ރަތަފަންދޫ ބަނދަރުގެ ހާލަތު ވަރަށް ދަށް، މިއަހަރު ތެރޭ ބަނދަރު ހަދައިދޭނަން- ރައީސް

Read Time:7 Minute, 50 Second

(ފޮޓޯ ކްރެޑިޓްސް: ރައީސް އޮފީސް)

ގދ.ރަތަފަންދޫ ބަނދަރަކީ ހުވަދު އަތޮޅު ދެކުނުބުރީގެ ރަށްތަކުގެ ތެރެއިން އެންމެ ހާލަތު ދަށްކޮށް އޮތް ބަނދަރު ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ހުވަދުއަތޮޅަށް ކުރައްވަމުން ގެންދަވާ ދަތުރުފުޅުގައި ގދ. ރަތަފަންދޫ ރައްޔިތުންނާއި ބައްދަލުކޮށް ރައީސް ވިދާޅުވީ، ރަތަފަންދޫ ބަނދަރުގެ ހާލަތު ވަރަށް ދަށް ކަމަށާއި މިއަހަރުތެރޭގައި އެރަށު ބަނދަރު ހަދައިދޭނެ ކަމަށެވެ.

“އަޅުގަނޑުމެން ދެންމެ ވަދެގެން އައިއިރު ފެނޭ ބަނދަރު އޮތް ހާލަތު. މި އަތޮޅުގައިވެސް ހަމަ އެންމެ ހާލު ދަށްކޮށް އޮތް ބަނދަރަކަށް ވާނެ މިރަށުގެ ބަނދަރު. މިއަހަރުތެރޭ ކުރިޔަށް ގެންދާ ބަނދަރު މަޝްރޫއުގެ ތެރޭގައި ހިމަނައިގެން މިރަށުގެ ބަނދަރު ހަދައިދޭނެ ކަމުގެ ޔަޤީންކަން ތިޔަބޭފުޅުންނަށް ދެން.” ރައީސް ވިދާޅުވިއެވެ.

ރަތަފަންދޫ ކައުންސިލް އިދާރާ ވަރަށް ބޮޑަށް ހަލާކުވެފައިވާ ވާހަކަ ކައުންސިލުގެ ރައީސް ވަނީ ވިދާޅުވެފައެވެ. އެކަމާއި ގުޅިގެން ރައީސް ވިދާޅުވީ، ވަރަށް ގިނަ ރަށްތަކުގެ ކައުންސިލް އިދާރާއަށް ބޭނުންކުރާ އިމާރާތް ހަލާކުވެފައިވާކަން ފާހަގަކުރެވޭ ކަމަށާއި އެކަމަށް ހައްލެއް ހޯދުމަށް ކަމާއި ބެހޭ އިދާރާތައް ގުޅިގެން ސަރުކާރުން މަސައްކަތް ކުރަމުން ގެންދާ ކަމަށެވެ.

“އަޅުގަނޑުމެން މިހާރު ވާނީ ކަމާއި ބެހޭ ވުޒާރާއިން، ސިޓީސް ލޯކަލް ކައުންސިލް އިދާރާއިން 50 ރަށެއްގައި ކައުންސިލް އިމާރާތް އެޅުމަށްޓަކައި ބަޔަކާއި ހަވާލުކޮށްފައި. އޭގެ އަމަލީ މަސައްކަތް ވީހާވެސް އަވަހަކަށް ފެށޭ ހިސާބަށް މަސައްކަތްތައް މިގެންދަނީ ތަރުތީބު ކުރަމުން. އެ ޕްރޮޖެކްޓުގެ ތެރޭގައި މިރަށްވެސް ހިމެނޭ.” ރައީސް ވިދާޅުވިއެވެ.

(ފޮޓޯ ކްރެޑިޓްސް: ރައީސް އޮފީސް)

ރަށްގިރުމުގެ މައްސަލައާއި ގުޅޭ ގޮތުން ވާހަކަފުޅު ދައްކަވަމުން ރައީސް ވިދާޅުވީ އެމްޓީސީސީއާ ހަވާލުކުރެވިގެން ފެށިފައި އޮތް ގިރާ ސަރަހައްދު ހިމާޔަތް ކުރުމުގެ މަޝްރޫއު ހުއްޓިފައިވަނީ މެޓީރިއަލްގެ އަދި ފައިސާގެ ތާށިކަމާހެދި ކަމަށެވެ. އެންމެ ގިނަ ރަށްތަކުގެ މަސައްކަތް ހުއްޓިފައި އޮތް ސަބަބަކީ ބޮޑު ހިލަ ލިބުމުގެ ތާށިކަން ކަމަށް ރައީސް ވިދާޅުވިއެވެ.

“އެކިރަށްރަށުގައި މިހިރީ މަސައްކަތް ހުއްޓިފައި ބޮޑުހިލަ ނެތިގެން. ނޫނިއްޔާ ޝޯ ޕރޮޓެކްޝަނަށް ބޭނުންވާ މެޓީރިޔަލް ނެތިގެން. ބަނދަރުތަކާއި ރަށްގިރުމުގެ މައްސަލަ އާއި ބިން ހިއްކުމުގައި ބޭނުންވާ ތޮށިލުމާއި މިހެން ހުރި ކަންކަމަށް ބޭނުންވާ ހިލަ. މިހާރު ވަނީ ކަންތައްތަކެއް ރޭވިފަ ކަންތައްކުރާނެ ގޮތްތަކެއް ފައިސާވެސް ހަމަޖައްސައިދީފަ އޮންނާނީ މިދިޔަ ހަފްތާ ނިމުނުއިރުގަ.” ރައީސް ވިދާޅުވިއެވެ.

(ފޮޓޯ ކްރެޑިޓްސް: ރައީސް އޮފީސް)

ބަނދަރާއި ރަށްގިރުމުގެ މައްސަލައަށް ހައްލެއް ލިބިގެންދާއިރު ރަށުގައި މޫދަށް އެރިލާނެ ތަނެއްވެސް ތައްޔާރުކުރެވޭނެ ކަމަށް ރައީސް ވިދާޅުވިއވެެ. މީގެއިތުރުން ރަތަފަންދޫގައި ވޮލީ ކޯޓަކާއި އިންޑޯ ޖިމެއްގެ އިތުރުން ވަސީލަތްތައް ފުރިހަމަ ޔޫތު ސެންޓަރެއް އަޅައިދޭން އެމަނިކުފާނު ވެލެއްވި ވައުދުފުޅު ފުއްދައިދެއްވާނެ ކަމުގެ ޔަޤީންކަން ރައީސް ވަނީ ރަތަފަންދޫ ރައްޔިތުންނަށް ދެއް ވާފައެވެ.

މީގެއިތުރުން މިއަހަރަށް ފާސްކުރި ބަޖެޓުގެ ތެރެއިން ސިއްޚީ މަރުކަޒުގެ ފެންވަރު ރަނގަޅުކުރާނެ ކަމަށާއި ސްކޫލުގައި މިހާރު ހިނގަމުންދާ ކުލާސްރޫމުތައް އެޅުމުގެ މަޝްރޫއުގެ އިތުރަށް މަލްޓީޕާޕަސް ހޯލެއް ޤާއިމުކޮށްދެއްވާނެ ކަމަށް ރައީސް ވަނީ ވިދާޅުވެފައެވެ.

(ފޮޓޯ ކްރެޑިޓްސް: ރައީސް އޮފީސް)

ރަތަފަންދޫގެ ފެނާއި ނަރުދަމާ ނިޒާމުގެ މަސައްކަތް ކުރީ ސަރުކާރުން ފެށި ނަމަވެސް ވަކި ހިސާބަކުން މަސައްކަތް ހުއްޓިފައިވާކަން ފާހަގަކުރައްވަމުން ރައީސް ވިދާޅުވީ އެ މަސައްކަތްވެސް އަލުން ފަށައި މި ދައުރުގައި ނިންމައިދޭނެ ކަމަށެވެ.

ރައީސް ވިދާޅުވި ގޮތުގައި ކުރިޔަށް މިއޮތް ދެއަހަރު ތެރޭ ރަށްރަށަށް ބޭނުންވާ ކަންތައްތަކުގެ އަމަލީ މަސައްކަތް ފެށިގެންދާނެއެވެ. އަދި ކުރިޔަށް މިއޮތް 3 އަހަރު ވެގެންދާނީ އެމަނިކުފާނު ކެމްޕެއިންތެރޭގައި ވެފައިވާ ވައުދުތަކާއި އެމަނިކުފާނުގެ މެނިފެސްޓޯގައި ހިމެނޭ ކަންތައްތައް ފުއްދައިދިނުމުގެ އިތުރުން ރައްޔިތުންގެ ކަންބޮޑުވުންތަކަށް ހައްލެއް ހޯދައިދޭނެ އަހަރުތަކެއް ކަމަށް ރައީސް މުއިއްޒު ވަނީ ވިދާޅުވެފައެވެ.