Read Time:3 Minute, 2 Second
ސައުދީ އަރަބިއާގެ އަލް ހިލާލް އަށް ކުޅެމުން އަންނަ ބްރެޒިލްގެ ފޯވާޑު ނޭމާ އެ ކުލަބު ދޫކޮށްލަން ނިންމާފައިވާކަމަށް އެ ކުލަބުން ހާމަކޮށްފިއެވެ. އަލް ހިލާލް އިން އެކްސްގައި ކޮށްފައިވާ ޕޯސްޓެއްގައި ބުނެފައިވަނީ ދެފަރާތުން ވާހަކަ ދެއްކުމަށްފަހު ނޭމާ އާއި އަލް ހިލާލް އިން ހަދާފައިވާ ކޮންޓްރެކްޓް އުވާލަން ނިންމާފައިވާކަމަށެވެ. އުމުރުން 32 އަހަރުގެ ނޭމާ އަށް އަނިޔާވެ މިވަގުތުވެސް ހުރީ ކުޅުމާއިދުރުގައެވެ. 2023 ވަނަ އަހަރު ބްރެޒިލްގެ ގައުމީ ޓީމަށް ކުޅެނިކޮށް ނޭމާގެ ކަކުލަށް ލިބުނު އަނިޔާގެ ސަބަބުން އަދިވެސް ކުރީގެ ކުޅުމަށް ނޭމާއަށް އާދެވޭ ގޮތެއް ނުވެއެވެ.
ފްރާންސްގެ ޕީއެސްޖީ އިން ސައުދީ އަރަބިއާގެ އަލް ހިލާލްއަށް ނޭމާ ބަދަލުވެފައިވަނީ 2023 ވަނަ އަހަރުގެ އޮގަސްޓް މަހުއެވެ. 98 މިލިއަން ޑޮލަރުގެ އަގަކަށް އަލް ހިލާލް އަށް ބަދަލުވި ނޭމާއަށް އަނިޔާގެ ސަބަބުން އެ ކުލަބަށް މިހާތަނަށް ކުޅެވިފައިވަނީ އެންމެ ހަތް މެޗެވެ. ބްރެޒިލްގެ މީޑިއާ އިން ރިޕޯޓުކޮށްފައިވާގޮތުން ނޭމާ އަލް ހިލާލް ދޫކޮށްލުމަށްފަހު ދެން އޭނާ އެނބުރި ދާނީ އޭނާގެ ކުޑައިރުގެ ކުލަބު ސެންޓޯސްއަށެވެ. ބްރެޒިލްގެ ގައުމީ ޓީމަށް މިހާތަނަށް އެންމެ ގިނަ ގޯލު ކާމިޔާބުކޮށްދީފައިވާ ނޭމާ 2013 ވަނަ އަހަރު ސްޕެއިންގެ ބާސެލޯނާއަށް ބަދަލު ވުމުގެ ކުރިން އޭނާ ކުޅެމުން ދިޔައީ ސެންޓޯސްއަށެވެ. ނޭމާ ވަނީ މިހާތަނަށް ބްރެޒިލްގެ ގައުމީ ޓީމަށް 79 ގޯލު ކާމިޔާބުކޮށްދީފައެވެ.
ސްޕެއިންގެ ބާސެލޯނާއަށް ކުޅުމަށްފަހު 2017 ވަނަ އަހަރު ފްރާންސްގެ ޕީއެސްޖީއަށް ނޭމާ ބަދަލުވެފައިވަނީ ދުނިޔޭގެ ރެކޯޑު އަދަދެއް ކަމަށްވާ 222 މިލިއަން ޔޫރޯގެ އަގަކަށެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0