އިހަވަންދޫގައި 200 ހައުސިން ޔުނިޓް އަޅައި ދޭނަން: ރައީސް

Read Time:3 Minute, 50 Second

(ފޮޓޯ ކްރެޑިޓްސް: ވަގުތު)

ހއ. އިހަވަންދޫގައި 200 ހައުސިން ޔުނިޓް އިމާރާތްކޮށް ދެއްވާނެ ކަމަށް ރައީސް ޑރ. މުހައްމަދު މުއިއްޒު މިއަދު އެ ރަށުގައި ވިދާޅުވެއްޖެއެވެ. ރައީސް ޑރ. މުއިއްޒު، ހއ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި އިހަވަންދު އަށް ވަޑައިގެން އެ ރަށުގެ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން އެމަނިކުފާނު ވިދާޅުވީ ރާއްޖޭގެ 57 ރަށެއްގައި 12،000 އަށްވުރެ ގިނަ ހައުސިން ޔުނިޓް އަޅަން ބޭނުންވާ ކޮންޓްރެކްޓަރުން ހޯދަން މިހާރު އިއުލާންކޮށްފައިވާ ކަމަށެވެ. އިހަވަންދޫގައި ވަކި އަދަދަކަށް ހައުސިން ޔުނިޓް އަޅަން މީގެކުރިން ވައުދުވެވަޑައިގެންފައި ނުވާނެ ކަމަށް ރައީސް ވިދާޅުވިއެވެ.

އެކަމަކު، މި ރަށަކީ ވެސް ބޯހިޔާވަހިކަން ބޭނުންވާ ރައްޔިތުން ދިރިއުޅެމުން އަންނަ ރަށެއް ކަމުގައި ރައީސް ވިދާޅުވިއެވެ. އިހަވަންދު އަށް 100 ހައުސިން ޔުނިޓް ކަނޑައަޅާ ގޮތަށް ކުރިން އޮތް ކަމުގައި ވިޔަސް، އެ ނިންމުން މިހާރު ބަދަލުކޮށްފައިވާ ކަމަށް ރައީސް ވިދާޅުވިއެވެ. އެގޮތުން ރަށުގައި 200 ހައުސިން ޔުނިޓް އެޅުމަށް ބަޔަކާ ހަވާލުކު ކުރައްވާނެ ކަމަށް ވެސް އެމަނިކުފާނު ވިދާޅުވިއެވެ. ރައީސް ޑރ. މުއިއްޒު ވިދާޅުވި ގޮތުގައި ރަށްރަށުގައި ބޯހިޔާވަހިކަމުގެ މަޝްރޫއުތައް ހިންގުމަށް މި އަހަރުގެ ބަޖެޓުގައި 1.5 ބިލިއަން ރުފިޔާ ވަނީ ހިމަނައިފައެވެ. މީގެކުރިން އެއް އަހަރު ދުވަހެއްގެ ބަޖެޓުގައި ބޯހިޔާވަހިކަމުގެ މަޝްރޫއުތަކަށް މިހާ ބޮޑު އަދަދެއް ހިމަނާފައި ނުވާ ކަމަށް ރައީސް ވިދާޅުވިއެވެ.

ގެދޮރު މައްސަލަ ހައްލު ކުރުމަކީ ރާއްޖެއަށް މިވަގުތު އެންމެ މުހިންމު ކަންތައް ކަމުގައި އެމަނިކުފާނު ވިދާޅުވިއެވެ. “މި ދެންނެވި މަޝްރޫއުތައް ފަށަން މިހާރު ވަނީ އިއުލާންކޮށްފައި. މާލޭގައި ވަކި މަޝްރޫއުތަކެއް ހިނގާނެ، އެ ލިސްޓުގައި މާލެއެއް ނުހިމެނޭ. އެއީ ވަކި މަޝްރޫއުތަކެއް. އެކަން ވަކިން އިއުލާން ކުރާނަން. ރާއްޖޭގެ އެހެން ހުރިހާ ރަށެއް އެކުގައި މިހާރު އެ ވަނީ އިއުލާން ކުރެވިފައި. އޭގެ ތެރޭގައި މި ރަށަށް 200 ހައުސިން ޔުނިޓް ހަމަޖެހިފައިވަނީ،” ރައީސް ވިދާޅުވިއެވެ.