Read Time:4 Minute, 26 Second
(ފޮޓޯ ކްރެޑިޓްސް: ރައީސް އޮފީސް)
ރާއްޖޭގެ ރަށްރަށަށް ދިމާވެފައިވާ ކަރަންޓުގެ މައްސަލަ މިއަހަރުގެ ރޯދައިގެ ކުރިން ހައްލުކޮށްދެއްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެ އެވެ. ގދ. ފިޔޯރީގައި މިރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ގިނަ ރަށްރަށުގައި ފެނަކާއިން ކަރަންޓު ފޯރުކޮށްދިނުމަށްޓަކައި ބޭނުންކުރާ ގިނަ ޖަނެރޭޓަރުތައް ހުރީ ބަދަލުކުރަން ޖެހިފައި ކަމަށާއި، ސަރުކާރާ ހަވާލުވި އިރު “އެތައް އަހަރެއް ވެފަ އޮތީ އެތަންތަން ރަނގަޅަށް ނުބަލަހައްޓާތާ” ކަމަށެވެ. އަދި މިދިޔަ އަހަރުވެސް ގިނަ އަދަދެއްގެ ފައިސާ ކަރަންޓުގެ މައްސަލަ ހައްލުކުރުމަށްޓަކައި ހޭދަ ކުރަން ޖެހުނު ކަމަށް އެމަނިކުފާނު ވިދާޅުވިއެވެ.
“މިހާރު އަޅުގަނޑުމެން ޚާއްސަ މަސައްކަތްތަކެއް ފަށައިން ފިނޭންސް މިނިސްޓްރީއާއި ފެނަކައާ އެސްޓީއޯ އެމްޓީސީސީ ތަންތަން ގުޅިގެން ކުރިއަށް އޮތް ރޯދަމަސް އަންނަން ވާއިރަށް އަޅުގަނޑުމެން މި އަމާޒު ކުރަނީ މުޅި ރާއްޖޭގަ މައްސަލައެއް އޮތް ރަށެއް ވިއްޔާ (ކަރަންޓުގެ މައްސަލަ އުޅޭ ރަށްތައް) އެއްވެސް ރަށެއް ދޫކޮށްނުލާ ހުރިހާ ރަށެއްގަ ޖަނެރޭޓަރުތަކުގެ މައްސަލަ ހައްލުކުރުމަށް ގެންނަން ޖެހޭ ޖަނެރޭޓަރުތައް ގެނެސްދީ އިންސްޓޯލްކޮށް ނިންމަން” ރައީސް ޑރ؛ މުއިއްޒު ވިދާޅުވިއެވެ.
އެމަނިކުފާނު ވިދާޅުވީ އެކަމަކީ ވަރަށް ބޮޑު “ޗެލެންޖަކަށް ވާނެ ކަމެއް” ކަމަށެވެ. އެހެން ނަމަވެސް “އެމަސައްކަތް މި ފެށީ” ކަމަށެވެ.
“ރަމަޟާން މަހު ތިޔަ ބޭފުޅުން ކަންބޮޑުވާނެޖެހިނުގަންނަވާ ފެންވަރަށް ކަރަންޓުގެ މައްސަލަ ހައްލުކުރުމަކީ އަޅުގަނޑުމެން އަމާޒު ހިފިކަންތައް. އިރާދަކުރެއްވިއްޔާ އަޅުގަނޑުމެން ބަލާނަން ތިޔަ ބޭފުޅުން ހިތްހަމަޖެހިވަޑައިގަންނަވާ ގޮތަށް ކޮށްދެވޭތޯ.” ރައީސް ވިދާޅުވިއެވެ.
ރާއްޖޭގެ ރަށްރަށުގައި ދޭތެރެ ދޭތެރެއިން އަބަދުވެސް ކަރަންޓުގެ މައްސަލަ ޖެހެ އެވެ. އެގޮތުން ރަށްރަށުގައި ހުރި ޖަނެރޭޓަރުތަކަށް ލޯޑު ބޮޑުވެގެން ކަރަންޓު ކެނޑުމާއި، ޖަނެރޭޓަރު ތަކުން ގޭބިސީތަކަށް ބޭނުންވާ މިންވަރަށް ކަރަންޓު އުފައްދައި ނުދިނުމުގެ އިތުރުން މެއިންޓެންނަންސާ ގުޅޭ މައްސަލަތަކާހުރެ ރަށްރަށުން ކަރަންޓު ކެނޑޭ މައްސަލައަކީ އަބަދުވެސް ޖެހޭ މައްސަލަތަކެކެވެ. ރޯދަމަހަކީ އާއްމުކޮށްވެސް ރާއްޖޭގައި ކަރަންޓުގެ ޚަރަދު ބޮޑު މަހެއް ކަން މީގެ ކުރީ އަހަރުތަކުގައިވެސް ފާހަގަކުރެވިފައި ވެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0