މިއީ ތަރައްގީގެ އަހަރެއް، ހުރިހާ ދާއިރާއަކުންވެސް އަމަލީ ތަރައްގީ ފެނިގެންދާނެ: ރައީސް

Read Time:3 Minute, 11 Second

(ފޮޓޯ ކްރެޑިޓްސް: ވަގުތު)

މިއީ ތަރައްގީގެ އަހަރެއް ކަމަށާއި ހުރިހާ ދާއިރާއަކުންވެސް އަމަލީ ތަރައްގީ ފެނިގެންދާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ. މޯލްޑިވިއަންގެ ވައިޑް-ބޮޑީ މަތިންދާބޯޓުގެ ފުރަތަމަ ބޯޓުގެ އޮޕަރޭޝަން ފެށުމަށް މިހާރު ވެލާނާ އިންޓަނޭޝަނަލް އެއާޕޯޓްގައި ކުރިއަށްގެންދާ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ކުރިއަށް އޮތީ ތަރައްގީގެ މަސައްކަތުގެ ދުވަސްތައް ކަމަށާއި، މި އަހަރަކީ ތަރައްގީގެ އަހަރެއް ކަމަށެވެ.

“އިރާދަކުރެއްވިއްޔާ ދިވެހި ރައްޔިތުން ދެކެވަޑައިގަންނަވާނީ ތަރައްގީ އަމަލީ ގޮތުން ފެނިގެންދާތަން، ކޮންމެ ދާއިރާއަކުން، އެއީ އިގްސާދީ ދާއިރާތަކުން ކަމުގައިވިޔަސް، އުމްރާނީ ތަރައްގީއާ ގުޅިފައިވާ އެކިއެކި ދާއިރާތަކުން ކަމުގައިވިޔަސް،”. ރައީސް ވިދާޅުވިއެވެ. ރައީސް ވިދާޅުވީ، މި ގައުމުގައި ތަރައްގީގެ ކަންކަން ވަރަށް ބާރުމިނުގައި ކުރިއަރައިގެންދާނެ އަހަރަކަށް މި އަހަރު ވެގެން ދާނީ، ހުރިހާ އެންމެންގެ މަސައްކަތުން ކަމަށެވެ.

(ފޮޓޯ ކްރެޑިޓްސް: ވަގުތު)

ރައީސް ވިދާޅުވީ ބޭނުންވަނީ ގައުމަށް ތަރައްގީއަންނަން ކަމަށާއި ތަރައްގީއާއެކު ރާއްޖޭގައި ހަމަޖެހުން ގާއިމްވާން ކަމަށެވެ. އަދި ހަމަޖެހުން ގާއިމްވެގެން ދިއުމާއެކު، ގައުމުގެ މިނިވަންކަމާއި ސިޔާދަތު ޔަގީންކަމާއި އެކީގައި ދެމެެހެއްޓިގެން ދިއުން ކަަމަށް ރައީސް ވިދާޅުވިއެވެ. “މި ތިންކަންތައް އެކު އެކީގައި ހާސިލްވެގެންދާ، ވަށާ ޖެހޭ ތަރައްގީއެއް ގެނެސްދިނުމަށް އަޅުގަނޑުމެން މަސައްކަތް މި ކުރަނީ،”. ރައީސް ވިދާޅުވިއެވެ.

އަދި އެންމެން އެކުގައި ކުރިއަށްގެންދާ މަސައްކަތް ކާމިޔާބު ވެގެން ދާނެ ކަމަށްވެސް ރަައީސް ވިދާޅުވިއެވެ.