Read Time:6 Minute, 24 Second
(ފޮޓޯ ކްރެޑިޓްސް: ވަގުތު)
ވިސްލްބްލޯ ކުރި މުވައްޒަފަކު ވަޒީފާއިން ވަކިނުކުރާ ކަމަށާއި މީޑީއާތަކުގައި ފަތުރަމުން ދަނީ ދޮގު މައުލޫމާތު ކަމަށް މޯލްޑިވްސް ޕޯސްޓު ލިމިޓެޑުން ވިދާޅުވެއްޖެއެވެ. އެ ކުންފުނިން ނެރުނު ބަޔާނެއްގައި ވިދާޅުވީ، އެއްވެސް މުވައްޒަފަކު ވިސްލްބްލޯ ކުރުމާ ގުޅިގެން ވަޒީފާއިން ވަކިކޮށްފައި ނުވާނެ ކަމަށެވެ. ކުންފުނިން ވިދާޅުވި ގޮތުގައި، ވަކިކުރެވުނު މުވައްޒަފަކީ މަސައްކަތު ޕާފޯމަންސާއި އަޚްލާޤާ ގުޅުންހުރި މައްސަލަތަކާއި ގުޅިގެން، 10 މަސްދުވަހުގެ މުއްދަތެއްގައި ނަސޭހަތާއި އިންޒާރު ދީ، “ޕާފޯމަންސް އިމްޕްރޫވްމަންޓް ޕްލޭން” އެއްގެ ދަށަށް ގެނެވުނު މުވައްޒަފެކެވެ. އަދި ވަކިކުރެވުނީ ކުންފުނީގެ ގަވާއިދާއި ވަޒީފާއާ ބެހޭ ޤާނޫނާ އެއްގޮތަށް ކަމަށް ވިދާޅުވެފައި ވެއެވެ.
ހަމައެއާއެކު އެ މުވައްޒަފަކީ އޭނާ ރެކްރޫޓްކުރެވުނު މަގަމަށް ރެކްރޫޓް ކުރުމުގެ ކުރިން، ކުންފުނީގެ ސެކްރެޓަރީގެ މަގަމަށް ކުރިމަތިލައި އެ މަގާމަށް ނުހޮވުމުން، ނުރުހުން ފާޅުކުރުމުގެ އިތުރުން، ރެކްރޫޓް ކުރެވުނު މަގާމުގެ ޕްރޮބޭޝަން މުއްދަތުގައި ހުރެ، ކުންފުނިން އިއުލާންކުރި ވަރަށް އިސް މަގާމުތަކަށް ކުރިމަތިލައި، އެ މަގާމުތަކަށް އިންޓަވިއު އަށް ނުކިޔައިގެން އެކި ތަންތަނުގައި ހިތްހަމަނުޖެހުން ފާޅުކުރަމުންދިޔަ މުވައްޒަފެއް ކަމަށްވެސް ޕޯސްޓުން ނެރުނު ބަޔާނުގައި ވަނީ ވިދާޅުވެފައެވެ.
އަދި އެންމެ ފަހުން މި ހިތްހަމަނުޖެހުންތައް މެނޭޖިންގ ޑިރެކްޓަރާއި ހަމައަށް ގެންދިއުމުގެ ބޭނުމުގައި، މެނޭޖިންގ ޑިރެކްޓަރާއި ބައްދަލު ކުރުމަށް އޮފީހުން ބޭރުގެ ވަރަށް އިއްޒަތްތެރި ބޭފުޅަކު ފޮނުވައި، އެ ބޭފުޅާ މެދުވެރިކޮށް އޭނާ ކުރިމަތިލި މަގާމުތަކަށް އިންޓަވިއުއަށް ކިޔާފައި ނުވާތީ އާއި، އިންޓަވިއު ކުރެވުނު މަޤާމަށް ހޮވިފައި ނުވާތީ އިހުތިޖާޖުގެ ބަސްތައް މެނޭޖިންގ ޑިރެކްޓަރަށް އިއްވައި، އޭނާ ބޭނުންވި ގޮތަށް އެކަންކަން ހިނގާފައި ނުވާތީ، އެކަމުގެ ކައްފާރާއެއްގެ ގޮތުގައި ވީހާވެސް އަވަހަކަށް މިހާރު ހުރި މަޤާމަށްވުރެ ރަނގަޅު މަޤާމަކަށް ޕްރޮމޯޝަން ދިނުމަށާއި، އޭނާ އިންނަ ތަން ކޮޓަރިއަކަށް ބަދަލުކޮށްދިނުމަށާއި، މި ދެ ކަންތައް ވީހާވެސް އަވަހަށް ކޮށް ނިންމައި ދިނުމަށް އެދި، ބޭރުން ގެނައި އިއްޒަތްތެރި ބޭފުޅާ މެދުވެރިކޮށް މެނޭޖިންގ ޑިރެކްޓަރަށް ބިރު ދައްކާފައިވާ މުވައްޒަފެއްކަންވެސް ޕޯސްޓުން ވިދާޅުވެފައި ވެއެވެ.
ނިމިދިޔަ މެނޭޖްމަންޓުގައި އިއުލާނެއްވެސް އަދި އިންޓަވިއު ކުރުމެއްނެތި، މެނޭޖިންގ ޑިރެކްޓަރަށް ލިބިގެންވާ ބާރުގެ ދަށުން ކަމަށް ބުނެ، މެރިޓް އުސޫލުން ބޭރުން 49 ފަރާތަކަށް ކުންފުނިން ވަޒީފާ ދީފައިވާއިރު މީގެތެރޭގައި ވަރަށް ސީނިއަރ މަގާމުތައްވެސް ހިމެނޭކަމާއި މިފަރާތްތަކަށް ކުންފުނީގެ ގިނަދުވަސްވީ ވެރިންނަށާއި މުވައްޒަފުންނަށް ނުލިބޭފަދަ ބޮޑެތި މުސާރައާއި އެލަވަންސްތައް އެކި ނަންނަމުގައި ދީފައިވާ ކަން ޕޯސްޓުން ވަނީ ފާހަގަކޮށްފައެވެ. ޕޯސްޓް އޮފީހުގެ އެ ބަޔާނުގައި ވަނީ އެ ކުންފުނީގެ އެއްވެސް މުވައްޒަފަކު ކުންފުނީގެ އެއްވެސް ކަމަކާ ބެހޭގޮތުން ދައުލަތުގެ އެއްވެސް އިދާރާއެއްގައި ވިސްލްބްލޯ ކުރުމާ ގުޅިގެން ވަޒީފާއިން ވަކިކޮށްފައި ނުވާނެކަން ކަށަވަރުކޮށްދީފައެވެ.
އެހެންނަމަވެސް، މި މައްސަލައިގައި ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ވަނީ ނުވަ ލައްކަ ރުފިޔާއިން އެ ކުންފުނި ޖޫރިމަނާ ކުރުމަށް ނިންމާފައެވެ. މިއީ ވިސްލްބްލޯކުރި މުވައްޒަފަކު ވަޒީފާއިން ވަކިކުރި ކަމަށް ބުނެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0