މައްސަލަ ހައްލުކޮށް، މާފަންނު ސަހަރާގައި ބަހައްޓާފައިވާ ޕަމްޕް ސްޓޭޝަން ވަގުތީ ގޮތުން އޮޕަރޭޝަނަށް!

Read Time:3 Minute, 18 Second

މާލެ ސިޓީ ކައުންސިލުން މާފަންނު ސަހަރާ ހުސްކުރުމުގެ ތެރޭގައި ފެން ހިންދާ ޕަމްޕަށް ގެއްލުންދީފައިވަނިކޮށް، ޕަމްޕް ސްޓޭޝަންތަކާއި ނެޓްވޯކް ޗެކްކޮށް، އާރްޑީސީ އަދި ސްޓެލްކޯގެ އެހީތެރިކަމާއެކު މާފަންނު ސަހަރާގައި ބަހައްޓާފައިވާ ސްޓޭޝަން ވަގުތީ ގޮތުން އޮޕަރޭޝަނަށް ގެނެސްފައިވާ ކަމަށް އިމާރާތް ކުރުމާއި، ގެދޮރުވެރިކަމާއި ބިމާ ބެހޭ ވުޒާރާއިން ވިދާޅުވެއްޖެއެވެ. އެ ވުޒާރާއިން ނެރުނު ބަޔާނެއްގައި ވިދާޅުވީ، ވިއްސާރައިގެ ސަބަބުން މާލޭ ސިޓީގައި ފެންބޮޑުވުމުގެ މައްސަލަ ދިމާވާ ކޮންމެ ފަހަަރަކު އެ ވުޒާރާއިން މާލޭގެ އެކި ސަރަަހައްދުތަކުގައި ގާއިމް ކުރެވިފައިވާ ޕަމްޕް ސްޓޭޝަންތައް އިންސްޕެކްޓްކޮށް މި ސްޓޭޝަންތައް ރަނގަޅަށް މަސައްކަތް ކުރާތޯ ބަލަމުން ކަަމަށެވެ.

އަދި މިގޮތަށް ބެލި ބެލުމުން މާފަންނު ސަހަރާގައި ގާއިމް ކުރެވިފައިވާ ޕަމްޕް ސްޓޭޝަނާއި އެ ސްޓޭޝަނާއި ގުޅާފައިވާ ހޮޅިތައް ބޭނުން ނުކުރެވޭ ވަރަށް ހަލާކުވެފައިވާކަން އެ ވުޒާރާއަށް ފާހަގަކުރެވިފައިވާ ކަމަށްވެސް އެ ބަޔާނުގައި ވެއެެވެ. އަދި މި ޕަމްޕް ސްޓޭޝަނަށް ގެއްލުންވެފައި ވަނީ މާލެ ސިޓީ ކައުންސިލުން މާފަންނު ސަހަރާގައި ކުރަމުންދާ މަސައްކަތުގެ ތެރެއިން ޕަމްޕް ސްޓޭޝަނަށް ލިބިދާނެ އެއްވެސް ގެއްލުމަކަށް ބެލުމެއް ނެތި އެ ސަރަހައްދު ކޮނެފައިވާ ކަމަށްވެސް އެ ބަޔާނުގައި ވެއެވެ. “އަދި މި މަސައްކަތް މާލެ ސިޓީ ކައުންސިލުން ކުރިއަށް ގެންގޮސްފައި ވަނީ މި މިނިސްޓްރީއާ މަޝްވަރާ ކުރުމެއް ނެތި އަދި މި މަސައްކަތާއި ގުޅޭ މައުލޫމާތެއް މިނިސްޓްރީއާ ހިއްސާނުކޮށްކަމުގައި ފާހަގަކުރެވެއެވެ.”. އެ ބަޔާނުގައި ވެއެވެ.

ފާއިތުވެދިޔަ މަހެއްހާ ދުވަސް ތެރޭގައި މާލެ ސަރަހައްދަށް ބޯކޮށް ވާރޭ ވެހި ފެންބޮޑުވުމުގެ އެކި ހާދިސާތައް ކައިރި ކައިރީގައި ހިނގާފައި ވެއެވެ.