ފްރާންސްގެ މެނޭޖަރު ޑެޝަމްޕްސް 2026 ވަނަ އަހަރުގެ ވޯލްޑް ކަޕަށްފަހު މަޤާމުން ވަކިވާނެ

Read Time:7 Minute, 9 Second

(ފޮޓޯ ކްރެޑިޓްސް: ގެޓީ އިމޭޖާސް)

ފްރާންސްގެ ވޯލްޑް ކަޕް ކާމިޔާބުކުރި މެނޭޖަރު ޑިޑިއޭ ޑެޝަމްޕްސް ވިދާޅުވެފައިވަނީ އަންނަ އަހަރު އެމެރިކާ، ކެނެޑާ އަދި މެކްސިކޯގައި ބޭއްވޭ މުބާރާތަށްފަހު އޭނާ މަޤާމުން ވަކިވާނެ ކަމަށެވެ. 56 އަހަރުގެ ޑެޝަމްޕްސްއަކީ ފްރާންސްގެ އެންމެ ދިގު މުއްދަތަކަށް ކޯޗުކަން ކުރި ފަރާތެވެ. އޭނާ ވަނީ 2012 އިން ފެށިގެން އެ މަޤާމުގައި ހުންނަވާފައެވެ. އޭނާ ވަނީ ލެ ބްލޫސް (ފްރާންސްގެ ޤައުމީ ޓީމު) 2018 ވަނަ އަހަރު ރަޝިޔާގައި ބޭއްވުނު ވޯލްޑް ކަޕް ކާމިޔާބުކުރުމަށް މަގުފަހިކޮށްދެއްވާފައެވެ. އަދި މީގެ އިތުރުން 2022 ވަނަ އަހަރު ޤަޠަރުގައި ބޭއްވުނު މުބާރާތުގެ ފައިނަލަށާއި 2016 ވަނަ އަހަރު ފްރާންސްގައި ބޭއްވުނު ޔޫރޯ ކަޕްގެ ފައިނަލަށް ވެސް ޓީމު ގެންދެވިއެވެ.

“2026 ގައި މިކަން ނިމުމަކަށް އަންނާނެ. އަހަރެންގެ ސިކުނޑީގައި މިކަން ވަރަށް ސާފުކޮށް އެބައޮތް،” ޑެޝަމްޕްސް ފްރާންސްގެ ޓީވީ ޗެނަލް ޓީއެފް1 އަށް ވިދާޅުވިއެވެ. “އަހަރެން ވަނީ އަހަރެންގެ ދައުރު އަދާކޮށްފައި، ފްރާންސް އެންމެ މަތީ ފަންތީގައި ބެހެއްޓުމަށް އެއް ފަދަ ޝައުޤުވެރިކަމާއި ފޯރިއަކާ އެކުގައި.” “މީހަކަށް ހުއްޓާލަން ޖެހޭނެކަން ބުނަން ޖެހޭނެ، މިއަށްފަހު ދިރިއުޅުމެއް އެބައޮތް. އެންމެ މުހިންމު ކަމަކީ ފްރާންސް ގިނަ އަހަރުތަކެއް ވަންދެން ހުރި ފަދައިން އެންމެ މަތީ ފަންތީގައި ދެމިހުރުން.” ފްރާންސްއިން އަދި 2026 ވަނަ އަހަރުގެ ވޯލްޑް ކަޕަށް ކޮލިފައިވުމުގެ ކެމްޕޭން ފަށާފައެއް ނުވެއެވެ. އެމީހުންގެ ގްރޫޕް ބިނާވެގެންވަނީ މާރިޗު މަހު ކްރޮއޭޝިއާއާ ދެކޮޅަށް ކުޅޭ ނޭޝަންސް ލީގުގެ ކުއާޓަރ ފައިނަލްގެ ނަތީޖާއަށެވެ.

ކުރީގެ މިޑްފީލްޑަރު ޑެޝަމްޕްސްއަކީ މާރިއޯ ޒަގާލޯ އަދި ފްރާންޒް ބެކެންބާއުަރަށްފަހު ކުޅުންތެރިއެއްގެ ގޮތުގައި އަދި މެނޭޖަރެއްގެ ގޮތުގައި ވޯލްޑް ކަޕް ކާމިޔާބުކުރި ހަމައެކަނި ތިންވަނަ މީހާއެވެ. އޭނާ ވަނީ 1998 ވަނަ އަހަރު ޤައުމީ ޓީމުގެ ކެޕްޓަންކަން ކުރައްވައި ވޯލްޑް ކަޕް ކާމިޔާބުކުރައްވާފައެވެ.

އޭނާ ވަނީ 2012 ވަނަ އަހަރުގެ ޔޫރޯ ކަޕްގެ ކުއާޓަރ ފައިނަލުން ފްރާންސް ބަލިވުމަށްފަހު ލޯރާން ބްލާންކްގެ ބަދަލުގައި މަޤާމާ ހަވާލުވެވަޑައިގެން 2014 ވަނަ އަހަރު ބްރެޒިލްގައި ބޭއްވުނު ވޯލްޑް ކަޕަށް ކޮލިފައިވުމަށް މަގުފަހިކޮށްދެއްވިއެވެ. އެ މުބާރާތުގައި ލެ ބްލޫސް ވަނީ ފަހުން ޗެމްޕިއަންކަން ހޯދި ޖަރުމަނުވިލާތާ ދެކޮޅަށް ކުއާޓަރ ފައިނަލްގައި ބަލިވެފައެވެ. 2016 ވަނަ އަހަރު އޭނާ ވަނީ ޓީމު އެމީހުންގެ ގައުމުގައި ބޭއްވުނު ޔޫރަޕިއަން ޗެމްޕިއަންޝިޕްގެ ފައިނަލަށް ގެންގޮސްދެއްވާފައެވެ. ނަމަވެސް އެމީހުން ވަނީ އިތުރު ވަގުތުގައި ޕޯޗުގަލަށް ބަލިވެފައެވެ. އޭނާގެ އެންމެ މަތިވެރި ވަގުތު އައީ ދެ އަހަރު ފަހުން، ފްރާންސްއިން ދެވަނަ ފަހަރަށް ވޯލްޑް ކަޕް ނެގި ހިނދުއެވެ. މޮސްކޯގައި ކުޅުނު ފައިނަލްގައި ކްރޮއޭޝިއާއާ ދެކޮޅަށް 4-2 އިން ކާމިޔާބު ހޯދިއެވެ. 2021 ވަނަ އަހަރު ނޭޝަންސް ލީގުގެ ޓައިޓަލް ހޯދުމަށްފަހު، އެމީހުން އަނެއްކާވެސް ޤަޠަރުގައި ބޭއްވުނު ވޯލްޑް ކަޕްގެ ފައިނަލަށް ދަތުރުކުރިއެވެ. ނަމަވެސް 3-3 އަށް ބެއްދުމަށްފަހު ޕެނަލްޓީ ޝޫޓްއައުޓުން އާޖެންޓީނާއަށް ބަލިވިއެވެ.

ފްރާންސްގެ ޓީމު ހަވާލުވުމުގެ ކުރިން ޑެޝަމްޕްސް ވަނީ މޮނާކޯ، ޔުވެންޓަސް އަދި މާސޭ ބަލަހައްޓަވާފައެވެ. އަދި ކޮންމެ ޓީމަކާއެކުވެސް މަދުވެގެން އެއް ޓްރޮފީ ހޯއްދަވާފައިވެއެވެ. އޭގެ ކުރިން އޭނާ ވަނީ ކުޅުންތެރިއެއްގެ ގޮތުގައި ޤައުމީ އަދި ކްލަބް ފެންވަރުގައި ފާހަގަކޮށްލެވޭ ކެރިއަރެއް ހޯއްދަވާފައެވެ. އޭނާ ވަނީ 14 މޭޖަރ މުބާރާތް ކާމިޔާބުކުރައްވާފައެވެ. މީގެ ތެރޭގައި މާސޭ އަދި ޔުވެންޓަސްއާއެކު ޗެމްޕިއަންސް ލީގު އަދި ޗެލްސީއާއެކު އެފްއޭ ކަޕް ހިމެނެއެވެ. ފެންސިވް މިޑްފީލްޑަރުގެ ގޮތުގައި ކުޅުއްވި ޑެޝަމްޕްސް ވަނީ ފްރާންސްއަށް 103 ފަހަރު ކުޅުއްވާފައެވެ. އަދި ޤައުމީ ޓީމުގެ ކެޕްޓަންކަން ކުރައްވައި 1998 ވަނަ އަހަރުގެ ވޯލްޑް ކަޕާއި 2000 ވަނަ އަހަރުގެ ޔޫރޯ ކަޕް ކާމިޔާބުކުރެއްވިއެވެ.