Read Time:5 Minute, 9 Second
(ފޮޓޯ ކްރެޑިޓްސް: ރައީސް އޮފީސް)
ފިޔޯރީގައި ތަރައްގީކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވައުދުވެވަޑައިގަތް މަސް ކާރުޚާނާގެ ތަފްސީލުތައް މިރޭ އެމަނިކުފާނު ހާމަކުރައްވައިފިއެވެ. ހުވަދު އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު ގދ. ފިޔޯރީއަށް ވަޑައިގެން މިރޭ އެރަށުގައި ކުރިއަށްދިޔަ ޖަލްސާގައި ވާހަކަ ދައްކަވަމުން ރައީސް ވިދާޅުވީ ރާއްޖޭގެ އެއްވެސް ރަށަކަށް ވެވަޑައިގެންފައިވާ ވައުދަކީ، ފުއްދެވޭނެ ކަމުގެ ޔަގީންކަމާއެކު ވެވަޑައިގެންފައިވާ ވައުދުތަކެއް ކަމަށެވެ. އެގޮތުން ފިޔޯރީއަށް ވައުދުވެވަޑައިގެންނެވީ މަސް ކާރުޚާނާ އެރަށުގައި ގާއިމްކޮށްދެއްވާނެ ކަމުގެ ޔަގީންކަން އަރުވަމުން އެމަނިކުފާނު ވަނީ އެ މަޝްރޫއުގެ ތަފްސީލްތައް ހިއްސާކުރައްވާފައެވެ.
ރައީސް ޑރ. މުއިއްޒު ވިދާޅުވި ގޮތުގައި އެރަށުގައި ތަރައްގީ ކުރުމަށް ހަމަޖެހިފައިވާ މަސް ކާރުޚާނާގައި ދުވާލަކު 100 ޓަނުގެ ދަޅު މަސް ބަންދުކުރެވޭ ކެޕޭސިޓީއާއި، 3000 ޓަނުގެ މަސް ފިނިކޮށް ރައްކާކުރެވޭނެ ވަސީލތަކާއި، 100 ޓަނުގެ ފިޝްމީލް ޕްލާންޓެއްގެ އިތުރުން 50 ޓަނުގެ އައިސް ޕްލާންޓެއް ހިމެނޭނެ ކަމަށެވެ. ރައީސް ވިދާޅުޅީ އެ މަޝްރޫއުގެ މަސައްކަތް ޗައިނާގެ ކުންފުންޏަކާ ހަވާލުކުރުމަށްޓަކައި އެއްބަސްވުން އެކުލަވާލައި، އެކަމާ ގުޅުން ހުރި އިދާރީ މަސައްކަތް ކުރިއަށް ދާ ކަމަށާއި، ފެބްރުއަރީ މަސް ތެރޭގައި އެއްބަސްވުމުގައި އެކުންފުންޏާ އެކު ސޮއި ކުރެވި، “އޭގެ ފަހުން ދެމަސް ދުވަހުގެ ތެރޭގައި އަމަލީ ގޮތުން ފެކްޓްރީގެ މަސައްކަތް މިރަށުގައި ފެށޭނެ” ކަމަށެވެ.
(ފޮޓޯ ކްރެޑިޓްސް: ރައީސް އޮފީސް)
“މީގެ ނަތީޖާއަކަށް ވާނީ މިއަތޮޅުގެ އަދި މިސަރަހައްދުގެ މަސްވެރިކަމަށް ވަރަށް ބޮޑު ކުރިއެރުމެއް ލިބިގެން ދިއުން. މަސްވެރިކަމުގެ ސިނާއަތަކީ އަޅުގަނޑު އެންމެ ބޮޑު އިސްކަމެއް ދޭ އެއް އިންޑަސްޓްރީ. ދިވެހިންގެ ލޭނާރު. ދިވެހި އެތައް އާއިލާއެއްގެ ދިރިއުޅުން ބިނާވެފައިވާ އިންޑަސްޓްރީ” ރައީސް ވިދާޅުވިއެވެ.
ގދ. ފިޔޯރީގައި މި މަސް ފެކްޓްރީ ގާއިމްކުރެވިގެން ދިއުމުން ހުވަދު އަތޮޅުގެ މަސް ރައްކާކުރެވޭ ކެޕޭސިޓީއާއި މަހުގެ ބާވައްތްތައް އުފެއްދުމުގެ ކެޕޭސިޓީ ބޮޑުތަނުން އިތުރުވެގެންދާނެ އެވެ. މިވަގުތު ހުވަދު އަތޮޅުގައި މަސް ފެކްޓްރީއެއްގެ ގޮތުގައި ހަރަކާތްތެރިވަނީ ގއ. ކޫއްޑޫގައި އޮންނަ މިފްކޯގެ މަސް ފެކްޓްރީ އެކަންޏެވެ.
ފިޔޯރީއަށް މިއަހަރު ތެރޭ ބަޖެޓްކޮށްފައިވާ ތަރައްގީގެ އިތުރު މަޝްރޫއުތައް:
- ސްކޫލުގެ މަލްޓިޕާޕަސް ހޯލެއް ތަރައްގީކުރުން
- ސްކޫލަށް ކްލާސްރޫމް އިތުރުކުރުމާއި ލެބޯޓަރީއެއް ގާއިމްކުރުން
- އޭޓީއެމް އެއް ގާއިމްކުރުން
- ސިއްޙީ މަރުކަޒަށް އިންސާނީ ވަސީލަތް ހަމަކުރުން
- ރަނގަޅު ފެންވަރެއްގައި ޔޫތް ސެންޓަރެއް ގާއިމްކުރުން
- ކުނި މެނޭޖްކުރެވޭ ނިޒާމް ގާއިމްކުރުން
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0