Read Time:3 Minute, 59 Second
(ފޮޓޯ ކްރެޑިޓްސް: ވަގުތު)
ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ގާސިމް އިބްރާހީމްގެ ކުންފުނި ވިލާ ފައުންޑޭޝަނުން އދ. މާމިގިލީގައި ޕޮލިސް ސްޓޭޝަނެއް އެޅުމަށް ކޮމިޝަނަރ އޮފް ޕޮލިސް އަލީ ޝުޖާއުގެ ހުއްދައަށް އެދިވަޑައިގެންފިއެވެ. މިކަމަށް އެދިވަޑައިގެން ގާސިމް ވަނީ ސީޕީއަށް އެޑްރެސްކުރައްވާ ސިޓީއެއް ފޮނުއްވާފައެވެ.
ގާސިމް އޭނާގެ ސިޓީގައި ފާހަގަކުރައްވާފައިވާ ގޮތުގައި މާމިގިއްޔަކީ އެ ރަށް އޮތް ރީޖަންގެ ހަތަރު އަތޮޅުގެ އާބާދީއަށް ބަލާއިރު އެންމެ ބޮޑު ރަށް ކަމަށާއި ބިމުގެ ގޮތުން ވެސް އެންމެ ބޮޑު އެއް ރަށެވެ. ހަމައެއާއެކު އިންޓަނޭޝަނަލް އެއާޕޯޓެއް އޮތް މިރަށަކީ ވަށައިގެން ގިނަ ރިސޯޓުތަކެއް އޮތުމުން އެކި ޚިދުމަތް ހޯދުމަށް ގިނަ ބަޔަކު ޒިޔާރަތްކުރާ ރަށެއްކަން އެސިޓީގައި ވަނީ ފާހަގަކުރައްވާފައެވެ. އަދި މާމިގިއްޔަކީ ވަޒީފާއާއި އެކިއެކި މަސައްކަތްތެރިން ހިމެނޭހެން ބޮޑު އާބާދީއެއް ދިރިއުޅޭ ރަށެއް ކަމަށް ޤާސިމް ވަނީ ވިދާޅުވެފައެވެ.
ޤާސިމް އިތުރަށް ވިދާޅުވީ ފުލުހުންގެ ތަފާސްހިސާބުތަކުން ދައްކާ ގޮތުގައި އދ. އަތޮޅުގެ ކުށް ކުރާ ނިސްބަތްވްއެންމެ ގިނަ ރަށަކީ މާމިގިލި ކަމަށެވެ. އެހެންކަމުން، ފުލުހުންގެ ޚިދުމަތް ދިނުމަށް ރީޖަން ފެންވަރުގެ ސްޓޭޝަނެއް މާމިގިލީގައި ހުންނަންޖެހޭ ކަމަށް އެކި ފަހަރުމަތިން ވާހަކަދެކެވިފައިވާ ކަމަށްވެސް އޭނާ ފާހަގަކުރައްވާފައިވެއެވެ. ގާސިމް ވިދާޅުވި ގޮތުގައި ފާއިތުވި ފަސް އަހަރުތެރޭ ފުލުހުންގެ މަރުކަޒެއް އެރަށުގައި އެޅުމަށް ބަޖެޓުގައި ހިމަނާފައިވީ ނަމަވެސް، މިއަދާ ހަމައަށް ވެސް އެ މަސައްކަތް ފެށިފައެއް ނުވެއެވެ. މިއާއެކު ގާސިމް ވަނީ ސީޕީ ހުއްދަ ދެއްވައިފިނަމަ އެރަށުގައި އެޅުމަށް ހަމަޖެހިފައިވާ ފުލުހުންގެ މަރުކަޒު ވިލާ ފައުންޑޭޝަންގެ ސްޕޮންސަޝިޕްގެ ދަށުން އިމާރާތްކުރުމަށް ނިންމާފައިވާ ކަމަށް ވިދާޅުވެފައެވެ.
މި މަޝްރޫޢު ކުރިއަށް ގެންދިއުމަށްޓަކައި، އިމާރާތްކުރުމަށް ބޭނުންވާ ކުރެހުމާއި، އިމާރާތް ހެދުމަށް ސްޕޮންސަރޝިޕް ގަބޫލުކުރިކަމުގެ ލިޔުން ލިބޭނެ ގޮތް ހަމަޖައްސަވައިދެއްވުމަށް ގާސިމް ވަނީ އެދިވަޑައިގެންފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0