ދިއްދޫ ހޮސްޕިޓަލުގެ ހިދުމަތްތައް ފުޅާކޮށް އައު އިމާރާތުގެ މަސައްކަތް މިއަހަރު މެދުތެރޭ ފެށޭނެ: ރައީސް

Read Time:5 Minute, 21 Second

(ފޮޓޯ ކްރެޑިޓްސް: ވަގުތު)

ހއ. ދިއްދޫ ހޮސްޕިޓަލުގެ ހިދުމަތްތައް ފުޅާކޮށް އައު އިމާރާތެއް އެޅުމުގެ މަސައްކަތް މިއަހަރު މެދުތެރޭ ފެށޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. ރައީސް ޑރ. މުއިއްޒު ހއ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގައި ދިއްދޫއަށް ވަޑައިގެން އެރަށު ރައްޔިތުންނާއި ބައްދަލު ކުރައްވާ ވާހަކަފުޅުދައްކަވަމުން ރައީސް ވިދާޅުވީ، މިހާރު މިރަށުގައި ހުރި ހޮސްޕިޓަލަކީ މި އާބާދީގެ ހޮސްޕިޓަލެއް ނޫން ކަމަށެވެ. މި އަތޮޅާއި ސަރަހައްދުގެ އެތައް ބަޔަކު ބޭނުން ކުރާނެ، އަދި ކުރަމުންދާނެ ހޮސްޕިޓަލެއް ކަމަށް ރައީސް ވިދާޅުވިއެވެ.

“އަޅުގަނޑުމެންގެ ސަރަހައްދީ ތަރައްގީގެ ވިސްނުމުގައި ގާއިމް ކުރެވިގެން ދާނެ، ފުޅާ ކުރަން ޖެހޭ މުހިންމު ހޮސްޕިޓަލެއް، އެހެންވީމަ އަޅުގަނޑު އެގޮތަށް ވައުދުވީ، އަޅުގަނޑު ވައުދުވީ މި ދެންނެވި ދުރު ރާސްތާއަށް ވިސްނައިގެން،”. ރައީސް ވިދާޅުވިއެވެ. ރައީސް ވިދާޅުވީ، މިރަށު ހޮސްޕިޓަލުގެ ހިދުމަތް އިތުރުކުރުމަށްޓަކައި ހޮސްޕިޓަލްގެ އައު އިމާރާތެއް އަޅަން ޖެހޭ ކަމަށާއި، އެތަނުގައި އެކިއެކި ހިދުމަތްތައް ހުންނަން ޖެހޭނެ ކަމަށެެވެ.

(ފޮޓޯ ކްރެޑިޓްސް: ވަގުތު)

“މިރަށަށް އަންނަ އެކި ރައްޔިތުން ބޭނުންވާ، ހޯދަން އަންނަ ހިދުމަތްތައް، މިރަށު ރައްޔިތުން އެދޭ އެކި ކަހަަލަ ހިދުމަތްތައް ދެވެން ޖެހޭނެ، ސީޓީ ސްކޭންގެ ހިދުމަތް މިތަނުގައި ހުންނަން ޖެހޭނެ، މިހާރު ހުރި އިމާރާތުގެ ތެރޭގައި އެ ޖާގަ ހުރި ކަމަށްވަންޏާ އެ ހިދުމަތް ގާއިމް ކުރަން، އަޅުގަނޑު މިހާރު ވާނީ ކަމާއި ބެހޭ ވަޒީރުންނަށް ދަންނަވާފައި، އަދި ނެތް ކަމުގައިވަންޏާމުން، ވީހާވެސް އަަވަކަށް އެކަން ކުރުން.”. ރައީސް ވިދާޅުވިއެވެ. ރައީސް ވިދާޅުވީ، ދެން ވެސް ހުންނަ މުހިންމު ސިއްހީ ހިދުމަތްތައް ދެވޭ ފަރުވާތައް ދެވޭ ފެންވަރަކަށް ގާއިމް ކުރެވެގެންދާ ހޮސްޕިޓަލެއް އަޅައިދެއްވާނެ ކަމަށެވެ.

“އެ މަސައްކަތް މި އަހަރުގެ މެދަކާއި، ހަަމަައަށްދާއިރު، ބާރު ސްޕީޑްގައި ކުރިއަށްދާނެ، އަޅުގަނޑު ބަލަނީ ކުރިއަށް އޮތް މަސް ދުވަސް ނިމެންވާއިރަށް ބަޔަކާއި މަސައްކަތް ހަވާލު ކުރެވި، މަސައްކަތް ފަށަން،”. ރައީސް ވިދާޅުވިއެވެ. އަދި ސްޕީޗް ތެރެޕީގެ ހިދުމަތް މިހާރު ހުރި ހޮސްޕިޓަލް ތެރޭގައި ގާއިމް ކުރުމަށް ވެސް ވަޒީރުންނަށް ދަންނަވާފައިވާނެ ކަަމަށްވެސް ރައީސް ވިދާޅުވިއެވެ. ރައީސް ވިދާޅުވީ، މާލެ ސަރަހައްދު ގޮތަށް، އެންމެ އުތުރާއި ދެކުނު އަދި ރާއްޖެގެ ހަތް ސަރަހައްދެއްގައި ވެސް ކަންކަން ހުންނަން ޖެހޭނީ އެންމެ ފުރިހަމައަށް، ހުރިހާ ހިދުމަތެއް ލިބޭ ގޮތަށް ގާއިމް ކުރެވިފައި ކަމަށެވެ.

“މީގެ ބޭނުމަކީ ދުރު ރާސްތާއަށް އަޅުގަނޑުމެންގެ ގައުމު ތަރައްގީގެ ދުވެލީގައި ބާރު ސްޕީޑްގައި ކުރިއަށް ގެންދިއުމަށް މަގުފަހި ކުރުން،”. ރައީސް ވިދާޅުވިއެވެ. އެހެންވެ ތަރައްގީ ގެންނަމުން މި ދަނީ ރަށުގެ ރައްޔިތުންގެ ކުރިއެރުމާއި ސަރަހައްދުގެ ކުރިއެރުން ގުޅިލާމެހިފައިވާ ކަމަށްވެސް ރައީސް ވިދާޅުވެފައި ވެއެވެ.