ފިއްޓެ ޕީއެންސީއަށް ވެއްދީ އެމްޑީޕީގެ ރޭވުމަކުން: ޝުޖާއު

Read Time:3 Minute, 14 Second

(ފޮޓޯ ކްރެޑިޓްސް: ވަގުތު)

ވައިކަރަދޫ ދާއިރާގެ އެމްޑީޕީ މެންބަރު ހުސައިން ޒިޔާދު (ފިއްޓެ) ޕީއެންސީއަށް ވެއްދުމަށް އިލެކްޝަން ކޮމިޝަނަށް ހުށަހެޅީ އެމްޑީޕީގެ ރޭވުމަކުން ކަމަށް ބާރަށު ދާއިރާގެ ޕީއެންސީ މެމްބަރު އިބްރާހިމް ޝުޖާއު ވިދާޅުވެއްޖެއެވެ. ފިއްޓެއަށް ނޭނގި އޭނާ ޕީއެންސީއަށް ވެއްދުމަށް އީސީއަށް ހުށަހެޅި ފޯމު މިހާރު އީސީން ވަނީ ބާތިލުކޮށްފައެވެ. އަދި މިފަދަ އަމަލެއް ހިންގި ފަރާތްތައް ހޯދައި ފިޔަވަޅު އަޅާނެ ކަމަށް ވެސް އެ ކޮމިޝަނުން ވަނީ ބުނެފައެވެ.

އެކަމާ ގުޅިގެން ޝުޖާއު އެކްސްގައި ވިދާޅުވީ މިއީ އެމްޑީޕީން ރާވައިގެން ކުރި ކަމެއް ކަމަށާއި ރައްޔިތުންގެ މެދުގައި ފިތުނަ ފަސާދަ އުފެއްދުމަށް އެމްޑީޕީން ކުރި ކަމެއް ކަމަށެވެ.

“މިކަމުގެ އަޑީގައި ތިބީ އެމްޑީޕީގެ ލީޑާޝިޕް. މިކަން ކުރުމަށް އެމްޑީޕީއަށް ވާގިވެރިވީ ޕީއެންއެފް ކިޔާ މެމްބަރުން ހަމަނުވާ ޕާޓީއެއް،” ޝުޖާއު ވިދާޅުވިއެވެ.

ޝުޖާއު ވިދާޅުވި ގޮތުގައި އެމްޑީޕީން މިފަދަ ބޮޑު ރޭވުމެއް ރާވައި ހިންގީ ޤާނޫނު އަސާސީއަށް ގެނެވުނު އިސްލާހަށް ރައްޔިތުންގެ މެދުގައި ސުވާލު އުފައްދައި ފިތުނަ އުފެއްދުމުގެ ބޭނުމުގައެވެ. މެންބަރުންނަށް ނޭނގި ޕާޓީ ބަދަލުވަމުންދާތީ އެމްޑީޕީން ނެރުނު ނޫސް ބަޔާނެއްގައި ވިދާޅުވީ ޕީއެންސީއަށް ވަނުމަށް ފޯމު ފުރާފައި ނުވާ އެމްޑީޕީގެ ބައެއް އާންމު މެމްބަރުންނާއި ގައުމީ މަޖިލީހުގެ މެމްބަރުން ވެސް އެ ޕާޓީގެ ދަފްތަރުން އުނިކޮށް ޕީއެންސީގެ ހިމަނާފައިވާތީ، އެ މައްސަލަ އިލެކްޝަންސް ކޮމިޝަނުގެ ސަމާލުކަމަށް އެކިފަހަރު ގެނެސްފައިވާ ކަމަށެވެ.

އެކަމާ ގުޅިގެން އެމްޑީޕީގެ ރައީސް އިބްރާހިމް މުހައްމަދު ސޯލިހުވވެސް ވަނީ އީސީގެ ޤާނޫނީ ޒިންމާ އަދާކުރެވޭތޯ ސުވާލު އުފައްދައި ފާޑުވިދާޅުވެފައެވެ.