ޒަކިއްޔާ މަރުގެ މައްސަލައިގައި ސީޕީ އަދި ވަޒީރު އިހުސާން ހޮޅުދޫއަށް

Read Time:4 Minute, 4 Second

ޒަކިއްޔާ މަރުގެ މައްސަލައިގައި ކޮމިޝަނާ އޮފް ޕޮލިސް އަލީ ޝުޖާއު އަދި ދާހިލީ ސަލާމަތާއި ފަންނިޔަތާއި ބެހޭ ވަޒީރު އަލީ އިހުސާން މިއަދު ހޮޅުދޫ އަށް ވަޑައިގަތުމަށް ހަމަޖެހިއްޖެއެވެ. ހޮޅުދޫ ދާއިރާގެ މަޖިލިސް މެންބަރު އަބްދުލް ސައްތާރު މުހައްމަދު މީސްމީޑިއާގައި ހިއްސާ ކުރެއްވި ޕޯސްޓެއްގައި ވިދާޅުވެފައި ވަނީ ޒަކިއްޔާ މަރުގެ މައްސަލައިގައި ހޮޅުދޫ ރައްޔިތުންގެ ކަންބޮޑުވުންތަކަށް ހައްލު ހޯދައި ދެއްވުމަށް ރައްޔިތުންނާއި ބައްދަލު ކުރުމަށް ހޯމް މިނިސްޓަރު އަދި ސީޕީ ވަރަށް އަވަހަށް ހޮޅުދޫ އަށް ޒިޔާރަތް ކުރައްވާނެ ކަމަށެވެ. އެ ދެ ބޭފުޅުން އެ ރަށަށް ވަޑައިގަންނަވާނީ މިއަދުގެ ވަގުތެއްގައެވެ.

ޒަކިއްޔާގެ މަރުގެ މައްސަލައިގައި އިންސާފު ހޯދުމަށް ގޮވާލައި ހޮޅުދޫގައި ކޮންމެ ދުވަހަކު ހެން ދަނީ މުޒާހަރާ ކުރަމުންނެވެ. އުމުރުން 50 އަހަރުގެ ޒަކިއްޔާ ބޮޑެތި ޒަހަމްތަކަކާއެކު ނިޔާވެފައި އޮއްވާ ފެނުނީ އޭނާ ދިރިއުޅުނު ގޭގެ ބަދިގެ ފަރާތުގައި ހުންނަ ގުދަނެއްގެ ކައިރިން ސެޕްޓެމްބަރު 10 ވަނަ ދުވަހުގެ ހެނދުނު 10:00 ހާއިރުއެވެ. އޭނާ އަކީ ޑިޕްރެޝަނަށް ފަރުވާ ހޯދާ މީހަކަށް ވާތީ އެންމެ ފުރަތަމަ އޭނާ މަރުވީ އަމިއްލައަށް ކަމަށް އަޑު ފެތުރުނު ނަމަވެސް، ފުލުހުން ޖިނާއީ ތަހުގީގެއް ދަނީ ކުރިއަށް ގެންދަމުންނެވެ. އޭނާގެ ކަރުގައި ޒަޚަމްތަކެއް ހުރުމާއި، ކައިރީގައި ވަޅިއެއް އޮތުމުން މި މަރާމެދު ޝައްކުތަކެއް އުފެދުނެވެ. ރަށުގެ ގިނަ ބަޔަކު ޒަކިއްޔާ މަރާލީ ކަމަށް ތުހުމަތުކުރާއިރު، އެފަދަ ހެއްކެއް އަދި ނުލިބޭ ކަމަށް ފުލުހުން ބުނެފައިވެއެވެ.

ފުލުހުން ކުރިން ދީފައިވާ މަޢުލޫމާތުގައި، ޒަކިއްޔާގެ ހަށިގަނޑުން މީހަކު ދޭ ޒާތުގެ އަނިޔާއެއް ނުފެންނަ ކަމަށް ޕެތޮލޮޖިސްޓް ޑޮކްޓަރަކު ލަފާދީފައިވާ ކަމަށް ބުނެފައިވެއެވެ. ނަމަވެސް ޒަކިއްޔާ މަރުވީ އަމިއްލައަށްކަން ނުވަތަ މީހަކު މަރާލީކަން ފުލުހުން އަދި މުޅިން ނުނިންމައެވެ. މި މައްސަލައިގައި ރަށުތެރޭގައި ހަމަނުޖެހުންތަކެއް ހިނގައި، ޒަކިއްޔާގެ ދޮށީ ދަރިފުޅު މޫސާ ރިމްޒީ ހައްޔަރުކޮށް ފަހުން ދޫކޮށްލާފައިވެއެވެ. އަދި ޒަކިއްޔާގެ ޢާއިލާގެ މެދުގައި ވެސް އެކި ތުހުމަތުތައް ކުރެވި، ގިނަ ވާހަކަތަކެއް ރަށުތެރޭގައި ފެތުރެމުންދާ ކަމަށް ބުނެވެއެވެ.