ރަމަޟާން މަހަށްފަހު ބޯހިޔާވަހިކަމުގެ ބައެއް މަޝްރޫއުތައް ފެށޭނެ: ޒަމީރު

Read Time:3 Minute, 43 Second

(ފޮޓޯ ކްރެޑިޓްސް: ރައްޔިތުންގެ މަޖިލިސް)

މިއަހަރުގެ ރަމަޟާން މަހަށް ފަހު، ބޯހިޔާވަހިކަމުގެ ބައެއް މަޝްރޫއުތައް ފެށޭނެ ކަމަށް ފިނޭންސް މިނިސްޓަރު މޫސާ ޒަމީރު އިއްޔެ ވިދާޅުވެއްޖެއެވެ. ވަޒީރު މިހެން ވިދާޅުވީ ރައީސް ޑރ. މުހައްމަދު މުއިއްޒު ދ. އަތޮޅަށް ކުރައްވަމުން ގެންދަވާ ދަތުރުފުޅުގައި ބޯހިޔާވަހިކަމުގެ މަޝްރޫއުތަކާ ގުޅޭގޮތުން ޕީއެސްއެމް ނިއުސްއިން ދެންނެވި ސުވާލަކަށް ޖަވާބު ދެއްވަމުންނެވެ. ޑިޒައިން އެންޑް ބިލްޑް އުސޫލުން ރާއްޖޭގެ 57 ރަށެއްގައި 12،000 އަށްވުރެ ގިނަ ހައުސިންގ ޔުނިޓު ތަރައްގީކޮށްދޭނެ ބަޔަކު ހޯދުމަށް ސަރުކާރުން އިއުލާންކޮށްފައި ވަނީ މިދިޔަ ޖެނުއަރީ މަހުގެ 29 ވަނަ ދުވަހުއެވެ.

ވަޒީރު ވިދާޅުވީ މިހާރު އިއުލާންކޮށްފައިވާ ބޯހިޔާވަހިކަމުގެ މަޝްރޫއުތައް ކުރިއަށްގެންދިޔުމަށްޓަކައި އަމިއްލަ ކުންފުނިތަކުންވެސް ޝައުގުވެރިކަން ފާޅުކުރަމުން އަންނަކަމަށެވެ. ” ފަތުރުވެރިކަންވެސް މިދިޔަ އަހަރުތަކާ އަޅާބަލާއިރު ވަރަށް ބޮޑުތަން ރަނގަޅުވަމުން މިދަނީ. ޚަރަދު ކުޑަކުރުމާއި ޕްރޮޖެކްޓް ރެޝަނަލައިޒް ކުރުމަށް އެޅޭ ފިޔަވަޅުތަކާއެކު މިއަހަރަކީ ތަނަވަސް އަހަރަކަށް ވެގެންދާނެ” ޒަމީރު ވިދާޅުވިއެވެ.

ރަށްރަށުގައި ކުރިއަށްގެންދިޔުމަށް ހަމަޖެހިފައިވާ ހައުސިން މަޝްރޫއުތަކުގެ ތެރެއިން އެކި ރަށްރަށުގައި 30 ހައުސިން ޔުނިޓުން ފެށިގެން 2،000 ހައުސިން ޔުނިޓާ ހަމައަށް ހައުސިން ޔުނިޓް އިމާރާތް ކުރުމަށް ވަނީ ހަމަޖެހިފައެވެ. އެގޮތުން 50 އަށްވުރެ މަދުން ހައުސިން ޔުނިޓްތައް އަޅަނީ 18 ރަށެއްގައެވެ. އަދި 51 އާއި 150 ދެމެދުގެ އަދަދަކަށް ހައުސިން ޔުނިޓްތައް ތަރައްޤީކުރަނީ 17 ރަށެއްގައެވެ. 200-250 އާ ދެމެދުގެ އަދަދަކަށް ހައުސިން ޔުނިޓްތައް 10 ރަށެއްގައި ތަރައްޤީކުރާއިރު 300 އަށްވުރެ ގިނައިން ހައުސިން ޔުނިޓްތައް ތަރައްޤީ ކުރަނީ 12 ރަށެއްގައެވެ.

ރާއްޖޭގެ އުތުރުގައި 20،000 ހައުސިން ޔުނިޓް އަދި ދެކުނުގައި 20،000 ހައުސިން ޔުނިޓްގެ މަޝްރޫއެއް ހިންގެވުމަކީ ރައީސް ޑރ. މުއިއްޒުގެ ވަޢުދުފުޅެކެވެ.