ބަނޑިދޫ އައިސް ޕްލާންޓުގެ ބިންގާ އަޅައިފި

Read Time:3 Minute, 50 Second

(ފޮޓޯ ކްރެޑިޓްސް: ވަގުތު)

ދ. ބަނޑިދޫގައި ގާއިމުކުރާ އައިސް ޕްލާންޓްގެ ބިންގާ މިއަދު އަޅައިފިއެވެ. ބަނޑިދޫގައި ބޭއްވި ރަސްމިއްޔާތުގައި މި އައިސް ޕްލާންޓްގެ ބިންގާ އަޅުއްވައި ދެއްވީ ފިޝަރީޒް މިނިސްޓަރު އަހުމަދު ޝިޔާމާއި މިފްކޯގެ ސީއީއޯ ޑރ. ވިޓާލީ ލުބިމޯވްއެވެ. މި ރަސްމިއްޔާތުގައި ރައީސް ޑރ. މުހައްމަދު މުއިއްޒު ވެސް ވަނީ ބައިވެރިވެވަޑައިގެންފައެވެ.

މިއީ ސަރުކާރުގެ ޕީއެސްއައިޕީ މަޝްރޫއުގެ ދަށުން ބަނޑިދޫގައި ކުރިއަށް ގެންދާ އަށް މިލިއަން ރުފިޔާގެ މަޝްރޫއެކެވެ. އަށް މަސް ދުވަހުން ނިންމާ ގޮތަށް މި މަސައްކަތް ކުރިޔަށް ދަނީ މިފްކޯއާ ހަވާލުކޮށްގެންނެވެ. މި މަޝްރޫއުގެ ދަށުން އެރަށުގައި 30 ޓަނުގެ އައިސްޕްލާންޓެއް ގާއިމު ކުރާއިރު، މި އައިސްޕްލާންޓް ވެގެން ދާނީ އެ ސަރަހައްދުގެ މަސްވެރިންނަށް އައިސް ލިބުމުގައި ދިމާވެފައިވާ ދަތިތަކަށް ހައްލު ލިބި އިތުރު ލުއި ފަސޭހަތަކެއް ލިބިގެންދާނެ ކަމަކަށެވެ.

(ފޮޓޯ ކްރެޑިޓްސް: ވަގުތު)

މިދިޔަ ޖެނުއަރީ މަހު 29 ވަނަ ދުވަހު ރައީސް ޑރ. މުއިއްޒު ހއ. އަތޮޅަށް ކުރެއްވި ދަތުރުފުޅާ ދިމާކޮށް ހއ. އިހަވަންދޫގައި ވަނީ ފިޝަރީޒް ކޮމްޕްލެކްސްގެ ބިންގާ އަޅުއްވައިފައެވެ. މި މަޝްރޫއަށް 416 މިލިއަން ރުފިޔާ ހަރަދުކުރާއިރު، އަމަލީ މަސައްކަތް އަންނަ މެއި މަހު ފެށޭނެ ކަމަށް ރައީސް ޑރ. މުއިއްޒު ވަނީ ވިދާޅުވެފައެވެ.

މިއީ މަސް ދޯނިތަކަށް އައިސް ލިބުމުގައި ދިމާވާ ދަތިތަކަށް ހައްލު ހޯދުމަށް ކުރަމުންދާ މަސައްކަތްތަކުގެ ތެރެއިން މަސައްކަތެއްކަމަށް މަސްވެރިކަމާ ކަނޑުގެ ވަސީލަތްތަކާބެހޭ ވުޒާރާއިން ވިދާޅުވެއެވެ. މި މަސައްކަތުގެ އިތުރުން ސަރުކާރުން ދަނީ މަސްވެރިކަމުގެ ސިނާއަތް ކުރިއެެރުވުމަށް ކުރަންޖެހޭ މަސައްކަތްތައް ކުރަމުންނެވެ. އެގޮތުން މިފްކޯގެ ކެޕޭސިޓީ އިތުރުކޮށް، މަސްވެރިންނަށް ބޭނުންވާ އެކި ޚިދުމަތްތައް ލިބޭނެ އިންތިޒާމް ހަމަޖެއްސުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.

މި ސަރުކާރުން ގެންދަނީ ރައީސް ޑރ. މުއިއްޒުގެ ވައުދާ އެއްގޮތަށް މަސްވެރިން މަސް ކިރާތާ 48 ގަޑިއިރުގެ ތެރޭގައި ފައިސާ ދެމުންނެވެ.