މޫސުމީ ބަދަލުތަކާއި ތިމާވެށީގެ ދާއިރާއިން މައުލޫމާތު ބަދަލުކުރުމަށް އެސްޓޯނިއާއެކު އެއްބަސްވުމެއްގައި ސޮއިކޮށްފި

Read Time:3 Minute, 39 Second

(ފޮޓޯ ކްރެޑިޓްސް: ރައީސް އޮފީސް)

މޫސުމީ ބަދަލުތަކާއި ތިމާވެށީގެ ދާއިރާއިން މަޢުލޫމާތު ބަދަލުކުރުމަށް ރާއްޖެއިން އެސްޓޯނިއާއެކު އެއްބަސްވުމެއްގައި ސޮއިކޮށްފިއެވެ. ރައީސުލްޖުމްޙުރިއްޔާ ޑރ. މުހައްމަދު މުއިއްޒު އެސްޓޯނިއާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގައި އެމަނިކުފާނު އެސްޓޯނިއާގެ މިނިސްޓަރ އޮފް ކްލައިމެޓް ޔޯކޯ އަލެންޑަރ އާއެކު ބޭއްވެވި ބައްދަލުކުރެއްވުމުގައި އިޔާދަކުރަނިވި ހަކަތައާއި ސްމާޓް ގްރިޑް އަދި ދެމެހެއްޓެނިވި ފަންނިއްޔާތުގެ ދާއިރާއިން އެސްޓޯނިއާއިން ގެންގުޅޭ އީޖާދީ އުކުޅުތަކުގެ އެހީގައި ޖައްވަށް ދޫކުރާ ވިހަ ގޭސްތައް މަދުކުރުމާއި، ހަކަތައަށް ކުރާ ޚަރަދުކުޑަކޮށް، ރާއްޖޭގެ ތިމާވެށީގެ ވިލުންތެރިކަން އިތުރުކުރުމަށް ވަރަށް ބޮޑު އެހީތެރިކަމެއް ލިބިގެންދާނެ ކަމަށެވެ.

ރާއްޖޭގެ މޫސުމީ އަދި އިޖުތިމާއީ ދާއިރާއިން މައުލޫމާތު ބަދަލު ކުރުމަށާއި އެހީދިނުމާއެކު އެ ދާއިރާތަކުގެ ކުރިއެރުމަށް ދެ ޤައުމު ގުޅިގެން މަސައްކަތްކުރުމަށް ވެވުނު އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ހާރިޖީ ވަޒީރު އަބްދުﷲ ހަލީލުއެވެ. އެސްޓޯނިއާގެ ފަރާތުން ސޮއިކުރެއްވީ އެސްޓޯނިއާގެ މޫސުމާ ބެހޭ ވަޒީރު ޔޯކޯ އަލެންޑަރއެވެ. ޚާރިޖީ ވުޒާރާއިން ވިދާޅުވި ގޮތުގައި މި އެއްބަސްވުމުގެ ބޭނުމަކީ މޫސުމީ ބަދަލުތަކަށް ވިލުންތެރިވުމާއި ތިމާވެށްޓަށް ދިމާވާ މައްސަލަތައް ހައްލުކުރުމާއި އިޢާދަކުރަނިވި ހަކަތަ ޤާއިމްކުރުމަށްކުރެވޭ މަސައްކަތްތައް ރާއްޖޭގައި ހަރުދަނާކުރުމެވެ.

ރާއްޖޭގައި ޑިޖިޓަލް ތަރައްޤީ ޤާއިމުކޮށް، ތިމާވެށީގެ ވިލުންތެރިކަން އިތުރުކުރުމުގައި އެސްޓޯނިއާ އާއެކު މަސައްކަތް ކުރެވިދާނެ ގޮތްތަކާ ގުޅޭގޮތުން ރައީސް ޑރ. މުޙައްމަދު މުޢިއްޒު، އެސްޓޯނިއާގެ ރައީސް ޑޮކްޓަރ އަލާރް ކަރިސްއާ މަޝްވަރާކުރެއްވިއެވެ. މި ދަތުރުފުޅުގައި ރައީސުލްޖުމްހޫރިއްޔާއާއެކު ދިވެހި ސަރުކާރުގެ އިސް ވަފުދެއް ބައިވެރިވެވަޑައިގަންނަވައެވެ.