Read Time:4 Minute, 19 Second
(ފޮޓޯ ކްރެޑިޓްސް: ވަގުތު)
ހއ. މާރަންދޫގައި އެކި ދާއިރާތަކުން ގިނަ މަސައްކަތްތަކެއް މިއަހަރުގެ ތެރޭ ފަށާނެ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ. އުތުރުގެ ބައެއް އަތޮޅުތަކަށް ކުރައްވަމުން ގެންދަވާ ދަތުރުފުޅުގައި މިއަދު މާރަންދޫއަށް ވަޑައިގެން އެރަށު ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، މިދިޔަ ސަރުކާރުން އެރަށުގައި ފަށާފައިވާ ބަނދަރު ހެދުމުގެ މަޝްރޫއާއި، ސްކޫލުގެ ކްލާސްރޫމް އެޅުމުގެ މަސައްކަތް ހިމެނޭހެން މިއަހަރުގެ ތެރޭ އެކި މަސައްކަތްތައް ކުރިއަށް ގެންދަވާނެ ކަމަށެވެ.
އެމަނިކުފާނު ވިދާޅުވީ ސްކޫލުގެ ކްލާސްރޫމް އެޅުމުގެ މަސައްކަތާއި ބަނދަރު ހެދުމުގެ މަސައްކަތް ނުނިމި އޮތީ، ކުރީ ސަރުކާރުން އެކަންކަމަށް ކަނޑައަޅާފައި އޮތް ބަޖެޓު ކުޑަވުމާއި، އެއް ކުންފުނިތަކަކަށް އެކި ރަށްރަށުން ގިނަ މަޝްރޫއުތަކެއް ހަވާލުކޮށްފައި އޮތުމުން ކަމަށެވެ. އަދި މިހާރު ސަރުކާރުގެ ތެރެއިން އެކަންކަމަށް ހައްލު ގެނެވި، އެގޮތަށް ނުނިމި ހުރި މަޝްރޫއުތައް ކުރިއަށް ގެންގޮސް ނިންމަވައިދެއްނާވެ ކަމުގައި ރައީސް ވިދާޅުވިއެވެ. އިތުރަށް ވާހަކަފުޅު ދައްކަވަމުން ރައީސް ވިދާޅުވީ މާރަންދޫއަށް އެރަށުގައި ފުޓްބޯޅަ ދަނޑުގައި ލައިޓް ޖަހައިދީ ކުރަން ހުރި އިތުރު ކަންކަމާއި، މުޅިން އާ ފުޓްސަލް ދަނޑެއް ގާއިމް ކުރުމުގެ އިތުރުން،. ރަށުގެ ސިއްޙީ މަރުކަޒަށް ބޭނުންވާ މުވައްޒަފުން ހަމަކޮށްދީ، އެތަނުގައި ލެބޯޓްރީއެއް ގާއިމް ކުރުމަށް ގަސްދުކުރައްވާ ކަމަށެވެ.
ކުޅިވަރުގެ ރޮނގުން ވޮލީ ކޯޓެއް ގާއިމް ކުރުމާއި، ރަށުގެ ސްކޫލުގައި މަލްޓިޕާޕަސް ހޯލެއް ތަރައްގީ ކުރުމުގެ އިތުރުން ރަށަށް ދިމާވެފައިވާ ރަށްގިރުމުގެ މައްސަލައަށް ހައްލުކޮށްދެއްވާނެ ކަމުގެ ޔަގީންކަން ރައީސް ވިދާޅުވިއެވެ. ރައީސް ވިދާޅުވީ މިއަހަރުގެ ތެރޭ ފަށާ މަޝްރޫއުތައް އަންނަ އަހަރުގެ ތެރޭ ނިންމާލެވޭނެ ކަމަށެވެ. އަދި އެރަށުގެ އެކި ދާއިރާގައި ހުރި މައްސަލަތައް ހައްލުކޮށްދެއްވުމުގެ އަމަލީ މަސައްކަތް ފެށިގެންދާތަން މިއަހަރުގެ ތެރޭ ފެނިގެންދާނެ ކަމަށެވެ. މީގެ އިތުރުން، އާރުޓީއެލް ސްޕީޑް ފެރީގެ ޚިދުމަތް ރޯދަމަހުގެ ކުރިން އެރަށަށް ލިބިގެންދާނެ ގޮތް ހަމަޖައްސަވައިދިނުމުގެ އިތުރުން ރަށުގެ ކުނި މެނޭޖްކުރުމުގެ ނިޒާމްވެސް ގާއިމްކޮށްދެއްވާނެ ކަމުގައި ރައީސް ވިދާޅުވިއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0