Read Time:3 Minute, 28 Second
ސްޕެއިންގެ އެންމެ ބޮޑު އެއް ކުލަބު ކަމަށްވާ ބާސެލޯނާގެ ރައީސް ޖޮއާން ލަޕޯޓާގެ އިސްތިއުފާ ދިނުމަށް ގިނަ ބަޔަކު ގޮވާލަން ފަށައިފިއެވެ.
ލަޕޯޓާގެ އިސްތިއުފާގެ އަޑު ގަދަވެފައި މިވަނީ މިދިޔަ ޖޫން މަހު 60 މިލިއަނަށް އެ ކުލަބުން ގަތް ޑެނީ އޮލްމޯ އާއި ޒުވާން ފޯވަޑް ޕައު ވިކްޓަރ ރަޖިސްޓަރ ކުރަން ދިން މުއްދަތުގައި އެކަން ނުކުރެވުމުންނެވެ. މިދިޔަ ޑިސެމްބަރު މަހުގެ 31 ގައި އެކަން ނުކުރެވުމުން ބާސެލޯނާއިން މިހާރު ވަނީ މި މައްސަލާގައި ކޯޓަށްދާން ނިންމާފައެވެ.
ލަޕޯޓާގެ އިސްތިއުފާގެ އަޑު ގަދަވެފައިވާއިރު، މި ކަމުގައި އެންމެ އިސްކޮށް ހަރަކާތްތެރިވަނީ އެންމެ ފަހުގެ އިންތިހާބުގައި ލަޕޯޓާ އާއި ވާދަކޮށް އިންތިހާބުން ބަލިވި ވިކްޓާ ފޮންޓްއެވެ. އޭނާ ވަނީ ކުޅުންތެރިން ރަޖިސްޓަރ ނުކުރެވުނު މައްސަލައިގައި ނޫސް ބަޔާނެއް ވެސް ނެރެފައެވެ. އޭނާގެ އިތުރުން ބާސެލޯނާއަށް ނިސްބަތްވާ ކުލަބު ތަކާއި އެސޯސިއޭޝަން ތަކުންވެސް ވަނީ ލަޕޯޓާ އާއި އޭނާއާއެކު ހިންގާ ކޮމިޓީގައި ތިބި އެންމެ އިސްތިއުފާ ދޭން ޖެހޭ ކަމަށް ގޮވާލާފައެވެ.
މާލީ ގޮތުން ގިނަ ގޮންޖެހުންތަކަކާއި ކުރިމަތިލާން ޖެހިފައިވާ ބާސެލޯނާގެ ރައީސްގެ މަގާމަށް ދެވަނަ ދައުރަކަށް ލަޕޯޓާ އިންތިހާބު ވެފައިވަނީ 2021 ވަނަ އަހަރުއެވެ. އޭގެ ކުރިން 2003 އިން ފެށިގެން 2010 ގެ ނިޔަލަށްވެސް ލަޕޯޓާ ވަނީ ބާސެލޯނާގެ ރައީސްގެ މަގާމު އަދާކޮށްފައެވެ. ލަޕޯޓާ ބާސެލޯނާގެ ރައީސްގެ މަގާމު ފުރި ފުރަތަމަ ދައުރަކީ އޭނާ އާއި ބާސެލޯނާއަށްވެސް ކާމިޔާބު އަހަރު ތަކެކެވެ.
ލަޕޯޓާ އާއި ދެކޮޅަށް އަޑު އުފުލާ ގުރޫޕް ތަކުން ގޮވާލަމުން ދަނީ ލަޕޯޓާ އިސްތިއުފާ ނުދޭނަމަ އޭނާގެ އިތުބާރު އޮތްތޯ ބެލުމަށް ފެންނަ ނުފެންނަ ވޯޓެއް ނަގައިދިނުމަށެވެ. އެކަން ނުކޮށްފިނަމަ ކުލަބުގެ އާންމު މެމްބަރުންގެ ސޮޔާއެކު އިތުބާރު ނެތް ކަމުގެ ވޯޑު ނަގަން ރަސްމީކޮށް ހުށައަޅާނެ ކަމަށެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0