57 ރަށެއްގައި 12،000 ހައުސިން ޔުނިޓް އަޅަަން ކޮންޓްރެކްޓަރުން ހޯދަން އިއުލާންކޮށްފި

Read Time:4 Minute, 21 Second

(ފޮޓޯ ކްރެޑިޓްސް: ވަގުތު)

ރާއްޖޭގެ 57 ރަށެއްގައި 12،000 އަށްވުރެ ގިނަ ހައުސިން ޔުނިޓް އަޅަން ބޭނުންވާ ކޮންޓްރެކްޓަރުން ހޯދަން ފިނޭންސް މިނިސްޓްރީން އިއުލާންކޮށްފިއެވެ. ސަރުކާރުން މިއަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅައި، ފާސްކޮށްފައިވާ 56.6 ބިލިއަން ރުފިޔާގެ ބަޖެޓުގައި އެންމެ ބޮޑު އިސްކަމެއް ދީފައިވަނީބޯހިޔާވަހިކަމުގެ މައްސަލަ ހައްލުކުރަން ގިނަ މަޝްރޫއުތަކެއް ހިމަނައިގެން ކަމަށް މީގެ ކުރިން ރައީސުލްޖުމްހޫރިއްޔާ ޑރ. މުޙައްމަދު މުއިއްޒުވަނީ ވިދާޅުވެފައެވެ. އަދި އަތޮޅުތެރޭގެ ރަށްރަށަށް ކުރައްވަމުން ގެންދަވާ ދަތުރުފުޅުތަކުގައިވެސް އެމަނިކުފާނު ގެންދަވަނީ މިކަން ތަކުރާރުކުރައްވަމުންނެވެ.

މީގެ އިތުރުން އެމަނިކުފާނު ވަނީ މިމަހުގެ ތެރޭގައި އެ މަޝްރޫއުތައް ހިންގުމަށް ބޭނުންވާ ކޮންޓްރެކްޓަރުން ހޯދަން އިއުލާންކުރައްވާނެ ކަމަށްވެސް ވިދާޅުވެފައެވެ. ފިނޭންސް މިނިސްޓްރީން މިއަދު ވަނީ، މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރގެ އެދުމުގެ މަތިން، ރާއްޖޭގެ 57 ރަށެއްގައި ޕަބްލިކް ހައުސިންގ ޕްރޮޖެކްޓްގެ ދަށުން 12،000 އަށްވުރެ ގިނަ ހައުސިން ޔުނިޓް އެޅުމަށް ބޭނުންވާ ކޮންޓްރެކްޓަރު ހޯދުމަށް އިއުލާނުކޮށްފައެވެ.

މި މަޝްރޫއުގެ ދަށުން ހައުސިން ޔުނިޓު އެޅުމަށް ހަމަޖެހިފައިވަނީ ރަށްތައް ހަތަރު ކެޓަގަރީއަކަށް ބަހާލައިގެންނެވެ. އެއީ 50 ޔުނިޓާހަމައަށް ތަރައްގީ ކުރާ ރަށްތަކުގެ ކެޓަގަރީއާއި 51 ޔުނިޓާއި 150 އާ ދެމެދުގެ ހައުސިން ޔުނިޓު އަޅާ ރަށްރަށުގެ ކެޓަގަރީއާއި، 200 ޔުނިޓާއި 250 ހައުސިން ޔުނިޓު އަޅާ ރަށްރަށުގެ ކެޓަގަރީއާއި، 300އަށްވުރެ ގިނަ ހައުސިން ޔުނިޓު އަޅާ ކެޓަގަރީގެ ރަށްރަށެވެ. 50 ޔުނިޓަށްވުރެ މަދުން ހައުސިން ޔުނިޓް އަޅާ ރަށްތަކުގެ ކެޓަގަރީގައި 18 ރަށެއް ހިމެނެ އެވެ. އަދި 51 ޔުނިޓާއި 150 ޔުނިޓާ ދެމެދުގެ އަދަދަށް ހައުސިން ޔުނިޓު އަޅާ ކެޓަރީގައި 17 ރަށެއް ހިމެނޭއިރު، 10 ރަށެއްގައި 200 ޔުނިޓާއި 250 ހައުސިން ޔުނިޓާ އަޅާ ކެޓަގަރީގައި 10 ރަށެއް ހިމެނެ އެވެ. 300 އަށްވުރެ ގިނަ ހައުސިން ޔުނިޓް އަޅާ ކެޓަގަރީގެ ރަށްތަކުގެ ތެރޭގައި 12 ރަށެއް ހިމެނެ އެވެ.

ލޭ ސަރަހައްދުގައި 15،000 ހައުސިން ޔުނިޓާއި ރަށްރަށުގައި 12،000 ހައުސިން ޔުނިޓާ އެކު ޖުމްލަ 27،000 ހައުސިން ޔުނިޓްގެ މަސައްކަތް މި އަހަރު ކުރިއަށް ދާނެކަން ކަމަށް ރައީސް ކުރިން ވިދާޅުވެފައިވެ އެވެ.