Read Time:2 Minute, 58 Second
(ފޮޓޯ ކްރެޑިޓްސް: ގެޓީ އިމޭޖާސް)
އެމެރިކާގެ 47 ވަނަ ރައީސްކަމުގެ ހުވާ ޑޮނަލްޑް ޓްރަމްޕް މިއަދު ކޮށްފިއެވެ. މިއީ އެމެރިކާގެ ރައީސްކަމުގެ ހުވާ ޓްރަމްޕް ކުރާ ދެވަނަ ފަހަރެވެ. މީގެކުރިން ޓްރަމްޕް އެމެރިކާގެ ރައީސްކަން ކުރެއްވީ 2017 ވަނަ އަހަރުން ފެށިގެން 2021 އަށް އެ ގައުމުގެ 45 ވަނަ ރައީސްގެ ގޮތުގައެވެ. ޓްރަމްޕްގެ ދައުރު ހަމަވެގެން ބޭއްވި ރިޔާސީ އިންތިހާބުގައި އޭނާ ވާދަކުރިއެވެ. އެކަމަކު، މި ފަހަކާ ޖެހެންދެން އެމެރިކާގެ ރައީސް ކަމުގައި ހުންނެވި ޖޯ ބައިޑަން އަތުން ޓްރަމްޕަށް ކުރިމަތިވީ ނާކާމިޔާބީއެވެ.
ޓްރަމްޕް ހުވާކުރެއްވުމުގެ ރަސްމިއްޔާތު އޮތީ އެމެރިކާގެ ވެރިރަށް ވޮޝިންޓަނުގައި ހުންނަ ކެޕިޓަލް ހިލްގައެވެ. މިދިޔަ ރިޔާސީ އިންތިހާބުގައި ޑިމޮކްރެޓްސްގެ ކެންޑިޑޭޓް އަދި ކުރީގެ ނައިބު ރައީސް ކަމަލާ ހެރިސްއާ ވާދަކޮށް އުމުރުން 78 އަހަރުގެ ޓްރަމްޕް އިންތިހާބު ކާމިޔާބު ކުރީ 277 އިލެކްޓޯރަލް ވޯޓުންނެވެ. ކަމަލާއަށް ލިބިވަޑައިގަތީ 224 އިލެކްޓޯރަލް ވޯޓެވެ. ޓްރަމްޕް ރައީސް ކަމަށް އައިއިރު، ގާނޫނު ހަދާ މަޖިލީހުގެ މަތިގެ، ސެނެޓްގެ އަޣުލަބިއްޔަތު ޑިމޮކްރެޓްސްގެ އަތުން ޓްރަމްޕްގެ ރިޕަބްލިކަން އަށް ވަނީ ލިބިފައެވެ. ޓްރަމްޕް ރިޔާސީ ދައުރު ފުރިހަމަކޮށްފި ނަމަ، އޭނާ ވާނީ އެމެރިކާގެ ވެރިކަމުގައި އުމުރުން އެންމެ ދޮށީ ރައީސަށެވެ. ޓްރަމްޕް ދައުރު ނިންމާލާ އިރު، އުމުރުން 82 އަހަރުވާނެއެވެ.
އެމެރިކާގެ އެންމެ ދޮށީ ރައީސްގެ މަގާމު ހޯއްދަވާފައިވަނީ ބައިޑަންއެވެ. އޭނާ އަށް ވަނީ 81 އަހަރެވެ. ޓްރަމްޕްގެ ރަނިން މޭޓު، ޖޭޑީ ވާންސް ވަނީ ނައިބު ރައީސްކަމުގެ ހުވާކުރައްވައިފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0