ސްޓާލިންކުގެ އިންޓަނެޓު ހަރުދަނާކުރުމަށް އިތުރު 24 ސެޓެލައިޓު އުދުއްސާލައިފި

Read Time:3 Minute, 37 Second

ދުނިޔޭގެ އެކިކަންކޮޅުތަކަށް ސެޓެލައިޓް އިންޓަނެޓުގެ ޚިދުމަތް ދެމުން އަންނަ ސްޓާލިންކުން، އެކުންފުނީގެ އިންޓަނެޓުގެ ޚިދުމަތް އިތުރަށް ހަރުދަނާކޮށް ފުޅާ ކުރުމަށްޓަކައި އިތުރު 24 ސެޓެލައިޓު އުދުއްސާލައިފިއެވެ. މިހާރު ރާއްޖެއަށްވެސް ތައާރަފްކޮށް، ފޯރުކޮށްދެމުންދާ ސްޓާލިންކުގެ އިންޓަނެޓް ޚިދުމަތަކީ ސެޓެލައިޓް މެދުވެރިކޮށް މަޝްހޫރު މަހުޖަނު، އިލޮން މަސްކުގެ ސްޕޭސްއެކްސްއިން މުޅި ދުނިޔެއަށް ދެމުން ގެންދާ ޚިދުމަތެކެވެ. މި ޚިދުމަތް މިހާރު ދުނިޔޭގެ ގިނަ ގައުމުތަކަކަށް ވަނީ ފުޅާކޮށްފައެވެ.

މި އަހަރުގެ ފުރަތަމަ ސްޓާލިންކް މިޝަން ސްޕޭސްއެކްސް އިން ފްލޮރިޑާގެ ކޭޕް ކެނަވެރަލް ސްޕޭސް ފޯސް ސްޓޭޝަނުން ކާމިޔާބުކަމާއެކު ލޯންޗްކޮށްފައިވަނީ މިމަހުގެ 6 ވަނަ ދުވަހު ރޭ ދަންވަރު 2:13 ގައެވެ. މި މިޝަންގައި ސްޕޭސް އެކްސްގެ ބޮޑު ސެޓެލައިޓް ފެލްކަން 9 ރޮކެޓަކުން 24 ސްޓާލިންކް ސެޓެލައިޓް އޯބިޓަށް ގެންގޮސްފައިވެ އެވެ. ސްޕޭސް އެކްސްއިން ސެޓެލައިޓްތައް ފޮނުވުމުގެ ސަބަބުން ދުނިޔޭގެ ކަނެކްޓިވިޓީ އިތުރުކުރުމަށް ކުރަމުންދާ މަސައްކަތަށް އިތުރު މުހިންމު ކުރިއެރުމެއް ވަނީ ލިބިފައެވެ.

މި މިޝަންގައި ދުނިޔޭގެ އޯބިޓަށް 24 ސެޓެލައިޓް ދޫކޮށްލާފައިވާއިރު، އެ ސެޓެލައިޓުތައް ގުޅޭނީ ސްޓާލިންކުގެ އިންޓަނެޓު ޚިދުމަތް ދޭ، ދުނިޔެ ވަށައިގެން އަށަގެންފައިވާ 6850 ސެޓެލައިޓުގެ ލައިނާ އެވެ. އެއާއެކު އިތުރު ގައުމުތަކަށް ހަލުވި ކަމާއެކު އިންޓަނެޓު ލިބި، އަދި އިންޓަނެޓު ލިބުމުގައި މައްސަލަ ދިމާވާ ގައުމުތަކަށް އެމައްސަލަ ހައްލުވެގެންދާނެ ކަމަށް ވެއެވެ. މި ސެޓެލައިޓުތައް ދުނިޔޭގެ އޯބިޓަށް ފޮނުވާފައިވަނީ މީގެ ކުރިން އިންޓަނެޝާނަލް ސްޕޭސް ސްޓޭޝަނަށް އެސްޓްރޮނޯޓުން ގެންގޮސްދިން ފެލްކަން 9 ރޮކެޓުގައެވެ. އެފަހަރުވެސް ރޮކެޓު ވަނީ ކާމިޔާބުކަމާއެކު ދުނިޔޭގެ ބިމަށް ތިރިކޮށްފައެވެ. އަދި މިފަހަރުވެސް ފެލްކަން 9 ވަނީ ކާމިޔާބުކަމާއެކު ދުނިޔޭގެ ބިމަށް ތިރިކޮށްފައެވެ.