ރިނބުދޫ ކައުންސިލުން އެދުނީ ސްޕޯޓްސް ފިޝިންއަށް ކަނދުފައްޗެއް ބޭނުން ކަމަށް

Read Time:4 Minute, 22 Second

(ފޮޓޯ ކްރެޑިޓްސް: ރައީސް އޮފީސް)

ދ. ރިނބުދޫ ކައިރީގައި ސްޕޯޓްސް ފިޝިންނަށް ކަނދުފައްޗެއް ގާއިމްކޮށް ދިނުމަށް އެ ރަށު ކައުންސިލުން އެދިއްޖެއެވެ. ކައުންސިލުން އެކަމަށް އެދިފައިވަނީ ރައީސް ޑރ. މުހައްމަދު މުއިއްޒު، ރިނބުދޫ ކައުންސިލާއި، އ.ތ.މ ކޮމިޓީ އަދި ރަށުގެ ބައެއް މުއައްސަސާތަކުގެ އިސްވެރިންނާއި އެކު ބޭއްވެވި ބައްދަލުވުމުގެ ތެރެއިންނެވެ. އެ ބައްދަލުކުރެއްވުން ކުރިއަށްދިޔައީ ރިނބުދޫ ސްކޫލުގައެވެ. މިއަދު ހެނދުނު ކުރިއަށްދިޔަ އެ ބައްދަލުކުރެއްވުމުގައި ކައުންސިލުން ވަނީ ރައްޔިތުން އެންމެ އެދޭކަންކަން ރައީސްއާ ހިއްސާކުރައްވާފައެވެ. އެގޮތުން ކައުންސިލުން ވަނި، ސްކޫލާއި، ސިއްހީ މަރުކަޒު އަދި މިސްކިތުގެ ޖާގައިގެ ދަތިކަމަށް ހައްލެއް ހޯއްދަވައިދެއްވުމަށާއި، ކަރަންޓުގެ މައްސަލައަށް ހައްލެއް ހޯއްދަވައިދެއްވުމަށާއި، ރަށްގިރުމުގެ މައްސަލައަށް ހައްލެއް ބޭނުންވާކަމުގައި ފާހަގަކުރައްވާފައެވެ. ހަމައެއާއެކު ރަށުގެ ޒުވާނުން ސްޕޯޓްސް ފިޝިން އަށް ޝައުގުވެރިކަން ހުންނަކަން ފާހަގަކުރައްވައި ސްޕޯޓްސް ކަނދުފައްޗެއް ރަށް ކައިރީގައި ގާއިމުކޮށްދެއްވުމަށް ކައުންސިލުން އެދިވަޑައިގެންނެވިއެވެ.

އެ ބައްދަލުކުރެއްވުމުގައި އަންހެނުންގެ ތަރައްވީއަށް މަސައްކަތްކުރާ ކޮމިޓީގެ މެންބަރުން ވަނީ ބަޖެޓުގެ ދަތިކަން ހުރުމުން މަސައްކަތްތައް ކުރިއަށްގެންދިއުމަށް ގޮންޖެހުންތަކެއް ކުރިމަތިވާކަން ފާހަގަކުރައްވާފައެވެ. ރައީސް ވަނީ މިއަދުގެ ބައްދަލުކުރެއްވުމުގައި ބައިވެރިވެވަޑައިގެންނެވި ބައެއް ވަޒީރުންނާއި، ބައެއް ކުންފުނިތަކުގެ ވެރިން މެދުވެރިކުރައްވައި ރިނބުދޫގައި ހިންގާ ތަރައްގީގެ މަޝްރޫއުތަކާއި ރައްޔިތުންގެ ކަންބޮޑުވުންތަކަށް ހައްލުހޯއްދެވުމަށް ސަރުކާރުން ކުރައްވާ މަސައްކަތްތަކުގެ އަދާހަމަ މައުލޫމާތު ހިއްސާކުރައްވާފައެވެ. އަދި އެ ބައްދަލުކުރެއްވުމުގައި އެމަނިކުފާނު ވަނީ އތމ ކޮމިޓީއަށް ދިމާވެފައިވާ ބަޖެޓުގެ ދަތިކަން ހައްލުކޮށްދެއްވުމަށް ކުރެއްވޭނެކަންކަން ބައްލަވާނެކަމުގައި ވިދާޅުވެފައެވެ.

އެ ބައްދަލުކުރެއްވުމުގެ ކުރިން ރައީސް ވަނީ ރިނބުދޫގައި ބެންކް އޮފް މޯލްޑިވްސްއިން އަލަށް ގާއިމުކުރި އޭޓީއެމް ހުޅުއްވައިދެއްވާފައެވެ. އަދި އެމަނިކުފާނު ވަނީ ރިނބުދޫގައި އަލަށް ގާއިމުކުރާ ކައުންސިލް އިދާރާގެ ބިންގާ އެޅުމުގެ ރަސްމިއްޔާތުގައި ބައިވެރިވެވަޑައިގެންފައެވެ.