Read Time:6 Minute, 39 Second
(ފޮޓޯ ކްރެޑިޓްސް: ވަގުތު)
ސައްހަ ނޫން ފޯމްތަކެއްގެ މުގާބިލުގައި ޕާޓީއަށް މެންބަރުން އިތުރުކޮށް ދިވެހި ލޮބުވެތި ރައްޔިތުންގެ ހައްގުތަކެއް ގެއްލޭފަދަ ގޮތަކަށް އެއްވެސް ކަމެއް ކުރުމަކީ ރައީސް އަދި ލީޑާޝިޕުން އެއްވެސް ވަރަކަށް ބަލައިގަންނަ ނުވަތަ ހިތްވަރުދޭކަމެއް ނޫން ކަމަށް ޕީއެންސީއިން ވިދާޅުވެއްޖެއެވެ.
ޕީއެންސީއިން ނެރުނު ބަޔާނެއްގައި ވިދާޅުވީ އެ ޕާޓީއަށް މެންބަރުން އިތުރު ކުރުމަށް އެ ޕާޓީއިން މުޅި ރާއްޖެއަށް ހުޅުވާލައިގެން އެކްޓިވިސްޓުންނާއި ހެޔޮއެދޭ ފަރާތްތަކުގެ ބައިވެރިވުމާއެކު ހިންގި ” މެންބާޝިޕް ޑްރައިވް” ގައި ޕާޓީއަށް ހުށަހެޅުނު އެތައްހާސް ފޯމެއް އެ ޕާޓީގެ ފަރާތުން އިލެކްޝަންސް ކޮމިޝަނަށް ހުށަހަޅާފައި ވަނިކޮށް މަދު ނަމަވެސް ސައްހަ ނޫން ފޯމްތަކެއް ހުށަހެޅިފައިވާކަން މިހާރު ފާހަގަކުރެވިފައިވާ ކަމަށެވެ.
“މެންބާޝިޕް ޑްރައިވް” އަކީ ރާއްޖޭގައި މިހާތަނަށް އެއްފަހަރާ އެންމެ ގިނަ އަދަދަކަށް ސިޔާސީ ޕާޓީއަކަށް މެންބަރުން ވަނުމަށް ފޯމު ހުށަހެޅުނު އެއް ހަރަކާތް ކަމަށް ޕީއެންސީއިން ވިދާޅުވެއެވެ. އަދި އިދާރީ މުއައްޒަފުން ނުހަނު ބުރަކޮށް މަސައްކަތްކޮށް ޕާޓީގެ އިލެކްޝަންސް ޕޯޓަލް މެދުވެރިކޮށް އެ ފޯމުތައް އަޕްލޯޑް ކުރަމުން ދިޔަ ނަމަވެސް ޕާޓީއަށް ލިބޭ ފޯމުތަކުގެ ސައްހަކަން ކަށަވަރު ކުރުމުގެ ގާބިލުކަން ޕާޓީގައި ނެތުމުގެ ނަތީޖާއަކީ ފޯމެއްގެ ސައްހަަކަމާއިމެދު ސުވާލު އުފެދުން ކަމަށް ވިދާޅުވިއެވެ.
(ފޮޓޯ ކްރެޑިޓްސް: ޕީއެންސީ)
ސުވާލުއުފެދޭ ހިސާބަކީ އީސީއަށް ފޯމު ހުށަހެޅުމުގެ ފަހުގައި މަރުހަލާއެއް ކަމަށް ޕީއެންސީއިން ވިދާޅުވިއެވެ. ގިނަ ޕާޓީ އެކުލެވޭ ވާދަވެރި ސިޔާސީ މާހައުލެއް ރާއްޖޭގައި ވުޖޫދުކުރެވުނު ހިސާބުން ފެށިގެން މިއަދާއި ހަމައަށް ވެސް ރާއްޖޭގައި ވަސީލަތްތައް ހުރި ގޮތުން މިކަމަކީ މި ޕާޓީއަށް އެކަނި އޮތް ގޮންޖެހުމެއް ނޫންކަން ކަމަށް ވިދާޅުވިއެވެ.
” މިހާތަނަށް އެކި ފަރާތްތަކުން ސައްހަ ނޫން ފޯމުތަކެއް މި ޕާޓީގެ ނަމުގައި އީސީއަށް ހުށަހަޅާފައިވާކަން ބަޔާންކޮށް އީސީއަށާއި ދިވެހި ފުލުހުންގެ މުއައްސަސާއަށް ޝަކުވާތަކެއް ލޮގް ކުރައްވާފައިވާތީ އެ ދެ މުއައްސަސާއިން ވެސް ވަނީ އެ މައްސަލަތައް ބައްލަވަމުން ގެންދަވާކަން މި ޕާޓީއަށް އަންގާފައި.” ޕީއެންސީއިން ވިދާޅުވެއެވެ. އަދި އެ ޕާޓީއިން ވެސް ދަނީ އެފަދަ ފޯމްތައް ހުށަހެޅިފައިވާގޮތް ބަލަމުން ކަމުގައި ވިދާޅުވިއެވެ. އަދި ކޮންގްރެސް ޕާޓީގެ ފަރާތުން އެ ދެ މުވައްސަސާއަށް އެކަން ބެލުމުގައި ފުރިހަމަ އެއްބާރުލުން ދެމުންގެންދާނެކަން ދިވެހި ލޮބުވެތި ރައްޔިތުންނަށް ކަށަވަރުކޮށް އަރުވާ ކަމަށް ޕީއެންސީއިން ވިދާޅުވިއެވެ.
“ސައްހަ ނޫން ފޯމްތަކެއްގެ މުގާބިލުގައި މި ޕާޓީއަށް މެންބަރުން އިތުރުކޮށް ދިވެހި ލޮބުވެތި ރައްޔިތުންގެ ހައްގުތަކެއް ގެއްލޭފަދަ ގޮތަކަށް އެއްވެސް ކަމެއް ކުރުމަކީ މި ޕާޓީގެ ރައީސް އަދި ލީޑާޝިޕުން އެއްވެސް ވަރަކަށް ބަލައިގަންނަ ނުވަތަ ހިތްވަރުދޭކަމެއް ނޫން.” ޕީއެންސީއިން ވިދާޅުވިއެވެ. ޕީއެންސީއިން ވިދާޅުވީ އެ މައްސަލައަށް އަވަސް ހައްލެއް ގެނައުމަށާއި އެ ޕާޓީގެ މެންބަރުން އަދި ޖުމްލަކޮށް ދިވެހި ރައްޔިތުންހގެ ހައްގުތައް ކަށަވަރުކޮށްދިނުމަކީ ޒިންމާދާރި ސިޔާސީ ޕާޓީއެއްގެ ހައިސިއްޔަތުން އެ ޕާޓީއިން ކުރަންޖެހޭ ކަމެއް ކަމަށެވެ.
(ފޮޓޯ ކްރެޑިޓްސް: ވަގުތު)
ސައްހަނޫން ފޯމެއް މެދުކޮށް ޕީއެންސީއަށް ވެއްދުމުގެ އެއްވެސް މައްސަލައެެއް ކުރިމަތިވެފައިވާނަމަ އެ ޕާޓީއަށް މެއިލްކުރުމުން އެފަދަ ފޯމުތަކަށް އަވަސް ހައްލެއް ގެނެސްދިނުމަށް ކުރެވެންހުރި ހުރިހާކަމެއް ކޮށްދޭނެ ކަށަވަރުކަންދޭ ކަމަށް ޕީއެންސީއިން ވިދާޅުވިއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0