ގުޅިފަޅުގައި ހިއްކާފައިވާ ތަނުން ހުރިހާ ގޯއްޗެއް ދޭ ގޮތަށް ހަދައިފި

Read Time:3 Minute, 55 Second

ގުޅިފަޅުގައި ނުހިއްކާ އޮތްތަނުން ގޯތި ލިބުނު ހުރިހާ އެންމެންނަށްވެސް ގޯތި ލިބޭ ގޮތަށް ލޭންޑް ޔޫސް ޕްލޭން ބަދަލު ގެެނެސްފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެެއެވެ. ރައީސް މިހާރު ދ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ރޭ މީދޫ ރައްޔިތުންނާއި ބައްދަލު ކުރައްވާ ވާަހަކަފުޅުދައްކަވަމުން ރައީސް ވިދާޅުވީ، ގުޅިފަޅުން ގޯތި ލިބުނު އެތައް ހާސް ބަޔަކު އެބަ ތިބި ކަމަށާއި، ހިއްކާފައި އޮތް ސަރަަހައްދާއި ފުން ސަރަހައްދުންވެސް ގޯތި ލިބުނު މީހުން އެބަ ތިބި ކަަމަށެވެ.

“އަޅުގަނޑު ދަންނަވާލަން ބޭނުންވަނީ ގުޅިފަޅުން ގޯތި ލިބުނު ރައްޔިތުންނަށްވެސް، އަޅުގަނޑުމެން މިހާރު ގުޅިފަޅު ލޭންޑް ޔޫސް ޕްލޭން ބަދަލުކޮށްފީމޭ، އިރާދަކުރެއްވިއްޔާ ނުހިއްކާ އޮތްތަނުން ގޯތި ލިބުނު ހުރިހާ އެންމެންނަށްވެސް އަދި މިހާރު ހިކިފައި އޮތް ބިމުންވެސް ހަމަޖެހިގެން ދާނެ،”. އެމަނިކުފާނު ވިދާޅުވިއެވެ. އެމަނިކުފާނު ވިދާޅުވީ، ލޭންޑް ޔޫސް ޕްލޭނަށް ގެނައި ބަދަލުގެ ތެެރެއިން، ހިއްކާފައި އޮތް ސަރަހައްދުން ގޯތި ދިނުން ކުރިއަށް ދާނެ ކަމަށެވެ. އަދި އެތަނުގައި ދިރިއުޅުމަށް ބޭނުންވާ ވަސީލަތްތައް ގާއިމް ކުރެވިގެން ދާނެ ކަމަށްވެސް ރައީސް ވިދާޅުވިއެވެ. އޭގެ ތެރޭގައި ސްކޫލާއި، ހޮސްޕިޓަލް ފަދަ ތަންތަން ހިމެނެއެވެ.

“އެ ހުރިހާ ތަނެއް ހިމެނޭގޮތަށް، ނުހިއްކާ ހުރި ސަރަހައްދުގައި ހުރި ގޯތިތައްވެސް، ހިއްކި ސަރަހައްދަށް ބަދަލުވެ، ކުރިއަށް އޮތް ދެ ތިން މަސް ތެރޭގައި ހުރިހާ ރައްޔިތުންނަށް ގުޅިފަޅުން ގޯތި ލިބުނު ހުރިހާ ރައްޔިތުންނަށް ރަޖިސްޓްރީ ހަވާލު ކޮށް ނިންމާނަން،”. އެމަނިކުފާނު ވިދާޅުވިއެވެ. އެއާއެކު އަމަލީ ގޮތުން ގޯތީގެ ކަޑަ ޖަހާ އިން ވަކިކޮށް ގޯތި ހަވާލު ކުރައްވާނެ ކަމަށްވެސް ވިދާޅުވިއެވެ.

“ހަމައެކަނި ނުދެވޭނީ ބްރިޖްގެ މަސައްކަތަށް ބަންދުކޮށްފައި އޮތް ސަރަަހައްދު، އެތަނުން ގޯތި ލިބުނު ބަޔަކުވެސް އެބަ ތިބި، އެހެންވީމަ އެތަނުން ގޯތި އަރާ ފަރާތްތައް ފިޔަވާ އެހެން ހުރިހާ އެންމެންގެ ގޯތިތައް ހުރި ތަނުން ކުރިއަށް މި އޮތް ދެ ތިން މަސް ތެރޭގައި އަމަލީ ގޮތުން އެ މީހާގެ ގޯތި އެ މީހާއާ ހަވާލުކޮށް ނިންމާނަން،”.