އޮޕަރޭޝަން “ކުރަނގި”: މާލޭގައި ތިބި ބިދޭސީންގެ މައުލޫމާތު ނަގަނީ

Read Time:3 Minute, 31 Second

(ފޮޓޯ ކްރެޑިޓްސް: ވަގުތު)

ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ކުރިއަށްގެންދާ “އޮޕަރޭޝަން ކުރަނގި” ގެ ދަށުން ބިދޭސީންގެ މަޢުލޫމާތު އެއްކުރުމުގެ ހަރަކާތެއް މިއަދު މާލެ ސަރަހައްދުގައި ފަށައިފިއެވެ. މި ހަރަކާތް ކުރިއަށްދަނީ މިއަދު ހެނދުނު 8:00 އިން ހަވީރު 18:00 އާ ހަމައަށެވެ. މި އޮޕަރޭޝަނުގައި ވުޒާރާގެ 75 މުވައްޒަފުން ހަރަކާތްތެރިވާ ކަމަށް އެ ވުޒާރާއިން ވިދާޅުވެފައިވެއެވެ

އޮޕަރޭޝަން ކުރަނގި ފެށިފައިވަނީ މިދިޔަ އަހަރުގެ މެއި މަހުގެ 2 ވަނަ ދުވަހުއެވެ. މި އޮޕަރޭޝަންގެ މައިގަނޑު މަޤްޞަދަކީ ރާއްޖޭގައި އުޅޭ ހުރިހާ ބިދޭސީންގެ ފިންގަރ ޕްރިންޓާއި ފޮޓޯ އަދި މަޢުލޫމާތު އެއް އަހަރު ދުވަހުގެ ތެރޭގައި އެއްކުރުމެވެ. ވުޒާރާއިން ވިދާޅުވެފައިވާ ގޮތުގައި މި ޕްރޮގްރާމުގެ ފުރަތަމަ މަރުޙަލާގައި ބިދޭސީ މަސައްކަތްތެރިންގެ މަޢުލޫމާތު އެއްކުރި ނަމަވެސް އެ ފަރާތްތަކާ މެދު ފިޔަވަޅު އެޅުމަކީ ވުޒާރާގެ މަޤްޞަދެއް ނޫނެވެ. އެގޮތުން ގަވާއިދާ ޚިލާފަށް އުޅޭ ބިދޭސީންގެ ތެރެއިން ގަވާއިދުގެ ތެރެއަށް ވަންނަން ބޭނުންވާ ބިދޭސީންނަށް އެ ފުރުޞަތު ފަހިކޮށްދެވޭނެ ކަމަށް ވުޒާރާއިން ވިދާޅުވެފައިވެއެވެ. ފުރަތަމަ މަރުޙަލާ ނިމުމަށްފަހު ރަސްމީ ލިޔެކިޔުން ނެތި، ގަވާއިދާ ޚިލާފަށް އުޅޭ ބިދޭސީންގެ ބަޔޯ މެޓްރިކް އައިޑެންޓިފިކޭޝަނެއް ހަދައި، އެ މީހުންގެ ޤައުމުތަކުގެ އެމްބަސީތަކާ ގުޅިގެން އެ މީހުން އަނބުރާ ފޮނުވާލުމަށް ވަނީ ހަމަޖެހިފައެވެ.

މި އޮޕަރޭޝަންގައި މިހާތަނަށް 50 ރަށެއްގައި މަސައްކަތް ނިންމާފައިވާ އިރު 18,000 އަށްވުރެ ގިނަ ބިދޭސީންގެ މަޢުލޫމާތު އެއްކުރެވިފައިވާ ކަމަށް ވުޒާރާއިން ހާމަކޮށްފައިވެއެވެ. މި އޮޕަރޭޝަނަކީ ރާއްޖޭގައި އުޅޭ ބިދޭސީންގެ ސައްޙަ މަޢުލޫމާތު އެއްކޮށް، ގަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމަށް ސަރުކާރުން ކުރަމުންދާ މަސައްކަތުގެ ބައެއް ކަމަށް ވުޒާރާއިން ފާހަގަކޮށްފައިވެއެވެ.