Read Time:4 Minute, 28 Second
ޗައިނާގައި މިދުވަސްވަރު ފެތުރެމުންދާ ނޭވާލާ ނިޒާމަށް ޖެހޭ ބަލިތަކުގެ ހާލަތު މޮނިޓަރ ކުރަމުންދާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ. އެޗްޕީއޭއިން މިއަދު ބުނީ ދުނިޔޭގެ ސިއްޙަތު ޖަމްއިއްޔާއިން، ޗައިނާ ސީޑީސީއާއި ހަވާލާ ދެއްވާ މައުލޫމާތު ދެއްވާ ގޮތުގައި ޗައިނާގެ އެކި ހިސާބުތަކުގައި މިދިޔަ ނޮވެމްބަރ ދެ ވަނަ ހަފްތާއިން ފެށިގެން ނޭވާލާ ނިޒާމުގެ ބަލިތައް އިތުރުވަމުންދާކަމަށް ފާހަގަކުރެވިފައިވާ ކަމަށެވެ.
ފިނި މޫސުމާ ދިމާކޮށް ޗައިނާ އަދި ފިނި މޫސުން އަންނަ އެހެން ޤައުމުތަކުގައި އާއްމުކޮށް ނޭވާލާ ނިޒާމުގެ ބަލިތައް އިތުރުވާ ކަމަށާއި، މިދިޔަ އަހަރާއި އަޅާ ބަލާއިރު ޗައިނާގައި މި މޫސުމުގައި ނޭވާލާ ނިޒާމުގެ ބަލިތައް ފެންނަ މިންވަރާއި، ބަލީގައި ބޮޑުވަރުވާ މީހުންގެ ނިސްބަތް މަދު ކަމަށް ތަފާސްހިސާބުތަކުން ފާހަގަކުރެވޭ ކަމަށްވެސް ބުނެފައިވެއެވެ. “މިހާލަތާއި ގުޅިގެން ޗައިނާއިން އިމަރޖެންސީއެއް އިއުލާނުކޮށްފައި ނުވެއެވެ. ޗައިނާގައި ފެތުރެމުންދާ ބަލިތަކަކީ އާއްމުކޮށްވެސް ދައުރުވާ ނޭވާލާ ނިޒާމުގެ ބަލިތަކެވެ. މީގެ ތެރޭގައި އެންމެ ގިނައީ އިންފްލުއެންޒާއެވެ. މީގެ އިތުރުން އާރް.އެސް.ވީ، ރައިނޯވައިރަސް، އެޑިނޯވައިރަސް، މައިކޯޕްލާސްމާ ނިމުއޯނިއާ އަދި ހިއުމަން މެޓަނިއުމޯވައިރަސް ހިމެނެއެވެ.” އެޗްޕީއޭއިން ބުންޏެވެ.
އެ އިދާރާއިން ބުނީ “މިހާލަތު ދަނީ މޮނިޓަރ ކުރަމުން” ކަމަށެވެ. އެހެން ނަމަވެސް މި ބައްޔާ ގުޅިގެން ރާއްޖެއަށް ނުރައްކަލެއް އޮތް ކަމެއް ނުވަތަ ނޫން ކަމެއް އެޗްޕީއޭއިން ހާމަކޮށްފައި ނުވެއެވެ. އަދި މި ބަލިން ސަމާލަތްވުމަށް ފިޔަވަޅެއް އަޅާފައިވާ ކަމެއްވެސް ހާމަކޮށްފައި ނުވެއެވެ. ޗައިނާގައި ފެތުެރމުންދާ ހިއުމަން މެޓަނިއުމޯވައިރަސްގެ ސަބަބުން ދުނިޔޭގެ ގިނަ ގައުމުތަކުން ކަންބޮޑުވުން ފާޅުކޮށްފައިވާއިރު، ބައެއް ގައުމުތަކުން ވަނީ އެ ބަލި ފެތުރެމުންދާ މިންވަރު އިތުރުވަމުންދާކަމަށް ބުނެ ސަލާމަތީ ފިޔަވަޅު އަޅަން ފަށާފައެވެ.
ހިއުމަން މެޓާނިއުމޯވައިރަސް (އެޗްއެމްޕީވީ) އަކީ އާންމުގޮތެއްގައި ރޯގާ ފަދަ އަލާމާތްތައް ފެންނަ ވައިރަހެކެވެ. ކެއްސާ، ކިނބިހި އެޅުން، ނޭފަތުން ފެން އައުން ނުވަތަ ކަރުގައި ރިއްސުން ފަދަ ކަންކަން ދިމާވެދާނެ އެވެ. ގިނަ ކޭސްތަކަކީ އާދައިގެ ކޭސްތަކެއް ނަމަވެސް ކުޑަކުދިންނާއި 65 އަހަރުން މަތީގެ ބޮޑެތި މީހުންނާއި ދިފާއީ ނިޒާމު ބަލިކަށި މީހުންނަށް މި ބަލި ޖެހުމުގެ ފުރުސަތު ބޮޑެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0