ފަތުރުވެރިކަން ފުޅާނުވާ އަތޮޅުތަކަށް އިންވެސްޓްކުރުމަށް ލުއި ދެނީ

Read Time:3 Minute, 30 Second

(ފޮޓޯ ކްރެޑިޓްސް: ވަގުތު)

ފަތުރުވެރިކަން ފުޅާނުވާ އަތޮޅުތަކަށް އިންވެސްޓްކުރުމަށް ލުއި ދޭން ނިންމަވާފައިވާކަން ރައީސް ޑރ. މުހައްމަދު މުއިއްޒު އިއުލާން ކުރައްވައިފިއެވެ. މި އަހަރުގެ މަޖިލީސް ހުޅުވާ، ރިޔާސީ ބަޔާން އިއްވަން މިއަދު ހެނދުނު މަޖިލީސް ކުރާ ގޭގައި ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ، މިހާތަނަށް ފަތުރުވެރިކަން ފުޅާކުރެވިފައި ނެތް ހދ. އަތޮޅު، ތ. އަތޮޅު ފަދަ އަތޮޅުތަކުގައި މިއަހަރުތެރޭގައި އިންވެސްޓްކުރުމަށް ލުއިތައް ދީގެންނާއި، އެ ނޫން އިންސެންޓިވްތައް ދީގެން ރިސޯޓުތައް ހެދުމުގެ މަސައްކަތް ފެށުމަކީ ސަރުކާރުގެ އަމާޒެއް ކަމަށެވެ.

ރައީސް ވިދާޅުވީ ރާއްޖޭގެ ތާރީހުގައި ފުރަތަމަ ފަހަރަށް ދެ މިލިއަން ފަތުރުވެރިން ޒިޔާރަތްކުރީ މިދިޔަ އަހަރު ކަމަށެވެ. އެގޮތުން 2023 ވަނަ އަހަރާ އަޅާބަލާއިރު ފަތުރުވެރިން ޒިޔާރަތްކުރި އަދަދު ނުވަ އިންސައްތަ ފާއިތުވީ އަހަރު އިތުރުވެފައިވާ ކަަމަށް ރައީސް ވިދާޅުވިއެެވެ. “މި އަހަރުގެ އަމާޒަކީ،މިއަހަރުގެ ނިޔަލަށް 2.3 މިލިއަން ފަތުރުވެރީން ޒިޔާރަތްކުރުން. މި އަމާޒު ޙާޞިލުކުރުމަށްޓަކައި، ގިނަގުނަ މަސައްކަތްތަކެއް މިހާރު ވަނީ ކުރަން ފެށިފައި،”. ރައީސް ވިދާޅުވެފައި ވެއެވެ.

މީގެ އިތުރުން ރައީސް ވިދާޅުވީ ފަތުރުވެރިން އިތުރުކުރުމުގެ ގޮތުން މި ސަރުކާރުން ފާއިތުވި އަހަރު ވައިޑްބޮޑީ އެއާކްރާފްޓް އިފުތިތާހުކޮށްފައިވާއިރު، ޗައިނާގެ އިތުރު ސިޓީތަކަށާއި އެހެނިހެން ސަރަހައްދުތަކަށް ގައުމީ އެއަރލައިންގެ އިންޓަރނޭޝަނަލް އޮޕަރޭޝަން ފުޅާ ކުރުމަށް މަސައްކަތްތަކެއް ކުރަމުންދާ ކަމަށެވެ. އަދި އިތުރު ވައިޑް ބޮޑީ އެއަރކްރާފްޓެއް މި އަހަރުގެ އޮކްޓޫބަރު ގައި ގެނައުމަށް ހަމަޖެހިފައިވާ ކަމަށާއި، މިކަމުގެ ސަބަބުން ޔޫރަޕުގެ ބައެއް މަންޒިލްތަކަށް ވެސް، ގައުމީ އެއަރލައިންގައި ސީދާ ރާއްޖޭން އުދުހެން ފެށޭނެ ކަންވެސް އެމަނިކުފާނު ވިދާޅުވެފައި ވެއެވެ.