އަހަރުގެ ފުރަތަމަ ފަސް ދުވަހު އެންމެ ގިނައީ ރަޝިއާ ޓޫރިސްޓުން

Read Time:3 Minute, 48 Second

މި އަހަރުގެ ފުރަތަމަ ފަސް ދުވަހު އެންމެ ގިނަ ޓޫރިސްޓުން އައި ގައުމަކަށް ރަޝިއާ ވެއްޖެ އެވެ. ޓޫރިޒަމް މިނިސްޓްރީގެ ހިސާބުތަކުން ދައްކާ ގޮތުން ފުރަތަމަ ފަސް ދުވަސް ތެރޭ ރަޝިއާއިން ވަނީ 6،400 ޓޫރިސްޓުން އައިސްފަ އެވެ. އެއީ ފުރަތަމަ ފަސް ދުވަހު އައި ޖުމްލަ ޓޫރިސްޓުންގެ 20 ޕަސެންޓެވެ. ދެވަނަ އަށް އެންމެ ގިނަ ޓޫރިސްޓުން އައީ އިންޓަލީނެވެ. އެ ގައުމުން ވަނީ 5،200 ޓޫރިސްޓުން އައިސްފަ އެވެ.

ތިން ވަނަ އަށް އެންމެ ގިނަ ޓޫރިސްޓުން އައި އިނގިރޭސިވިލާތުން 2،100 ޓޫރިސްޓުން އައި އިރު ހަތަރު ވަނައަށް އެންމެ ގިނަ ޓޫރިސްޓުން އައީ ޖަރުމަނުންނެވެ. އެގައުމުން 2،000 ޓޫރިސްޓުން އައިސްފައިވެ އެވެ. ރާއްޖެއަށް ޓޫރިސްޓުން އެންމެ ގިނައިން އަންނަ ލިސްޓުގެ ފަސް ވަނައިގައި އޮތީ އިންޑިއާ އެވެ. އެގައުމުން ވަނީ 1،100 ޓޫރިސްޓުން އައިސްފަ އެވެ. އަދި އެމެރިކާއިން ވަނީ 1،000 ޓޫރިސްޓުން އައިސްފަ އެވެ. މިދިޔަ އަހަރު އެންމެ ގިނަ ޓޫރިސްޓުން އައި ޗައިނާ އުޅެނީ ލިސްޓުގެ ނުވަ ވަނައިގަ އެވެ. އެ ގައުމުން މި އަހަރުގެ މިހާތަނަށް އައީ 800 ޓޫރިސްޓުންނެވެ. މިދިޔަ އަހަރު ނިމުނު އިރު ޗައިނާ އިން ވަނީ 260،000 ޓޫރިސްޓުން އައިސްފަ އެވެ.

މި އަހަރުގެ އެއްވަނައިގައި އޮތް ރަޝިއާ އިން 224،000 ޓޫރިސްޓުން މިދިޔަ އަހަރު އައެވެ. އެއީ މިދިޔަ އަހަރު ދެވަނައަށް އެންމެ ގިނައިން ޓޫރިސްޓުން އައި ގައުމެވެ. އަހަރުގެ ފުރަތަމަ ފަސް ދުވަހު ރާއްޖެއަށް ވަނީ 32،300 ޓޫރިސްޓުން އައިސްފަ އެވެ. އެއީ މިދިޔަ އަހަރުގެ އެ މުއްދަތަށް ވުރެ 17 ޕަސެންޓު އިތުރު އަދަދެކެވެ. މިދިޔަ އަހަރު ފުރަތަމަ ފަސް ދުވަހު ރާއްޖެއަށް އައީ 27،000 ޓޫރިސްޓުންނެވެ.

ބަޖެޓު ފޮތުގައި ލަފާކޮށްފައިވާ ގޮތުން 2.2 މިލިއަން ޓޫރިސްޓުން މި އަހަރު އަންނާނެ އެވެ. މިދިޔަ އަހަރުގެ ދެ މިލިއަން ވަނަ ޓޫރިސްޓު އައުން ފާހަގަކުރުމަށް ބޭއްވި ރަސްމިއްޔާތުގައި ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވީ، އަމާޒަކީ މި އަހަރު ޓޫރިސްޓުންގެ އަދަދު 15 ޕަސެންޓު އިތުރުކުރުން ކަމަށެވެ. އެ އަމާޒަށް ދެވިއްޖެ ނަމަ، އަންނަ އަހަރު ރާއްޖެއަށް 2.3 މިލިއަން ޓޫރިސްޓުން ގެނެވޭނެ އެވެ.