Read Time:4 Minute, 28 Second
(ފޮޓޯ ކްރެޑިޓްސް: ވަގުތު)
އަންހެނުންގެ ތަރައްގީ އަށް މަސައްކަތްކުރާ ކޮމިޓީ (ޑަބްލިއުޑީސީ) ގެ މެމްބަރުންނަށް އެލަވަންސް ދިނުމުގެ ބަދަލުގައި ރަސްމީ މުސާރަ އާއި ރޯދަމަހުގެ އިނާޔަތް ލިބޭ ގޮތަށް ގެނައި ބަދަލާއި ގުޅިގެން އެ މެމްބަރުންނަށް މަރުހަބާ ވިދާޅުވެ، އެ ބޭފުޅުންނަށް ރަމަޟާން މަހުގެ އިނާޔަތްތައް ޖަމާވަމުންދާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. ކުރިއަށް އޮތް ރަމަޟާން މަހުން ފެށިގެން އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މެމްބަރުންނަށް ރޯދަ އިނާޔަތް ދެވޭ ގޮތަށް ގާނޫނަށް ބަދަލު ގެންނަވަން ނިންމަވާފައިވާކަން ރައީސް އިއުލާން ކުރެއްވީ ޑިސެމްބަރު 14 ވަނަ ދުވަހު އދ. ދަނގެތީގައި ބޭއްވި ޖަލްސާގައެވެ.
އަދި އެ އިސްލާހު ގެނައުމަށް ލާމަރުކަޒީ ގާނޫނަށް އިސްލާހު ގެނައުމުގެ ބިލް ރައްޔިތުންގެ މަޖިލީހަށް ހުށަހެޅީ ފެބްރުއަރީ 10ގައެވެ. ބިލުގައި ވަނީ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރުންގެ ތެރެއިން ރޯދަ މަހުގެ އިނާޔަތް ނުލިބޭ ކޮންމެ މެމްބަރަކަށް، ކޮންމެ އަހަރެއްގެ ރޯދަމަސް ފެށުމުގެ ކުރިން 3،000ރ. ދިނުމަށެވެ. މި ބިލް މަޖިލީހުން ފާސްކޮށް، މި މަހުގެ 19 ވަނަ ދުވަހު ރައީސް ވަނީ މަޖިލިހުން ފާސް ކުރި އެ ބިލް، ތަސްދީގު ކުރައްވާފައެވެ.
ރޭ މީދޫ ރައްޔިތުންނާއި ބައްދަލު ކުރައްވާ ވާހަކަފުޅުދައްކަވަމުން ރައީސް ވިދާޅުވީ، އަންހެނުންގެ ތަރައްގީއަަށް މަސައްކަތް ކުރާ ކޮމެޓީ ތަކުގެ މެންބަރުންނަށް މަރުހަބާ ދަންނަވަން ބޭނުންފުޅުވާ ކަމަށެވެ. “މި މެންބަރުންނަށް އަޅުގަނޑު ވައުދުވީ ރަމަޟާން މަހުގެ އިނާޔަތް ހަމަޖައްސާ ދޭނަމޭ، ގާނޫނުގެ އަކަމުގެ ހުރަސް އޮތީމަ، މަޖިލީސްގެ ތެރެއިން، އެކަން ހަމަޖައްސަދީ މިހާރު އެ ދަނީ ޑަބްލިވްޑީސީގެ މެންބަރުންނަށް ރަމަޟާން މަހުގެ އިނާޔަތް ޖަމާވަމުން، މިހާރު ފިނޭންސް މިނިސްޓްރީން ވަނީ ހުރިހާ ކައުންސިލްތަކަށް އަންގަވާފައި، މި ހަފްތާ ނިމެންވާއިރަށް ހުރިހާ ޑަބްލިއުޑީސީގެ މެންބަރުންނަށް ރޯދަ އިނާޔަތްދީ ނިންމަން،”. ރައީސް ވިދާޅުވިއެވެ.
އެހެންކަމުން އެ މެންބަރުންނަށް މަރުހަބާ ދަންނަވާ ކަމަށް ރައީސް ވިދާޅުވިއެވެ. އެމަނިކުފާނު އިސް ކުރަނީ ދިވެހި ރައްޔިތުން ކަމަށާއި، އަންހެނެއް ވިޔަސް ފިރިހެނެއް ވިޔަސް އެމަނިކުފާނަށް ތަފާތު ނޫންކަން ފާހަގަކުރައްވަމުން ރައީސް ވިދާޅުވީ، އަންހެނުން ބާރުވެރި ކުރުވުމަކީ އެމަނިކުފާނަށް ލިބިވަޑައިގަންނަވާ ފަހުރަކާއި ޒިންމާއެއް ކަމަށެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0