މާފަރު އެއާޕޯޓުގެ މާސްޓާ ޕްލޭން ހަދާނެ ބަޔަކު ހޯދަނީ

Read Time:3 Minute, 21 Second

(ފޮޓޯ ކްރެޑިޓްސް: އައިލަންޑް އޭވިއޭޝަން)

ނ. އަތޮޅު މާފަރު އިންޓަނޭޝަނަލް އެއާޕޯޓްގެ މާސްޓަޕްލޭން ތައްޔާރުކުރުމަށް ތަޖުރިބާކާރު ކޮންސަލްޓެންސީ ކުންފުނިތަކަށް ފުރުޞަތު ހުޅުވާލައިފިއެވެ. އައިލޭންޑް އޭވިއޭޝަން ސާވިސެސް (އައިއޭއެސް) އިން ވަނީ މި މަސައްކަތަށް ޝައުގުވެރިވާ ފަރާތްތަކަށް އެކްސްޕްރެޝަން އޮފް އިންޓަރެސްޓް (އީއޯއައި) ހުށަހެޅުމުގެ ފުރުސަތު މި މަހުގެ 25 ވަނަ ދުވަހުގެ ނިޔަލަށް ހުޅުވާލާފައެވެ. މި މަސައްކަތާ ގުޅޭ މައިގަނޑު މައުލޫމާތުގެ ތެރޭގައި ހިމެނެނީ ޕްރޮޖެކްޓްގެ ނަމާއި، ބިޑް ނަންބަރު، އަދި އީއޯއައި ހުށަހެޅުމުގެ ސުންގަޑިއެވެ. އީއޯއައި ހުށަހަޅަންވާނީ އީމެއިލް މެދުވެރިކޮށް، ކަނޑައެޅިފައިވާ އެޑްރެސްތަކަށެވެ. އަދި އީމެއިލްގެ ސަބްޖެކްޓްގައި ޕްރޮޖެކްޓްގެ ނަމާއި ބިޑް ނަންބަރު ހިމަނަންވާނެއެވެ.

އައިއޭއެސްއިން އިތުރަށް ފާހަގަކޮށްފައިވަނީ މި މަސައްކަތަށް ހުށަހަޅާ ޕްރޮޕޯސަލްތައް ބަލައިގަނެވޭނީ ކަނޑައެޅިފައިވާ މުއްދަތުގެ ތެރޭގައި އީއޯއައި ހުށަހަޅާ ފަރާތްތަކުގެ ޕްރޮޕޯސަލްތައް އެކަނި ކަމަށެވެ. މާފަރު އިންޓަނޭޝަނަލް އެއާޕޯޓަކީ 2019 ޑިސެންބަރު 1 ގައި ހުޅުވުނު އެއާޕޯޓެކެވެ. މި އެއާޕޯޓްގެ މާސްޓަޕްލޭން ތައްޔާރުކުރުމަކީ އެއާޕޯޓްގެ ކުރިމަގު ރޭވުމަށާއި، ތަރައްގީގެ މަޝްރޫއުތައް ރާވައި ހިންގުމަށް އެޅޭ މުހިންމު ފިޔަވަޅެކެވެ. މާފަރު އެއާޕޯޓަކީ އަބޫދާބީ ފަންޑުގެ 60 މިލިއަން ޑޮލަރު ހޭދަކޮށްގެން ހިލޭ އެހީގެ ގޮތުގައި ހަދާފައިވާ ތަނެކެވެ. އެ އެއާޕޯޓު ތަރައްގީ ކޮށްފައިވަނީ ދުނިޔޭގެ އެންމެ ބޮޑެތި މަތިންދާ ބޯޓްތައް ކަމަށްވާ އެއާބަސް އޭ 320 އާއި ބޮއިން 737 މަރުކާގެ ބޯޓު ފަހަރު ޖެއްސޭ ފެންވަރަށް 2،200 މީޓަރު ދިގު އަދި 40 މީޓަރު ފުޅާ ރަންވޭއަކާއެކުގައެވެ. ރަންވޭއަށް ވަނީ 650 މީޓަރު އިތުރުކޮށް ޖުމްލަ 2850 މީޓަރަށް ބޮޑުކުރެވިފައެވެ