Read Time:4 Minute, 29 Second
ހއ. ނާގޯށީގައި ތަރައްގީކުރަން މޯލްޑިވްސް ޓުއަރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) އާ ހަވާލުކޮށްފައިވާ ރިސޯޓު ހުޅުވުމަށްޓަކައި ސަރުކާރުން ދޭން ޖެހޭ އެހީތެރިކަން ފޯރުކޮށްދީ، އެ ރިސޯޓު ވަރަަށް އަވަހަށް ހުޅުއްވައިދެއްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެ އެވެ. ނާގޯށީގައި ރިސޯޓު ތަރައްގީކުރަން އެމްޓީޑީސީއާ މީގެ ކުރިން ތިން ފަހަރެއްގެ މަތިން ހަވާލުކޮށްފައިވެއެވެ. އެމްޓީޑީސީއާ ނާގޯށި ފުރަތަމަ ހަވާލުކުރީ 25 އަހަރު ދުވަހުގެ މުއްދަތަކަށެވެ. ނަމަވެސް ރިސޯޓު ތަރައްގީ ކުރަން ދިން މުއްދަތު ހަމަވިއިރު ވެސް އެ ރިސޯޓު ތަރައްގީ ނުކުރެވުމުގެ ސަަބަބުން އެއްބަސްވުން ބާތިލް ކުރިއެވެ.
އޭގެ ފަހުން އަނެއްކާ ވެސް 2017 ވަނަ އަހަރު އެ ރިސޯޓު ތަރައްގީ ކުރަން އެމްޓީޑީސީއާ ހަވާލުކުރި އެވެ. ނަމަވެސް އެ އެއްބަސްވުމުގައި، ކުރު މުއްދަތެއްގެ ތެރޭގައި ދަރަނި ދެއްކުމަށް ބުނެފައި އޮތުމުން އިންވެސްޓަރަކު ނުވެ ރަށް ތަރައްގީ ނުކުރެވުނު ކަމަށް އެމްޓީޑީސީން ބުނެފައިވެއެވެ.
އެ ރަށުގައި ރިސޯޓު ތަރައްގީކުރަން ދެން އެކުންފުންޏާ ހަވާލުކުރީ 2020 ވަނަ އަހަރު އެވެ. އެފަހުންވެސް އެ ރަށުގައި ރިސޯޓު ތަރައްގީކުރެވިފައި ނުވެއެވެ.
ހއ. އަތޮޅުގެ ރަށްތަކަށް ރައީސް ޑރ. މުއިއްޒު ކުރައްވަމުން ގެންދަވާ ދަތުރުފުޅުގައި އެއަތޮޅު ފިއްލަދޫއަށް ވަޑައިގެން ރައްޔިތުންނާ ވާހަކަފުޅު ދައްކަވަމުން ރައީސް ވިދާޅުވީ އެމްޓީޑީސީއާ ހަވާލުކޮށްގެން ނާގޯށީގައި ރިސޯޓު ތަރައްގީކުރަން ސަރުކާރުން ހަވާލުކޮށްފައިވާތާ ގިނަ އަހަރުތަކެއް ވެފައިވާ ކަމަށެވެ. އަދި އެތަނުގައި ރިސޯޓެއް ތަރައްގީވެގެން ދިއުމަކީ އެ ސަރަހައްދުގެ ރައްޔިތުންނަށް ފައިދާ ކުރާނެ މުހިއްމު މަޝްރޫއެއް ކަމަށްވެސް ރައީސް ވިދާޅުވިއެވެ.
“އިރާދަކުރެއްވިއްޔާ އެމްޓީޑީސީއަށް އެމަގު އަޅުގަނޑުމެން ފަހިކޮށްދޭނަން. ފަހިކޮށްދީ އެ ރަށް ރިސޯޓެއްގެ ގޮތުގައި ތަރައްގީކޮށް ސަރުކާރުން އެހީތެރިކަން ދީގެން ހުޅުވުން އެއީ މިހާރު އަޅުގަނޑުމެންގެ އަމާޒަކީ އެކަންވެސް ކުރިއަށް ދާނެ. އަދި އިތުރު ރަށްތައްވެސް މިއަތޮޅުގެ ޓުއަރިޒަމަށް ފުޅާކޮށްދޭން ފުރުސަތު ދޭން ނިންމާފަ މިވަނީ” ރައީސް ވިދާޅުވި އެވެ.
އެކަމާ ގުޅޭ ގޮތުން އިތުރަށް ވާހަކަ ދައްކަވަމުން ރައީސް ވިދާޅުވީ، ނާގޯށީގެ މަސައްކަތް ނިންމުމަށް އެމްޓީޑީސީއަށް ލޯނު ފެސިލިޓީއެއް ދޫކުރުމުގެ މަޝްވަރާތައް މިހާރު ބީއެމްއެލްއާ އެކު ކުރިއަށްދާ ކަމަށެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0