ރިނބުދޫގައި ރަންރިހީގެ މަސައްކަތް ދަސްކޮށްދޭ ނިޒާމެއް ގާއިމްކޮށްދޭނަން: ރައީސް

Read Time:7 Minute, 18 Second

(ފޮޓޯ ކްރެޑިޓްސް: ވަގުތު)

ދ. ރިނބުދޫގައި ރަންރިހީގެ މަސައްކަތް ދަސްކޮށްދޭނެ ނިޒާމެއް ގާއިމްކޮށްދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. ރައީސް އެހެން ވިދާޅުވީ ދ. އަތޮޅަށް މިހާރު ކުރައްވަމުންދާ ދަތުރުފުޅުގެ ތެރެއިން މިއަދު ރިނބުދޫއަށް ވަޑައިގެން ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރިނބުދޫއަށް ބަލާއިރު ކުރަން ޖެހޭ މުހިންމު ކަންތައްތަކެއް އެބަހުރި ކަމަށް ރައީސް ވިދާޅުވިއެވެ. އެކަންކަމަކީ މުހިންމު ކަންކަން ކަމަށް ދެކިގެން އެކަންކަން ކުރިއަށް ގެންދަވާނެ ކަމަށް ވިދާޅުވިއެވެ. އެގޮތުން އެންމެ މުހިންމު ކަމަކީ ސްކޫލްގެ ދަތިކަމަށް ހައްލު ހޯދައިދިނުން ކަމަށް ވިދާޅުވިއެވެ. އެ މައްސަލައަށް ހައްލެއް ގެނައުމަކީ ރަށުގެ ރައްޔިތުންނަށާއި ސްކޫލް ދަރިވަރުންނަށާއި ބެލެނިވެރިންނަށް ވަރަށް މުހިންމު ކަމެއް ކަމަށް ވިދާޅުވިއެވެ.

(ފޮޓޯ ކްރެޑިޓްސް: ވަގުތު)

ރައީސް ވިދާޅުވީ ހަ ކްލާސްރޫމް ހިމެނޭ ގޮތަށް ކޮމްޕިއުޓާ ލެބާއި ލައިބްރަރީ ފަދަ ތަންތަން ވެސް ހިމެނޭ ގޮތަށް ސްކޫލް އިންފްރާސްޓްރަކްޗާ މަޝްރޫއެއް މެއި މަހުގެ ތެރޭގައި އަމަލީ ގޮތުން އެ ރަށުގައި ފައްޓަވައިދެއްވާނެ ކަމަށެވެ. އެ މަސައްކަތް ހަވާލުކުރާނީ ސަރުކާރުގެ ކުންފުންޏަކާ ކަމަށް ވިދާޅުވިއެވެ. އޭގެ ނަތީޖާއަކަށް ވާނީ ސީދާ ފިނޭންސް މިނިސްޓްރީން އެ ކުންފުނިތަކަށް މަސައްކަތް ބާރަށް ކުރިއަށް ގެންދިއުމަށް ބޭނުންވާ ކަންކަން ފަހިކޮށްދެވިގެންދިއުން ކަމަށް ވިދާޅުވިއެވެ.

“މި ރަށުގައި ހުރި މިސްކިތަކީ 1992 ވަނަ އަހަރު އަޅާފައިވާ މިސްކިތެއް ކަމަށް ކައުންސިލުން ވިދާޅުވި. މިހާ ދުވަސްވިއިރު ވެސް ރަށުގައި އެހެން މިސްކިތެއް ނޭޅި މި ހުރީ. މާތް ވެގެންދާ އިސްލާމް ދީނުގައި ފައިތިލަ ސާބިތުކޮށްގެން ތިބި މުސްލިމުންނަށް އަޅުގަނޑުމެން ވާއިރު ރަށްރަށުގައި ފެންވަރުގެ މިސްކިތް އެޅިފައި ހުންނަން ވާނެ ކަމަށް އަޅުގަނޑު ގަބޫލްކުރަނީ. މި އަހަރުގެ ބަޖެޓްގެ ތެރެއިން ރިނބުދޫގައި 500 މީހުންގެ މިސްކިތެއް އެންމެ ލަސްވެގެން ޖުލައި މަހުގެ ތެރޭގައި އަޅަން ފަށާނެ ކަމުގެ ޔަގީންކަން ދެން.” ރައީސް ވިދާޅުވިއެވެ.

ސިއްހީ ދާއިރާއަކީ ބަޖެޓްގެ ތެރެއިން އިސްކަންދޭ ދާއިރާއެއްކަން ފާހަގަކުރައްވަމުން ރައީސް ވިދާޅުވީ ސިއްހީ މަރުކަޒުގެ އެކި ކަހަަލަ ކަންކަން ހައްލުކުރަން އެބަހުރި ކަމަށެވެ. އެތަނުގެ ޖާގަ ދަތިވެފައި ވަސީލަތްތައް ވެސް މަދު އިރު، މުވައްޒަފުން ވެސް މަދު ކަމަށް އެމަނިކުފާނު ވިދާޅުވިއެވެ. އެހެންކަމުން މި އަހަރުގެ ތެރޭގައި ސިއްހީ މަރުކަޒުގެ ޖާގަ އާއި ވަސީލަތްތަކާއި މުވައްޒަފުން ހަމަކުރުމުގެ މަޝްރޫއެއް ކުރިއަށް ގެންދަވާނެ ކަމަށް ވިދާޅުވިއެވެ.

(ފޮޓޯ ކްރެޑިޓްސް: ވަގުތު)

ރައީސް ރިނބުދޫއަށް ވައުދުވެވަޑައިގެންނެވި އިތުރު ކަންތައްތައް:

ޒުވާނުންގެ މަރުކަޒެއް އަޅައިދިނުން
ގޯތީގެ މައްސަލަ ހައްލުކުރުމަށް ދިރާސާކޮށް ހައްލު ހޯދައިދިނުން
އާރްޓީއެލްގެ ހިދުމަތް ގާއިމްކޮށްދިނުން
ކަރަންޓުގެ މައްސަލަ ހައްލުކޮށްދިނުން

އޭގެ އިތުރުން ރައީސް ޑރ. މުއިއްޒު ވިދާޅުވީ ރަންރިހީގެ އަތްތެރިކަމުގެ މަސައްކަތަކީ ރިނބުދޫއަށް ހާއްސަކަމެއް ކަމަށެވެ. ދިވެހި ގައުމިއްޔަތު އިއާދަކުރުމުގެ މަޝްރޫއުގެ ތެރޭގައި ދިވެހި އައިޑެންޓިޓީ ހިމާޔަތްކުރުން ހިމެނޭ ކަމަށް ވިދާޅުވިއެވެ. ދިވެހިން ކުރިން އުޅެމުން ދިޔަ ގޮތް އިއާދަކުރުމާއި އުޅުމާއި އާދަކާދަ ނެތިގެން ދިޔަ ނުދީ އާލާކުރުން ހިމެނޭ އިރު، އޭގެ ތެރެއިން އެއް ކަމަކީ ރަންރިހީގެ މަސައްކަތް ކަމަށް ވިދާޅުވިއެވެ. ރައީސް ވިދާޅުވީ އެ ރަށުގައި އެ މަސައްކަތްކުރާ ފަރާތްތައް ކުރިއަށްވުރެ މަދު ވެއްޖެކަމަށެވެ. އެހެންކަމުން އެއީ ހިމާޔަތްކުރުމަށް އިސްކަންދޭނެ ކަމެއް ކަމަށް ވިދާޅުވިއެވެ.

ރިނބުދޫގައި ވެސް ކޮލިފިކޭޝަން އޮތޯރިޓީއިން ބަލައިގަންނަ ސެޓްފިކެޓް ލިބޭ ގޮތަށް އެ މަސައްކަތް ދަސްކޮށްދޭނެ ނިޒާމެއް ގާއިމް ކޮށްދެއްވާނެ ކަމަށް އެމަނިކުފާނު ވިދާޅުވިއެވެ. އެކަަން ކުރުމަށް މަސައްކަތްތައް އަވަހަށް ފައްޓަވާނެ ކަމަށް ވެސް ވިދާޅުވިއެވެ.