މާއެނބޫދޫ ސިއްޚީ މަރުކަޒުގެ އެކްސްޓެންޝަން އިމާރާތް ރައީސް ހުޅުއްވައިދެއްވައިފި

Read Time:3 Minute, 30 Second

(ފޮޓޯ ކްރެޑިޓްސް: ވަގުތު)

ދ. މާއެނބޫދޫ ސިއްޚީ މަރުކަޒުގެ އެކްސްޓެންޝަން އިމާރާތް ރައީސް ޑރ. މުހައްމަދު މުއިއްޒު ހުޅުއްވައިދެއްވައިފިއެވެ. މި ސިއްޚީ މަރުކަޒު ހުޅުވުމާއެކީ އެ ރަށުގެ ރައްޔިތުންނަށް ދިމާވެފައިވާ ދަތިތަކަށް ވަރަށް ބޮޑު ހައްލެއް އަންނާނެއެވެ. މިހާރު ހުރި ސިއްޚީ މަރުކަޒުގައި މުވައްޒަފުން މަސައްކަތް ކުރަން އެކަށީގެންވާ ޖާގަ ނެތުމާއެކު، ޕަބްލިކު ހެލްތުން ފޯރުކޮށްދޭ ޚިދުމަތްތައްވެސް މީގެ ކުރިން ޖާގައިގެ ދަތިކަން ވަރަށް ބޮޑަށް އޮތެވެ. ނަމަވެސް މި ސަރުކާރުން މިވަނީ ރައްޔިތުންގެ ކަންބޮޑުވުންތައް އަޑު އަހައި އެ ދަތިކަމަށް ހައްލެއް ގެނެސްދީފައެވެ.

“މި އިމާރާތް ހުޅުވުމާއެކު ޖާގައިގެ ތަނަވަސްކަން ވަރަށް ބޮޑަށް ލިބިގެންދާނެ، ހާއްސަކޮށް ޕަބްލިކު ހެލްތުން ފޯރުކޮށްދޭ ޚިދުމަތްތަކަށްވެސް ޖާގަ ލިބިގެންދާނެ. އޭރުން އިދާރީ މަސައްކަތްތަކަށްވެސް ތަނަވަސް ޖާގައެއް ފަހިވެގެންދާނެ.” މާއެނބޫދޫ ސިއްޚީ މަރުކަޒު ހިންގުމާއި ހަވާލުވެ ހުންނެވި ނަޝީދާ އަބްދުލް އަޒީޒު ވިދާޅުވިއެވެ.

(ފޮޓޯ ކްރެޑިޓްސް: ވަގުތު)

މީގެކުރިން ހުރި ސިއްޚީ މަރުކަޒުގައި އިދާރީ މަސައްކަތްތަކާއި ޕަބްލިކް ހެލްތުގެ ހުރިހާ މަސައްކަތަކަށް ބޭނުން ކުރީ ހަމައެކަނި އެއް ކޮޓަރިއެކެވެ. މިއަދު ހުޅުވިގެންދިޔަ އާ ސިއްޚީ މަރުކަޒުގެ އެކްސްޓެންޝަން އިމާރާތުގައި ޕަބްލިކު ހެލްތުގެ ޑިޕާޓްމަންޓުތަކާއި މާބަނޑު މީހުންގެ ކުލިނިކުގެ އިތުރުން ދުންފަތުގެ އިސްތިއުމާލު ކުރުން ހުއްޓާލަން ބޭނުންވާ ފަރާތްތަކަށް އެހީތެރިވެދޭ ކުލިނިކް އަދި ކައުންސިލިން ދޭނެ ތަނެއްވެސް ހުންނާނެއެވެ.

އެހެންކަމުން މި އިމާރާތާ އެކީ ރަށުގެ ސިއްޚީ ޚިދުމަތް އިތުރަށް ކުރިއަރައި ތަރައްގީ ވެގެންދާނެއެވެ. ވަކިން ހާއްސަކޮށް އިދާރީ މަސައްކަތްތަކަށް ބޭނުންވާ މުވައްޒަފުން އިތުރުވެ ޕަބްލިކް ހެލްތު ޔުނިޓުގެ މަސައްކަތްތައް ވަރަށް ބޮޑުތަނުން ފުޅާވެގެންދާނެއެވެ.