ރައީސް މިއަދު ވަޑައިގަތީ ހަދިޔާއަކާ އެކީ ރައްޔިތުން އުފާ ކުރުމަށް: ޝުޖާއު

Read Time:5 Minute, 4 Second

(ފޮޓޯ ކްރެޑިޓްސް: ވަގުތު)

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރަށްރަށަށް ކުރައްވާ ދަތުރުފުޅަކީ ހުސްއަތާ ކުރައްވަމުން ގެންދަވާ ދަތުރުފުޅެއް ނޫން ކަމަށާއި، މިއަދު ތަކަންދޫއަށް ވަޑައިގަތީ ހަދިޔާއަކާ އެކީ ރައްޔިތުން އުފާކޮށްދިނުމަށް ކަމަށް ބާރަށު ދާއިރާގެ މެންބަރު އިބްރާހީމް ޝުޖާއު ވިދާޅުވެއްޖެއެވެ. ރައީސް މިހާރު ހއ. އަށް ކުރައްވާ ދަތުރުފުޅުގައި މިއަދު ވަޑައިގަތީ ތަކަންދޫއަށެވެ. ތަކަންދޫގައި މިއަދު ބޭއްވި ޖަލްސާގައި ވާހަކަ ދައްކަވަމުން ޝުޖާއު ވިދާޅުވީ، މިއަދަކީ ތަކަންދޫ ރައްޔިތުންނަށް ވަރަށް އުފާވެރި ދުވަހެއް ކަމަށާއި، ރައީސް އަބަދުވެސް ދެއްވާ އިރުޝާދަކީ ރައްޔިތުންނާ ގާތުން މަސައްކަތްކުރެއްވުމަށެވެ.

އެގޮތުން އެމަނިކުފާނުގެ އެޖެންޑާގެ އެންމެ ކުރީގައި ކައުންސިލްތަކަށް އިސްކަންދެއްވައިގެން ކުރިއަށްގެންދަވާ މަޝްރޫއުތައް ތަކަންދޫގައިވެސް ވަނީ ފައްޓަވާފައެވެ. އެގޮތުން ތަކަންދޫ ކައުންސިލްގެ އާ އިމާރާތުގެ ބިންގާ އެޅި، އަދި މިއަދުން ފެށިގެން ދިއްދޫއަށް ފައިސާ ނެގުމަަށް ދިއުމަށް ކުރާ ހޭދަ ނިމުމަކަށް ގެނެސްދެއްވާ ކޭޝްކާޑު އެކަކު އަތުން އަނެކަކު އަތަށް ދީގެން ފައިސާ ނެގުމަށް ނަގާ ރިސްކު މިއަދުން ފެށިގެން ނިމުމަކަށް އެމަނިކުފާނު ގެނެސްދެއްވައިފި ކަމަށްވެސް ޝުޖާއު ވިދާޅުވިއެވެ.

” އޭޓީއެމްގެ ޚިދުމަތް މިއަދުން ފެށިގެން ތަކަންދޫގެ ރައްޔިތުންނަށް ފެށިގެންދާނެ. އެމަސައްކަތުގެ އަމަލީ ބައި މިއަދު ފެށިގެންދާނެ. މިއީ ވަރަށް ބޮޑު ކާމިޔާބީއެއް،. ތަކަންދޫގެ ރައްޔިތުން އެންމެ ބޮޑަށް އިންތިޒާކުރަމުންދިޔައީ ފުލުހުންގެ ޚިދުމަތް އެރަށުގައި ގާއިމްކުރުމަށް. ރައީސްގެ ޚާއްސަ އިސްނެންގެވުމަކާއި އެކީގައި މި ޚިދުމަތް ތިޔަ ލޮބުވެތި ރައްޔިތުންނަށް ފޯރުކޮށްދިނުމަށްޓަކައި ތަކަންދޫގެ އިމާރާތެއްގައި ފުލުހުންނާއި ގުޅިގެން ދާދި ދެންމެއަކު ފެށިގެން އެދިޔައީ.” ޝުޖާއި ވިދާޅުވިއެވެ.

ޝުޖާއު ވިދާޅުވީ، ޗުއްޓީއެއް ލިބިއްޖެއްޔާ އަބަދުވެސް ރައްޔިތުންގެ ހާލު ބެއްލެވުމަށް ރައްޔިތުންގެ ގާތަށް ދިޔުމަށް ރައީސް އަބަދުވެސް އިރުޝާދު ދެއްވާ ކަމަށެވެ. އެގޮތުން ލާމަރުކަޒީ ނިޒާމު އޭގެ ފުރިހަމަ މާނައިގައި ހިންގަންޖެހޭނެ ކަމަށް ވަކާލާތުކުރަމުންދާ ހަމައެކަނި ރައީސަކީ ވެސް ޑރ. މުހައްމަދު މުއިއްޒު ކަމަށް ޝުޖާއު ވިދާޅުވިއެވެ.

” މިއީ އަޅުގަނޑުގެ ދެވަނަ ޗުއްޓީ މިއާދެވުނީ ރައީސްގެ ޚާއްސަ ހަދިޔާތަކަކާއެކީގައި، ފުރަތަމަ ދަތުރުގައި ރައްޔިތުން އެދިވަޑައިގެންނެވި ވަރަށް މުހިންމު އެއްބޭނުން އެބައޮތް. އަޅުގަނޑު އުންމީދު ކުރަނީ ތިޔަ ލޮބުވެތި ރައްޔިތުންނަށް މިހާރު އުފުލަން ޖެހިފަ އޮތް ތަކުލީފުތަކަށް ހައްލު އިރާދަކުރެއްވިިއްޔާ އަވަސް މުސްތަގުބަލެއްގައި ރައީސް ހޯއްދަވައިދެއްވާނެ ކަމަށް.” ޝުޖާއު ވިދާޅުވިއެވެ.