަށް އެމަނިކުފާނު ވަނީ ވިދާޅުވެފައެވެ.

“މިއަތޮޅު ވަދެގެން އެދިޔައީ ތާރީޚުގެ ތެރެއަށް. އެއީ ވަކިވަކިން ހުންނަ އަތޮޅުތަކުގެ ތެރެއިން، އެއް އަތޮޅެއްގެ ހުރިހާ ރަށެއްގައި އޭޓީއެމްގެ ބޭންކިން ޚިދުމަތް ގާއިމުވެގެންދިޔަ ފުރަތަމަ އަތޮޅަށް ދ އަތޮޅު ވެގެން މިދިޔައީ.” ރައީސް ވިދާޅުވިއެވެ.

މި މަސައްކަތުގައި ބޭންކް އޮފް މޯލްޑިވްސްގެ ވަރަށް ބޮޑު އެއްބާރުލުމެއް ސަރުކާރަށް ލިބިގެން ދިޔަކަން ފާހަގަކުރައްވަމުން ރައީސް ވަނީ ބީއެމްއެލްއަށް ޝުކުރު ދަންނަވާފައެވެ. ރައީސް ވިދާޅުވީ މިއަހަރަކީ މިގޮތަށް ހުރި ގިނަ ކަންތައްތަކަށް އަމަލީ ސިފަ ލިބިގެންދާނެ އަހަރެއް ކަމަށާއި އެމަނިކުފާނު ރައްޔިތުންނަށް ވެވަޑައިގެންނެވި ވައުދުތައް ރަނުން ރަނަށް ފުއްދަވައި ދެއްވާނެ ކަމަށެވެ. މި އަހަރު ނިމެންވާއިރަށް ރާއްޖޭގެ ހުރިހާ ރަށެއްގައި ބީއެމްއެލްގެ އޭޓީއެމްއެއް ބެހެއްޓުމަކީ ސަރުކާރުގެ އަމާޒެކެވެ.