ވަޒީރުން ހިމެނޭ ގޮތަށް ބޮޑު ޓީމަކާއެކީ ރަށްރަށަށް ދަތުރުކުރައްވާ ސަބަބު ރައީސް ތަފްސީލްކޮށްދެއްވައިފި

Read Time:4 Minute, 14 Second

(ފޮޓޯ ކްރެޑިޓްސް: ވަގުތު)

ވަޒީރުން ހިމެނޭ ގޮތަށް ބޮޑު ޓީމަކާއެކު ރަށްރަށަށް ދަތުރުކުރައްވާ ސަބަބު، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިއަދު ތަފްސީލްކޮށްދެއްވައިފިއެވެ. އުތުރުގެ ބައެއް ރަށްރަށަށް ކުރައްވަމުން ގެންދަވާ ދަތުރުފުޅުގައި ހއ. މާރަންދޫއަށް ވަޑައިގެން އެރަށު ރައްޔިތުންނަށް ވާހަކަފުޅުދައްކަވަމުން ރައީސް ވިދާޅުވީ ސަރުކާރުގެ ބޮޑު ވަފުދަކާއެކު އަތޮޅު ތެރޭގެ ރަށްރަށް ކުރައްވަމުން ގެންދަވާ ދަތުރުފުޅުތަކާ ގުޅިގެން ބައެއް ބޭފުޅުން ފާޑުވިދާޅުވަމުން ގެންދަވާ ކަމަށެވެ. އެމަނިކުފާނު ވިދާޅުވީ ކަމާ ގުޅުންހުރި ވަޒީރުންނާއެކު ރަށްރަށަށް ވަޑައިގަންނަވަނީ ސީރިއަސް މަސައްކަތްތަކެއް ކުރަން ކަމަށެވެ.

“ބައެއް ބޭފުޅުން އެބަ ވިދާޅުވޭ އަޅުގަނޑު ބޭކާރު ޚަރަދެއް ކުރަނީއޭ. ނޫން. ޚަރަދު ބޭކާރުވާނީ ހަގީގަތުގައި ލަސްވެގެން ގޮސް ގެއްލިގެންދާ ދުވަސްތަކުން ލިބޭ ގެއްލުން މާ ބޭކާރުވާ ޚަރަދަކަށް އެބަވޭ.” ރައީސް ވިދާޅުވިއެވެ. ރައީސް ވިދާޅުވި ގޮތުގައި ސަރުކާރުގެ ކަމާ ގުޅުން ހުރި ވަޒީރުންނާއެކު ރަށްރަށަށް ވަޑައިގަންނަވަނީ ރަށްރަށުގައިި ހުރި ކަންކަމަށް އަވަސް ހައްލެއް ހޯދައިދީ، ކަންކަން އަވަހަށް ނިންމުމަށް ކަމަށެވެ.

“އަޅުގަނޑު ބޭނުންވަނީ މާލޭގަ އަޅުގަނޑުމެން އަރާމުގަ ތިބުމުގެ ބަދަލުގަ ވަޒީރުން އަޅުގަނޑާއެކީ ރަށްރަށަށް އައިސް ކަމާ ގުޅޭ ހުރިހާ ދާއިރާތަކެއްގެ ވަޒީރުން ކައުންސިލާއި މުވައްސަސާތަކުގެ ޒިންމާދާރު ބޭފުޅުންނާއެކީ އިށީންދެގެން ކޮން ކަމެއްގަ އޮތީ ކޮން މައްސަލައެއްތޯ އަދި އެއަށް ގެނެވޭނީ ކޮން ހައްލެއްތޯ ދެ ފަރާތުން މަޝްވަރާކުރެވި ކަންކަން ހަމަޖެހިގެންދާން. އޭރުން ބާރަށް ހިނގާނީ ކަންކަން” ރައީސް ވިދާޅުވިއެވެ. ރައީސް ވިދާޅުވީ ކޮންމެ ރަށަކަށް ވަޑައިގެންވެސް އެރަށެއްގެ ޒިންމާދާރު ފަރާތްތަކާއެކު ކުރިއަށްގެންދަނީ ސަރުކާރުގެ މަސައްކަތު ބައްދަލުވުންތަކެއް ކަމަށެވެ. އަދި ރަށްރަށުގައި ރައްޔިތުންނާއެކު ބާއްވާ ބައްދަލުވުންތަކުގެ ބޭނުމަކީ އެ ރަށެއްގެ އިދާރާތަކާއެކު ކުރެވޭ މަޝްވަރާއިން ނުކުންނަ ނަތީޖާއާއި ނިންމާ ކަންކަން ރައްޔިތުންނާ ހިއްސާކުރުން ކަމުގައިވެސް އެމަނިކުފާނު ވިދާޅުވިއެވެ.

ރައީސް ވިދާޅުވީ “ސީރިއަސް މަސައްކަތްތަކެއް މިކުރަނީ ރަށުގެ ތަރައްގީއަށްޓަކައި ކަންކަން ކުރުމުގައި” ކަމަށެވެ.