Read Time:5 Minute, 44 Second
(ފޮޓޯ ކްރެޑިޓްސް: ރައީސް އޮފީސް)
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ޒާމަތުގައި ހުރިހާ ކަމެއް ކުރައްވާނީ ރައްޔިތުންނަށް އޭގެ ފުރިހަމަ މަންފާ ލިބޭ ގޮތަކަށް ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ. މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މީގެ ކުރީ ސަރުކާރު ތަކުގައި ވަކި ބަޔަކަށް މަންފާ ވާ ގޮތަށް ފަޅު ރަށްތައްވެސް ދޫކޮށްފައިވުމާއި ގުޅޭގޮތުން ވާހަކަދައްކަވަމުން އާދަމް ޝަރީފް ވިދާޅުވީ ރާއްޖޭގެ އެކި ކަންކޮޅުތަކުގައި ފަޅު ރަށްތައް ވަކި ގިންތީގެ މީހުންނަށް ދެވިފައިވާ ކަމުގެ އަޑުތައް އަބަދުވެސް އިވެމުންދާ ކަމަށާއި މިކަންތައް ރައީސް މުއިއްޒު ބަދަލު ކުރައްވާފައިވާ ކަމަށެވެ.
“އެއްވެސް ހާލެއްގައި ރަށެއްގެ ރައްޔިތުންނަށް އޭގެ މަންފާ ލިބޭ ގޮތަށް ދެވިފައި އޮތް ކަމެއް މިފަހުގެ ތާރީހުގައި އަޅުގަނޑުމެންނަކަށް ފެންނާކަށް ނެތް. އެހެންނަމަވެސް ރައީސުލްޖުމްހޫރިއްޔާ ޒައާމަތަށް ވަޑައިގެންނެވުމަށްފަހު އަޅުގަނޑުމެންނަށް ފެނިގެން މިދަނީ ހާއްސަކޮށް ރަށްރަށުގެ އިހުތިސާސްގެ ތެރޭގައި ހިމެނޭ ގޮތަށްވެސް ބައެއް ފަޅު ރަށްތައް ހަމަޖައްސުވައިދެއްވަމުން،”، ވަޒީރު ވިދާޅުވިއެވެ. އެގޮތުން އެންމެ ފަހުން ރައީސް ރ އަތޮޅަށް ކުރެއްވި ދަތުރުފުޅުގައި ރައްޔިތުންނާއި ކައުންސިލުގެ ޝަކުވާތައް އަޑުއައްސަވައި ރ. މަޑުއްވަރީ އިހުތިސާސްއަށް ފުލަންދޫ އަދި ރ. މީދޫ އިހުތިސާގެ ތެރެއަށް ތާވަތާ ކިޔާ ރަށެއް ހިމެނުއްވާފައިވާކަން ވަޒީރު ވަނީ ފާހަގަކުރައްވާފައެވެ.
“މިއީ ރާއްޖޭގެ ފަހުގެ ތާރީހެއްގައި ހިނގާފައިވާ ކަމެއް ނޫން. ހާއްސަކޮށް ކައުންސިލްތަކާއި ރައްޔިތުން ބާރުވެރިކުރުމަށްޓަކައި މީގެ ކުރިން ދައުލަތަށް ހަރު މުދަލެއްގެ ގޮތުގައި ހުރި ބައެއް ތަކެތި ރަށްޔިތުންނަށް އޭގެ މަންފާވާ ގޮތަށް ހަމަޖައްސަން ފެށީ ރައީސް ޑރ. މުހައްމަދު މުއިއްޒުގެ ޒާމަތުގައި.” ވަޒީރު ވިދާޅުވިއެވެ. އާދަމް ޝަރީފް ވިދާޅުވީ ކައުންސިލްތަކުން ފަޅު ރަށްތަކުގައި އެކި ކަހަލަ މަސައްކަތް ކުރުމަށްޓަކައި ޕްރޮޕޯސަލް ހުށަހެޅުމުން އެ ކައުންސިލަށް އެކަން ކުރުމުގެ ހުއްދަވެސް ލިބިގެންދާނެ ކަމަށާއި ފަޅު ރަށްރަށުން ނެގޭ ޓެކްސްގެ ވަކި އިންސައްތައެއް ކައުންސިލްތަކަށް ލިބޭނެ ގޮތްވެސް ހަމަޖައްސައިދެއްވާފައިވާ ކަމަށެވެ. މިއީ ލާމަރުކަޒީ ނިޒާމަށް އަންނަ ވަރަށް ބޮޑު ކުރިއެރުމެއް ކަމަށް ވަޒީރު ވަނީ ވިދާޅުވެފައެވެ.
މީގެއިތުރުން ރައީސުލްޖުމްހޫރިއްޔާ ވެރިކަމާއި ހަވާލުވެވަޑައިގެންނެވުމަށްފަހު ރާއްޖޭގެ ރަށްތަކަށް ކުރައްވަމުން ގެންދަވާ ޒިޔާރަތަކީ ލާމަރުކަޒީ ނިޒާމު އިތުރަށް ކުރިއަރުވައި ރައްޔިތުންނަށްވެސް ވަރަށް މަންފާ ކުރުވަނިވި ދަތުރުފުޅުތަކެއް ކަމަށް ވަޒީރު ވަނީ ވިދާޅުވެފައެވެ. ސަބަބަކީ މިއިން ކޮންމެ ޒިޔާރަތެއްގައިވެސް އެމަނިކުފާނު ރައްޔިތުންނާއި ކައުންސިލާއި ބައްދަލު ކުރެއްވުމަށްފަހު އެ ބޭފުޅުން އެދިލައްވާ ކަންތައްތައް ބެލުމަށްފަހު ރައްޔިތުން ބޭނުންވާ ގޮތަށް ކަންކަން ބަދަލުކުރައްވަމުން ގެންދަވާތީ ކަމަށްވެސް ވަޒީރު ވިދާޅުވިއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0