Read Time:3 Minute, 11 Second
(ފޮޓޯ ކްރެޑިޓްސް: ވަގުތު)
މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ މެނޭޖިން ޑިރެކްޓަރު މުހައްމަދު ވަޖީހު އިބްރާހިމް، މަގާމުން ވަކިކޮށްފިއެވެ. ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން “އެކްސް” ގައި ކުރި ޕޯސްޓެއްގައި ވަނީ އެމްޕީއެލްގެ މެނޭޖިން ޑިރެކްޓަރުގެ މަގާމުންނާއި ބޯޑު ޑިރެކްޓަރު ކަމުގެ މަގާމުން ވަޖީހު މިއަދު ވަކިކޮށްފައިވާ ކަމަށެވެ. އެކަމާ ގުޅޭ ތަފްސީލެއް ހާމަކޮށްފައެއް ނުވެއެވެ. އެމްޕީއެލްގެ މެނޭޖިން ޑިރެކްޓަރުގެ މަގާމަށް ވަޖީހު އައްޔަން ކުރެއްވީ ނޮވެމްބަރު 28، 2023 ގައެވެ.
ވަޖީހުގެ ބޭފުޅެއް ކަމަށްވާ ރައީސް އޮފީހުގެ ލީގަލް އެފެއާޒް މިނިސްޓަރު އަހުމަދު ހިޝާމް ވަޖީހު ކައިވެނި ބައްލަވައިގެން އުޅުއްވަނީ ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުﷲގެ ދަރިކަނބަލަކާއެވެ. އަބްދުއްރަހީމްގެ ދަރިކަލުން އަދި ޓޫރިޒަމް މިނިސްޓަރުކަމުގެ މަގާމުގައި ހުންނެވި އިބްރާހިމް ފައިސަލް މިދިޔަ ހަފްތާގައި ވަނީ މަގާމުން ވަކިކޮށްފައެވެ. ރައީސް ޑރ. މުހައްމަދު މުއިއްޒު ވަނީ ޓޫރިޒަމް މިނިސްޓްރީ އާއި އެންވަޔަރަމަންޓް މިނިސްޓްރީ އެއްކޮށްލައްވައި އެ މިނިސްޓަރު ކަމަށް ތޯރިގް އިބްރާހިމް އައްޔަން ކުރައްވައިފައެވެ. ތޯރިގް މީގެކުރިން ހުންނެވީ އެންވަޔަރަމަންޓް މިނިސްޓަރަކަށެވެ.
ވަޖީހު ވަނީ އެމްޕީއެލްގައި ނުވަ އަހަރު ހޭދަކުރައްވައިފައެވެ. އެ އަހަރުތަކުގައި އޭނާ ވަނީ އެސިސްޓެންޓް ޖެނެރަލް މެނޭޖަރު ކަމާއި ޖެނެރަލް މެނޭޖަރު ކަމާއި އެސިސްޓެންޓް ސީއީއޯގެ މަގާމު ފުރުއްވައިފައެވެ. އެމްޕީއެލްގެ މެނޭޖިން ޑިރެކްޓަރު މަގާމުން ވަކިކުރި އިރު، ފެނަކައިގެ މެނޭޖިން ޑިރެކްޓަރު މުއާޒް މުހައްމަދު ރަޝީދު ވަނީ މަގާމުން އިސްތިއުފާ ދެއްވައިފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0