އެސްޓޯނިއާއިން ރައީސަށް ދެންނެވީ، ސަޤާފީ ހޫނު މަރުހަބާއެއް!

Read Time:3 Minute, 28 Second

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެސްޓޯނިއާއަށް ކުރައްވާ ރަސްމީ ދަތުރުފުޅެއްގައި އިއްޔެ އެޤައުމަށް ވަޑައިގެންފިއެވެ. ރައީސުލްޖުމްހޫރިއްޔާ އެސްޓޯނިއާއަށް ކުރައްވާ މި ދަތުރުފުޅަކީ އެސްޓޯނިއާގެ ރައީސް ޑރ. އަލާރް ކަރިސްގެ ދަޢުވަތަކަށް ކުރައްވާ ދަތުރުފުޅެކެވެ. މި ދަތުރުފުޅުގައި އެމަނިކުފާނު އެސްޓޯނިއާއަށް ވަޑައިގެންނެވުމުން، އެގައުމުން އެމަނިކުފާނަށް މަރުހަބާ ދަންނަވާފައިވަނީ ސަޤާފީ ހަރަކާތްތަކަކާއެކުއެވެ.

މިއީ ރާއްޖޭގެ ރައީސަކު އެސްޓޯނިއާއަށް ކުރައްވާ ފުރަތަމަ ރަސްމީ ދަތުރުފުޅެވެ. ރައީސްގެ މި ދަރުތުފުޅުގެ މައިގަނޑު މަގްސަދަކީ ދެ ގައުމުގެ ދެމެދުގައި އޮތް ގުޅުން ބަދަހި ކުރުމާއި ޑިޖިޓަލް އަދި ސައިބަރ، އީ- ގަވަރނަންސް ދާއިރާ އާއި މޫސުމާއި ތިމާވެއްޓާއި ގުޅުން ހުރި މައްސަލަތަކާ ބެހޭ ގޮތުން ދެ ގައުމުގެ ދެމެދުގައި މަޝްވަރާ ކުރުމެވެ.

މިމަހުގެ 16 ވަނަ ދުވަހާ ހަމައަށް ރައީސް އެސްޓޯނިއާއަށް ކުރައްވާ މި ދަތުރުފުޅުގައި، އެމަނިކުފާނުގެ އަރިހުގައި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަވައެވެ. އަދި ރާއްޖޭގެ ފަންނިއްޔާތުގެ ދާއިރާގެ މާހިރުންގެ މައްޗަށް އެކުލެވިގެންވާ ވަފުދެއް ވެސް މި ދަތުރުފުޅުގައި ބައިވެރިވެވަޑައިގަންނަވައެވެ.

އެސްޓޯނިއާ އަކީ ޑިޖިޓަލް ރޭންކިން އަށް ބަލާއިރު ބޮޑެތި ކުރިއެރުންތަކެއް ހޯދާފައިވާ، ޓެކްނޮލޮޖީގެ ގޮތުން ޔޫރަޕްގައި އެންމެ ކުރިއަރާފައިވާ އެއް ގައުމެކެވެ. ރައީސްގެ މިދަތުރުފުޅާ ބެހޭ ގޮތުން ވާހަކަ ދައްކަވަމުން ދާޚިލީ ސަލާމަތާއި ފަންނިއްޔަތާއި ބެހޭ ވުޒާރާގެ ސްޓޭޓް މިނިސްޓަރ ޑރ. މުޙައްމަދު ކިނާނަތު ވިދާޅުވީ، އެ ދަތުރުފުޅުގައި މަޝްވަރާތައް ކުރެވި، ރަނގަޅު އެއްބަސްވުންތަކެއް އެގައުމާއެކު ގާއިމް ކުރެވިއްޖެ ނަމަ ރާއްޖެއަށް ޓެކްނޮލޮޖީގެ ދާއިރާއަށް ވަރަށް ބޮޑު އިންގިލާބެއް އަންނާނެ ކަމަށެވެ.