ކުވައިތާއި ރާއްޖޭގެ ގުޅުމަކީ އިސްލާމީ އަގީދާގެ މައްޗަށް ބިނާވެފައިވާ ގުޅުމެއް: ރައީސް

Read Time:3 Minute, 56 Second

(ފޮޓޯ ކްރެޑިޓްސް: ރައީސް އޮފީސް)

ކުވައިތާއި ރާއްޖޭގެ ގުޅުމަކީ އިސްލާމީ އަގީދާ އާއި އެއްބައިވަންތަ ކަމުގެ މައްޗަށް ބިނާވެފައިވާ ގުޅުމެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. ރައީސް މިހެން ވިދާޅުވީ ކުވައިތުގެ ގައުމީ ދުވަހާއި މިނިވަން ދުވަހުގެ މުނާސަބަތުގައި އަމީރު ޝައިހް މެޝާލް އަލްއަހްމަދު އަލްޖާބިރު އަލްސަބާޙްއަށާއި، ބޮޑުވަޒީރު ޝައިހް އަހްމަދު އަބްދުﷲ އަލްއަހްމަދު އަލްސަބާހްއަށް ފޮނުއްވި ސިޓީފުޅެއްގައެވެ. ރައީސް އޮފީހުން ވިދާޅުވީ އެ ސީޓީފުޅުގައި ކުވައިތުގެ ސަރުކާރަށާއި ރައްޔިތުންނަށް، އިހްލާސްތެރިކަމާއެކު ގައުމީ ދުވަހާއި މިނިވަން ދުވަހުގެ ތަހުނިޔާ އާއި ހެޔޮއެދުންތައް ރައީސް ފޮނުވައްވާފައިވާ ކަމަށެވެ.

ރައީސް މުއިއްޒު ކުވައިތުގެ އަމީރާއި ބޮޑުވަޒީރަށް ވަކިވަކީން ފޮނުއްވި ސިޓީފުޅުގައި، ރާއްޖެއާއި ކުވައިތާ ދެމެދުގައި އޮތް ޒަމާންވީ ގާތް ރަހުމަތްތެރިކަމުގެ ގުޅުމަކީ، އިސްލާމީ އަގީދާއާއި، އެއްބައިވަންތަ ކަމުގެ މައްޗަށް ބިނާވެފައިވާ ގުޅުމެއްކަން ފާހަގަކުރެއްވި ކަމަށް ރައީސް އޮފީހުން ވިދާޅުވިއެވެ. އަދި ކުރިއަށް އޮތް އަހަރުތަކުގައިވެސް ދެ ގައުމުގެ ރައްޔިތުންގެ ލާބައާއި މަންފާއަށްޓަކައި ދެ ގައުމުގެ ގުޅުން އިތުރަށް ބަދަހިވެގެންދާނެކަމުގެ ޔަގީންކަން އެބައޮތްކަމުގައި ރައީސް ވިދާޅުވި ކަމަށެވެ.

އޭގެ އިތުރުން، ކުވައިތުގެ އަމީރާއި ބޮޑުވަޒީރަށް ދުޅަހެޔޮ ޞިއްޙަތަކަށް އެދިވަޑައިގެން، ކުވައިތުގެ ރައްޔިތުންގެ ކުރިއެރުމާއި ތަނަވަސްކަމަށް ރައީސް ވަނީ އެދިވަޑައިގެންފައި ކަމަށް ރައީސް އޮފީހުން ވިދާޅުވެއެވެ. ކުވައިތުގެ ގައުމީ ދުވަހުގެ ގޮތުގައި ފާހަގަކުރަނީ ފެބުރުވަރީ 25 ވަނަ ދުވަހެވެ. އަދި އެ ގައުމުގެ މިނިވަން ދުވަހުގެ ގޮތުގައި ފާހަގަ ކުރަނީ ފެބުރުވަރީ 26 ވަނަ ދުވަހެވެ. ގައުމީ ދުވަސް ފާހަގަކުރަނީ 1950 ވަނަ އަހަރު ކުވައިތުގެ ކުރީގެ އަމީރު ހިޒް ހައިނަސް ޝައިޚް އަބްދުﷲ އަލް ސަލީމް އަލްސަބާހް، ރަސްކަމަށް އިސްވެވަޑައިގަތުމުގެ ހަނދާން އައުކުރުމުގެ ގޮތުންނެވެ. ފެބްރުއަރީ މަހުގެ 26 ވަނަ ދުވަހަކީ 1991 ވަނަ އަހަރު، ކުވައިތަށް އަލުން މިނިވަންކަން ލިބުނު ދުވަހެވެ.